एजेन्सी – इन्डियन प्रिमियर लिग (आइपिएल) १३ औं संस्करण सेप्टेम्बर १९ देखि संयुक्त अरव इमिरेट्स (यूएई) मा सुरु हुँदैछ । व्यावसायिक रुपमा हरेक खेलाडीको आइपिएल खेल्ने चाहना हुन्छ ।

विश्वभरका चर्चित खेलाडीको भेटसँगै पारिश्रमिक पनि राम्रो हुने हुँदा आइपिएल खेलाडीहरुको पहिलो रोजाईमा पर्दै आएको छ । आफ्नो प्रर्दशन हरेक खेलाडीको लागि महत्वपूर्ण हुन्छ । युवा खेलाडीको लागि अझ विशेष महत्त्व राख्छ । उत्कृष्ट प्रर्दशन गर्ने युवा खेलाडीलाई सिनियर टोलीमा स्थान बनाउन सहज हुन्छ ।

इमर्जिङ प्लेयर अवार्ड जित्ने युवा खेलाडीले १० लाख भारतीय रुपैयाँ पाउने गर्दछन् । इमर्जिङ प्लेयर अवार्डको लागि मनोयनमा पर्न ५ आइपिएल खेल खेलेको हुनुपर्छ । २० भन्दा बढी ओडीआई खेलेको हुनु हुँदैन । २५ भन्दा बढी आइपिएल खेलेको पनि हुनु हुदैन । एक पटक इमर्जिङ प्लेयर अवार्ड जितेको पनि हुनु हुँदैन ।

गत वर्ष नेपाली लेग स्पिनर सन्दीप लामिछाने इमर्जिङ प्लेयरको मनोयनको भोटिङ अग्र स्थानमा रहेपनि कोलकाता नाइट राइडर्सका युवा ब्याट्सम्यान सुभमन गिलले जितेका थिए । इमर्जिङ प्लेयरको छनोट अधिकार आइपिएल टिभी कमेन्टेटर टोलीमा हुने हुँदा भोटले फरक पार्दैन ।

सनराइजर्स हैदराबाट २०१६ मा बंगलादेशका तीव्र गतिका बलर मुस्ताफिजुर रहमानले इमर्जिङ प्लेयर जित्दा अन्य सबै संस्करणमा भारतीय खेलाडी चुनिदै आएका छन् । यस पटक पनि भारतीय खेलाडीनै अघि देखिन्छन् । आइपिएल २०२० मा प्रर्दशन गर्न युवा खेलाडी तयार र आतुर छन् । यी पाँच युवा खेलाडी जो आइपिएल २०२० मा उच्च प्रर्दशनका साथ इमर्जिङ प्लेयर अवार्ड जित्न सक्छन् ।

५. सन्दीप लामिछाने (दिल्ली क्यापिटल्स)

नेपाली लेग स्पिनर सन्दीप लामिछाने इमर्जिङ प्लेयर अवार्ड २०२० का दाबेदारमा पर्दछन् । सन्दीपले आइपिएलमा २०१८ मा ३ र २०१९ मा ६ खेलेका थिए । कुल ९ खेलमा १३ विकेट लिएका छन् । सन्दीप गतवर्ष अवार्डको मनयोनमा भोटिङमा अघि रहेपनि अवार्ड जित्न सकेनन् । सन्दीपले पछिल्लो समय उच्च प्रर्दशन गर्दै आएका छन् ।

हाल क्यारेबियन प्रिमियर लिग (सिपिएल) मा जमैका तलावाजबाट सन्दीपले राम्रो प्रर्दशन गरि रहेका छन् । अर्कोतर्फ सन्दीपले गत माघमा अमेरिकालाई आइसिसी विश्वकप लिग–२ त्रिकोणात्मक सिरिजमा ३५ रनमा अल आउट गर्न सन्दीपले ६ ओभरमा १ मेडन सहित १६ रन खर्चेर ६ विकेट लिए । सन्दीपले आफ्नो लयलाई आइपिएलमा निरन्तरता दिन आवश्यक छ ।

अर्कोतर्फ सन्दीपलाई यस पटकको सिजनमा उत्कृष्ट प्रर्दशन गर्नुपर्ने दबाब छ । दिल्लीसँग सन्दीपको तीन वर्षे सम्झौता यो सिजनदेखि सकिने छ । आगमी वर्षको अक्सनमा उच्च मूल्यमा बिक्न यस संस्करणको प्रर्दशनले पनि प्रभाव पार्ने छ ।

सन्दीपले यूएईको पिचको लाभ लिन सक्छन् । तर दिल्लीमा सन्दीपको नियमित स्थानको सम्भावना भनेको कम छ । भारतीय रविचन्द्रन आश्विन र अमित मिश्रा स्पिनरमा हुँदा नियमित स्थान बनाउन भने कठिन देखिन्छ ।

४. रवि बिश्नोई (किंग्स इलेभेन पञ्जाव)

किंग्स इलेभेन पञ्जावका युवा लेग स्पिनर रवि बिश्नोईले आइपिएलमा डेब्यु सहित उत्कृष्ट प्रर्दशनका साथ इमर्जिङ प्लेयर बन्न सक्छन्। उनलाई अक्सनमा पञ्जावले २ करोड भारतीय रुपैयाँमा अनुबन्ध गरेको थियो ।

बिश्नोईले फागुनमा दक्षिण अफ्रिकामा सम्पन्न एक दिवसिय यु१९ विश्वकपमा भारतलाई फाइनलमा पुर्याउन उत्कृष्ट प्रर्दशन गर्दै ६ खेलमा १७ विकेटका साथ शीर्ष स्थानमा रहेका थिए । उनले बंगलादेश, न्युजिल्यान्ड र जापानसँग ४–४ विकेट लिदै सनसनी मच्चाएका थिए । अर्कोतर्फ यूएईको पिच स्पिनर उपयोगी मानिन्छ । जसको उपयोग विश्रोईले भरपूर्ण उठाउन सक्छन् ।

पञ्जावले दुई स्पिनर नियमित खेलाउने छ । पञ्जाबले विश्रोई र अफगानिस्तानका स्पिनर मुजिब उर रहमानको जोडि मैदानमा उतार्ने सम्भावना रहेको छ । पशिक्षक अनिल कुम्बलेको रेखदेखपछि विश्रोईको प्रर्दशनमा अझ निखारता आउने अनुमान गरिएको छ । विश्रोईको लय, क्षमता लगायतका कुरा हेर्दा इमर्जिङ प्लेयर २०२० बन्न सक्छन् ।

३. विराट सिंह (सनराइजर्स हैदरावाद)

झारखण्डबाट घरेलु क्रिकेट खेल्ने २२ वर्षिय बाँया हाते ब्याट्सम्यान विराट सिंह यस आइपिएलमा उच्च प्रर्दशन गर्न सक्ने युवा खेलाडीमा पर्दछन् । घरेलु क्रिकेटमा उच्च प्रर्दशन गर्दै उत्कृष्ट प्रभाव छोडेका विराट सिंहले आइपिएलमा कस्तो प्रर्दशन गर्छन् त्यो हेर्न बाँकी छ । अक्सनमा हैदरावादले विराट सिंहलाई १ करोड ९० लाख भारतीय रुपैयाँमा अनुबन्ध गरेको थियो । मध्यक्रममा ब्याटिङ गर्ने उनले ठूला सट र इनिङको क्षमता राख्छन् ।

गतवर्ष हैदराबादका ओपनर डेभिड वार्नर र जोनी बेयरस्टोले उत्कृष्ट प्रर्दशन गर्दा मध्यक्रम र तल्लोक्रमका ब्याट्सम्यानको प्रर्दशन कम्जोर रहेको थियो । हैदराबादको मध्यक्रममा केन विलियम्सन, मनिष पान्डे र विराट सिंह छन् । विराट सिंहले तल्लोक्रममा नियमित टोलीमा पर्न सक्छन् । उनले ५६ टि२० खेलमा १५ सय ५२ रन बनाएका छन् । जसमा उत्कृष्ट प्रर्दशन ८१ रन छ । जसमा १० अर्ध शतक सामेल छ ।

विराटले ३० प्रथम श्रेणीमा ३ शतक र ४ अर्ध शतक सहित १३ सय ९४ रन बनाएका छन् । उत्कृष्ट प्रर्दशन १ सय ४० रन छ । उनले ४० लिष्ट ए मा १ शतक र १० अर्ध शतक सहित १२ सय ४९ रन बनाएका छन् । उनको क्षमतालाई हेर्दा दाबेदार देखिन्छन् ।

२. देवदत्त पाडिक्कल (रोयल च्यालेन्जर्स बेंगलोर)

२० वर्षिय बायाँ हाते ओपनर ब्याट्सम्यान देवदत्त पाडिकल कर्नाटकाबाट घरेलु क्रिकेटमा आक्रामक रुपमा उच्च प्रर्दशन गर्दै आएका छन् । देवदत्तलाई अक्सनमा रोयल च्यालेन्जर्स बेंगलोरले न्यूनतम मूल्य २० लाख भारतीय रुपैयाँमा अनुबन्ध गरेको थियो ।

गतवर्ष बेंगलोरको ओपनिङ जोडीमा धेरै फेर बदल गरेको थियो । यस पटक बेंगालेरबाट कप्तान विराट कोहली र देवदत्तलेनै ओपनिङ गर्ने सम्भावना छ । पाडिकललाई ओपनर समस्याको समाधानको रुपमा समेत हेरिएको छ । ठूला सटका लागि माहिर देवदत्तले आक्रामक रुपमा रन जोड्दै राम्रो सुरुवात दिने गर्दछन् ।

उनले १२ टि२० आई खेलमा १ शतक र ५ अर्ध शतक सहित ५ सय ८० रन बनाएका छन् । उनको स्ट्राइकरेट १ सय ७५ रहँदा उत्कृष्ट प्रर्दशन १ सय २२ रन अविजित छ । आइपिएल २०२० मा पाडिकल एक प्रमुख दाबेदारका रुपमा रहेका छन् ।

१. यशस्वी जैसवाल (राजस्थान)

आइपिएलमा राजस्थान रोयल्सका १८ वर्षिय बायाँ हाते युवा ओपनर यशस्वी जैशवालको प्रर्दशनमा सबैको नजर रहने गर्दछ । उनले घरेलु प्रतियोगिता, यु१९ विश्वकप देखी सबै खेलमा लगातार उत्कृष्ट प्रर्दशन गर्दै आगमी स्टार खेलाडीको संकेत दिएका छन् ।

जैसवाललाई अक्सनमा राजस्थानले २ करोड ४० लाख रुपैयाँमा अनुबन्ध गरेको थियो । उनले यु१९ विश्वकपमा ६ खेलमा १ शतक र ४ अर्ध शतक सहित कुल ४ सय रनका साथ शीर्ष स्थानमा रहँदै सर्वोउत्कृष्ट खेलाडी चुनिएका थिए । उनले पाकिस्तानविरुद्ध १ सय १३ बलमा ८ चौका र ४ छक्का सहित १ सय ५ रनमा अविजित रहँदै १० विकेटको जित दिलाएका थिए ।

जैसवालको खेल्ने शैलीलाई धेरै क्रिकेट विज्ञहरु विरेन्द्र सहवागसँग तुलना गर्छन् । कलिलो उमेरमा जैसवाल मैदानमा परिपक्व, परिस्थिति र टोलीको आवश्यकता अनुसार ब्याटिङ गर्ने हुँदा भारतीय टोलीमा उनलाई रोहित शर्मा र शिखर धवन पछिको ओपनर समेत भन्ने गर्दछन् । पार्टटाइम स्पिन बलिङ गर्ने गर्दछन् । उनले गतवर्ष लिष्ट ए मा २ सय ३ रन बनाउँदै कम उमेरमा दोहोरो शतक प्रहार गर्ने कीर्तिमान कायम गरेका थिए ।

आक्रामक ब्याटिङ गर्ने जैसवालले जस बटलरका साथ आइपिएलमा राजस्थानको ओपनिङ गर्ने सम्भावना छ । उनले १३ लिष्ट ए मा समान तीन शतक र अर्ध शतक सहित ७ सय ७९ रन बनाएका छन् । आइपिएलमा उच्च प्रर्दशन गर्दै जैसवाल भारतीय सीमित ओभरमा स्थान समेत बनाउन सक्छन् । उनलाई भारतीय टोलीमा तत्काल स्थान बनाउन सहज छैन ।

तर जैसवालले आइपिएलमा उच्च प्रर्दशन गर्दै टिम छनोट कर्ताको मन जित्न सक्छन् । खेल्ने शैली, लय र क्षमतालाई हेर्दा जैसवाल इमर्जिङ प्लेयरको प्रमुख दाबेदार देखिन्छन् ।