काठमाडौं (हाम्रो खेलकुद) – नेपाल क्रिकट संघ (क्यान) ले २०१९ मा नियमित टोलीबाट खेलेका स्पिनर ललितनारायण राजवंशीलाई २०२० को ग्रेड सूचिबाहिर राखेको छ ।

ललित ग्रेड सूचिमा नपरेपछि सर्वत्र क्यानको आलोचना सुरु भएको छ । खेलाडीको ग्रेड र पारिश्रमिक (तलब) निर्धारण गर्न क्यानले गत माघमा कोषाअध्यक्ष रोशनकुमार सिंह, केन्द्रिय सदस्य दुर्गाराज पाठक र अमितविर पान्डेको समिति गठन गरेको थियो ।

‘सुरुमा हामीले २४ जनाको नाममा ललितलाई राखेका थियौं । पछि खेलाडी वर्गिकरण धेरै जना भयो भनेपछि ६ जनलाई घटाएर १८ जनामा पुर्यायौं । १८ जनामा राख्दा ललित परेनन्’, दुर्गाराज पाठकले थपे, ‘यो माघतिर नै अध्ययन गरेर बैठकमा पेश गर्ने तयारीका साथ सुची बनाएका थियौं । कोरोनाको कारण बोर्ड बैठक बस्न सकेन । अहिले आएर अनुमोदन भएको हो ।’

१८ जनाको खेलाडीको सूचिमा पनि ललित प्रबल दाबेदार हुन् नी भन्ने प्रश्नमा उनले भने, ‘बोर्डले पास गरिसकेको छ । २० जना भएको भए ललितको नाम १९ औं थियो । ललितले घरेलु क्रिकेटमा राम्रो गर्दा अन्तर्राष्ट्रियमा त्यति राम्रो पनि थिएन ।’

पाठकले क्यानका लागि सबै खेलाडी बराबर भएको र ग्रेडमा सुधार गर्न सक्ने पनि बताए । ‘१९/२० कहीं कतै भएको होला त्यो आफ्नो ठाउँमा छ । १० को २० बनाएका छैनौं । तलमाथि हुन सक्छ । यसलाई पुन सुधार गर्न नमिल्ने भन्ने पनि छैन । समितिले मात्र लगेको कुरा होईन बोर्डले पनि अनुमोदन गरेको कुरा हो । आवश्यकताको आधारमा भोलीका दिनमा यस पनि छलफल हुन सक्छ । बोर्डले २४ जनालाई नै गर्ने कि भन्ने पनि त हुन सक्छ नि’, उनले भने ।

बोर्ड सदस्य दुर्गाराज पाठक

‘कोरोनाले पनि असर गर्यो । प्रतियोगिता भएको भए प्रायोजन पनि हुन्थ्यो । २४ जनालाई राख्थ्यौं । कोरोना महामारी नभएको भए खेलाडीको प्रर्दशन पनि देखिन्थ्यो । केहि तलमाथि भएको हुन सक्छ । यसलाई धेरै ठूलो विषय नबनाउ’, पाठकले थपे ।

स्पिनर ललितले २०१९ मा नेपालले खेलेका सबै प्रतियोगितामा सहभागिता जनाएका थिए । ललितले २०१९ मा कुल १८ अन्तर्राष्ट्रिय खेलमा १५ विकेट लिएका थिए । १३ औं सागमा टि२० आई मान्यता खेलमा नेपालबाट ३ खेलमा ६ विकेटका साथ शीर्षस्थानमा रहेका थिए । २०१९ मा नेपालले सेप्टेम्बरमा जिम्बाबे र सिंगापुरबीच भएको त्रिकोणात्मक सिरिजमा ललित टोलीमा रहेपनि कुनैपनि खेलमा मौका पाएनन् । अन्य सबै खेल खेलेका थिए ।

यता वसन्त ग्रेड बी बाट ए मा बढुका भएका छन् । सोमपाल कामी ए बाट बी मा घटुवा भएका छन् । वसन्तको बढुवाबारे भने पाठकले यसो भने, ‘खेलाडीको सम्मान, सिनियर खेलाडी र खेल जीवनको उत्तरार्धमा रहेका खेलाडीलाई किन बी मा राख्नु भनेर बढुवा गरिएको हो । समितिले पहिलानै पेश गरेको र अहिले बोर्डले अनुमोदन गरेको हो । १४ जनाको गरेको भए त अझ धेरै घट्थे ।’

‘कप्तानले पनि अहिले धेरै खेलाडी सम्झौता नगरौं । थारै गरौं भनेका थिए । राम्रो गर्नेलाई बोनसहरु दिउँ भनेका थिए । सम्झौता ६ महिना गर्ने तयारी गरेका थियौं तर अब ६ महिना त सक्किसक्यो । बोर्डको निर्णयलाई डिफेन्स गुर्नबाहेक अन्य मसँग कुनै विकल्प हुँदैन’, उनले भने ।

यो पनि :

महिला क्रिकेटमा सम्झौता : पहिलो गासमै ढुंगा

ग्रेड विभाजनमा क्यानको गम्भिर लापरवाही