काठमाडौं (हाम्रो खेलकुद) – ओपनर म्याक्स ओडाउडले आक्रामक शतक प्रहार गरेपछि नेदरल्यान्ड्सले त्रिकोणात्मक टि२० सिरिज अन्तर्गत मलेसियाविरुद्ध विशाल योगफल खडा गरेको छ ।

टस जितेर ब्याटिङ रोजेको नेदरल्यान्ड्सले निर्धारित २० ओभरमा २ विकेट गुमाउँदै १ सय ९१ रन जोडेको हो । नेदरल्यान्ड्सका लागि ओडाउडले ७३ बलमा १ सय ३३ रन जोडे । उनले १५ चौका र ६ छक्का प्रहार गरे । उनलाई बेन कुपरले अर्को एन्डबाट राम्रो साथ दिएका थिए । कुपर २० बलमा २ चौकासहित २० रन जोड्दै नटआउट रहे । यी दुईले तेस्रो विकेटका लागि नटआउट १ सय २५ रनको साझेदारी गरे ।

ओडाउडले ५९ बलमा शतक पूरा गरेका थिए । उनले सायद अजिजको बलमा पोइन्टमा छक्का प्रहार गर्दै शतक पूरा गरेका थिए । ओडाउड नेदरल्यान्ड्सका लागि टि२० अन्तर्राष्ट्रिय शतक प्रहार गर्ने पहिलो खेलाडी पनि बने । यसअघि वर्तमान कप्तान पिटर शिलारको ९६ रनको स्कोर नै सर्वाधिक थियो ।

त्यसअघि तेस्रो ओभरमा नै टोबियास भिसलाई पवनदीप सिंहले १ रनमा बोल्ड गरेका थिए । ओपनर ओ’डाउड र स्कट एडवार्ड्सले दोस्रो विकेटका लागि बलियो साझेदारी गर्दै राम्रो अवस्थामा पुर्याए । उनीहरुले ३८ बलमा ४९ रनको साझेदारी गरेका थिए ।

एडवार्ड्स २३ बलमा ३१ रन जोड्दै अनवर रहमानको एलबीडब्लू धरापमा परे । उनले ३ चौका र १ छक्का प्रहार गरेका थिए ।

नेदरल्यान्ड्सको टोली : पिटार सीलार (कप्तान), टोबियस भिसे, बेन कुपर, म्याक्स ओडिवड, बास डी लीडे, स्कर्ट एडवार्डस, आर्यन दत्त, फिलिपे बोइससेवेन, भिभिन किंगमा, टोनी स्टल, सेबस्टियान ब्राट

मलेसियाको टोली : अहमद फेज, विरनदिप सिंह, अमिनुदीन राम्ली, अनवर अरुदीन, अनवर रहमान, खिजार हायत, मुहमद वाफिक, शर्विन मुनींदी, पवनदीप सिंह, शफिक सरिफ, सायद अजिज