एजेन्सी – अष्ट्रेलियासँग तेस्रो तथा अन्तिम टि२० आई खेल्नुअघि घरेलु टोली इंग्ल्यान्डलाई झट्का लागेको छ । उत्कृष्ट लयमा रहेका ओपनर तथा विकेटकिपर जस बटलरले तेस्रो टि२० खेल गुमाउने भएका छन् ।

बटलरले पारिवारिक कारणले तेस्रो खेल गुमाउने इंग्ल्यान्ड क्रिकेट बोर्डले जनाएको छ । बटलर आइतबार खेलपछि टोलीबाट बाहिरिएका थिए । इंग्ल्यान्डले तीन टि२० आई सिरिजमा २–० को अग्रता लिएको छ । अन्तिम खेल मंगलबार साउथह्याप्टनमै हुने छ ।

पहिलो खेलमा इंग्ल्यान्ड २ रन र दोस्रोमा ६ विकेटले विजयी भएको थियो । पहिलो खेलमा बटलरले २९ बलमा ५ चौका र २ छक्का सहित ४४ रन जोडेका थिए । दोस्रो खेलमा बटलर ५४ बलमा ८ चौका र २ छक्का सहित ७९ रनमा अविजित रहँदै ‘म्यान अफ द म्याच’ चुनिएका थिए । उत्कृष्ट लयमा रहेका बटलर नहुँदा इंग्ल्यान्डको ओपनिङ कम्जोर बन्न सक्छ ।

बटलर ओडिआई सिरिजको पहिलो खेलमा भने टोलीमा समावेश हुने छन् । पहिलो ओडिआई शुक्रबार म्यानचेस्टरमा हुने छ । दोस्रो आइतबार र अन्तिम बुधबार हुने छ । बटलरले तेस्रो टि२० खेल गुमाउँदा विकेटकिपर जोनी बेयरस्टोले गर्ने छन् । ओपनिङ जोनी बेयरस्टो र टम ब्यान्टनले गर्ने छन् । तेस्रो नम्बरमा डेविड मलानले गर्दा चौथो नम्बरमा जो डेनलीले गर्ने सम्भावना छ ।

यसअघिका दुई खेलमा ब्यान्टनले चौथो नम्बरमा ब्याटिङ गरेका थिए । पाँचौ नम्बरमा कप्तान ओईन मोर्गन र छैटौं नम्बरमा मोईन अलीले गर्ने छन् ।