काठमाडौं (हाम्रो खेलकुद) – नेपाली राष्ट्रिय क्रिकेट टोलीका पूर्व कप्तान पारस खड्काले फिनिक्स कलेज अफ म्यानेजमेन्टको ‘ब्रान्ड एम्बासडर’ नियुक्त भएसँगै सोहि कलेजबाट मास्टर्स इन बिजिनेस एड्मिनिस्ट्रेसन (एमबीए) पढाइ गर्ने भएका छन् ।

काठमाडौंको नयाँ बानेश्वर स्थित थापागाउँमा रहेको फिनिक्स कलेज अफ म्यानेजमेन्टमा यसै सेप्टेम्बर सत्रदेखि एमबीए अध्ययन गर्न लागेका पारसलाई शनिवार ब्रान्ड एम्बासडरमा नियुक्त गरेको हो । पारसलाई आगमी दुई वर्षसम्मका लागि एमबीए कार्यक्रममा कलेजले एम्बासडरको रुपमा नियुक्त गरेको हो ।

शनिवार कलेजका निर्देशक लक्ष्मण पोख्रेल र पारसले सम्भौता पत्रमा हस्ताक्षर गरेका थिए । कलेजका प्रधानाध्यापक विनोद बहादुर खत्रीले पारस नेपाली राष्ट्रिय क्रिकेट टोलीका प्रख्यात खेलाडी मात्रै नभएर राम्रो र मेधावी विद्यार्थी पनि रहेको बताए ।

‘विशेष त खेलाडीको करिअर पछि उनीहरुको भविष्यका लागि औपचारिक र उच्च शिक्षा धेरै आवश्यक छ । एक शिक्षित खेलाडी आफैंलाई, विश्व र खेललाई अझ राम्ररी बुझ्न सक्षम हुन्छ’, पारसले भने । पारसले यसअघिनै ह्वाइटहाउस कलेजबाट उच्च शिक्षा पूरा गरेका थिए ।

फिनिक्स कलेज अफ म्यानेजमेन्ट लिंकन विश्वविद्यालयबाट सम्बन्धन प्राप्त गरि एमबीए तथा बीबीए कार्यक्रम सञ्चालन गर्ने नेपालको पहिलो कलेज हो ।