एजेन्सी – अष्ट्रेलिया र इंग्ल्यान्डबीचको तीन टि२० सिरिज अन्तर्गत दोस्रो खेल आज हुँदैछ । खेल नेपाली समय अनुसार साँझ ७ बजेपछि साउथह्याप्टनमा सुरु हुनेछ ।

पहिलो खेलमा इंग्ल्यान्ड दुई रनले विजयी हुँदै सिरिजमा १–० को अग्रता लिएको छ । इंग्ल्यान्ड एक खेल अगावै सिरिज जित्न चाहान्छ । यता अष्ट्रेलियालाई सिरिज बचाउन दोस्रो खेल जित्नै पर्ने दबाब छ ।

पहिलो खेलमा अष्ट्रेलिया एक समय सहज जिततर्फ अगाडि बढेको थियो । ३६ बलमा ३९ रन चाहिँएको अवस्थामा हातमा ९ विकेट थियो । तर अष्ट्रेलियाका मध्यक्रमका ब्याट्सम्यान चल्न नसक्दा अप्रत्याशित झिनो हार बेहोरेको थियो । अष्ट्रेलिया ओपनर डेभिड वार्नर ५८ रन र आरोन फिन्चले ४६ रन जोड्दै राम्रो सुरुवात दिलाएका थिए । तर स्टिभ स्मिथ १८, ग्लेन म्याक्सवेल र एलेक्स केरी एक एक रनमा आउट गर्दै इंग्ल्यान्डले उत्कृष्ट पूनरागमनका साथ जित हात पारेको थियो ।

अष्ट्रेलियाले मध्यक्रम मजबुत पार्न मार्नस लाबुसेनलाई मौका दिन सक्छ । टेष्ट र ओडिआईमा उच्च प्रर्दशन गरि रहेका लाबुसेन टि२० आईमा डेब्युको पर्खाईमा छन् । लाबुसेनले अभ्यास टि२० खेलमा शतक प्रहार गर्दै आफू टोलीको लागि योग्य रहेको राम्रो संकेत दिएका थिए । पहिलो खेलमा ४ ओभरमा ४७ रन खर्चेका स्पिनर एडम जम्पाको स्थानमा आज तीव्र गतिका बलर ड्यानियल स्याम्स वा रिले मेरीडिथ मध्य एकलाई मौका दिन सक्छ ।

इंग्ल्यान्डका तीन ब्याट्सम्यानले मात्र पहिलो खेलमा दोहोरो अंकमा रन जोडेका थिए । राम्रो लयमा रहेका तेस्रो नम्बरका बाँया हाते ब्याट्सम्यान डेविड मलान ६६ र ओपनर तथा विकेटकिपर जस बटलरले ४४ रनको योगदान दिएका थिए । मलान दोस्रो खेलमा पनि नायक बन्न सक्छन् । पहिलो खेलमा ८ रनमा आउट भएका ओपनर जोनी बेयरस्टोलाई ठूलो इनिङ खेल्न आवश्यक छ । ४ ओभरमा ३१ रन खर्चेर १ विकेट लिएका मार्क वुडको स्थानमा अलराउन्डर साम करनले मौका पाउन सक्छन् ।

यी दुई देशबीच कुल १७ टि२० आई खेल भएका छन् । जसमा इंग्ल्यान्ड ७ खेलमा विजयी हुँदा ९ खेलमा पराजित भएको छ । एक खेल नतिजा विहिन बनेको थियो ।