काठमाडौं (हाम्रो खेलकुद) – बागमती प्रदेशले चौथो संस्करणको प्रधानमन्त्री कप राष्ट्रिय एकदिवसिय क्रिकेट प्रतियोगितामा साविक विजेता पुलिसलाई ७ विकेटले हराउँदै सानदार विजयी सुरुवात गरेको छ ।
जितको लागि १ सय १२ रनको सामान्य विजयी लक्ष्य पछ्याएको बागमतीले ३४.४ ओभरमा ३ विकेट गुमाउँदै पूरा गर्यो । बागमतीका मध्यक्रमका ब्याट्सम्यान तथा उपकप्तान पृथु बास्कोटा ६६ बलमा ५ चौका र ३ छक्का सहित ४८ रनमा अविजित रहे । ईशान पान्डे ६६ बलमा २ चौका सहित १७ रनमा अविजित रहे ।
पृथुले ३५ औं ओभरको चौथो बलमा स्पिनर ललितनारायण राजवंशीलाई लङअनमा उत्कृष्ट छक्का प्रहार गर्दै खेल सकाएका थिए ।
दोस्रो ओभरको चौथो बलमा ओपनर आकाश थापा एक रनमा रन आउट हुन पुगेका थिए । ११ औं ओभरको पहिलो बलमा दीपेन्द्रसिंह ऐरीले आदिल खानलाई १२ रनमा बोल्ड आउट गर्दै पेभिलिएन फर्काए । आदिलले २८ बलमा २ चौका प्रहार गरे । १६ औं ओभरको दोस्रो बलमा ललितनारायण राजवंशीले १७ रनमा बोल्ड आउट गर्दै पुलिसलाई झिनो आशा देखाएका थिए । टियू मैदानमा ४४ बल खेलेका पारसले एक चौका प्रहार गरेका थिए ।
चौथो विकेटका लागि ईशान र पृथुले ७९ रनको अविजित साझेदारी गर्दै सहज जित दिलाए । पुलिसका दीपेन्द्र र ललितले एक एक विकेट लिए ।
त्यसअघि टियु क्रिकेट मैदानमा टस हारेर ब्याटिङ थालेको पुलिस २९.३ ओभरमा १ सय ११ रनमा अल आउट भएको थियो । बागमतीको बलिङ सामु पुलिसका कुनैपनि ब्याट्सम्यानले क्रिजमा टिकेर जिम्मेवारी प्रर्दशन गर्न नसक्दा सस्तैमा अल आउट हुन पुगेको थियो ।
पहिलो ओभरको तेस्रो बलमै सुनिल धमलाले एक रनमा जीवनदान पाएका थिए । तीव्र गतिका बलर रामनरेश गिरीको बलमा एज लागेर गएको बल विकेटकिपर आकाश थापाले छोड्न पुगेका थिए ।
रामनरेशको सातौं ओभरमा तेस्रो बलमा ठूलो सट खेल्ने धुनमा धमला मिस हुँदा १७ रनमा एलबिडब्लूको शिकार बन्न पुगे । धमलाले २२ बलमा ३ चौका प्रहार गरे । नवौं ओभरको तेस्रो बलमा रामनरेशले अमितलाई मिड अफमा ज्ञानेन्द्र मल्लबाट क्याच आउट गराएका थिए । अमितले १० बलमा १ छक्का प्रहार गरे ।
तीव्र गतिका बलर नन्दन यादवले १५ औं ओभरको तेस्रो बलमा ओपनर कुशल भुर्तेललाई फस्ट स्लिपमा रहेका पारस खड्काबाट १७ रनमा क्याच गराएपछि पुलिस दबाबमा परेको थियो । ३९ बल खेलेका उनले २ चौका प्रहार गरे ।
१४.३ ओभरमा ६६–३ को अवस्थामा रहेको पुलिसलाई आरिफ शेख र दीपेन्द्र सिंह ऐरीले ३४ रनको साझेदारी गर्दै सम्हाल्न खोजेका थिए । तर युवा लेगस्पिनर तिलकराज भण्डारीले आरिफलाई २१ रनमा एलबिडब्लू आउट गर्दै पेभिलिएन फर्काए । आरिफले २५ बलमा ३ चौका प्रहार गरे ।
२३ औं ओभरमा नन्दनले दीपेन्द्रलाई आकाशबाट २१ रनमा क्याच आउट गराएपछि पुलिस १०२– ५ को कमजोर अवस्थामा पुगेको थियो । दीपेन्द्रले ३९ बलमा २ चौका प्रहार गरे । पुलिसका तल्लोक्रमका ब्याट्सम्यान पनि सम्हालिएर खेल्न सकेनन् ।
तिलकको २४ औं ओभरको दोस्रो बलमा अनिल कुमार शाह एज लागेर फस्ट स्लिपमा रहेका पारसबाट १ रनमा क्याच भएपछि पुलिस संकटमा परेको थियो । २५ औं ओभरको अन्तिम बलमा नन्दनले मन्जित श्रेष्ठलाई स्लिपमा पारसबाट ५ रनमा उत्कृष्ट क्याच आउट गराएपछि पुलिस १०७–७ को कमजोर अवस्थामा पुगेको थियो । नन्दनले राशिद खानलाई एक रनमा बोल्ड आउट गरे । दबाबमा तिलककै बलमा गलत सट खेल्दै पवन एक रनमा क्याच आउट भए ।
नन्दन यादवले ९ ओभरमा १ मेडन सहित ३१ रन खर्चेर ४ विकेट लिए । तिलकराज भण्डारीले ७।३ ओभरमा १ मेडन सहित १७ रन खर्चेर ४ विकेट लिए । रामनरेश गिरीले ६ ओभरमा ३० रन खर्चेर २ विकेट लिए ।
पुलिसले दोस्रो खेलमा टियुमा माघ ७ मा सुदूरपश्चिमविरुद्ध खेल्ने छ । बागमतीले सोमबार टियुमा सुदूरपश्चिमसँग खेल्ने छ ।
यो पनि : आर्मीसँग कर्णालीको हार
