default_image

3 years ago

August 4, 2021

पारस युगको अन्त्य

भूपेन्द्र जिसी, काठमाडौं पारस खड्का, नेपाली क्रिकेट इतिहासकै सर्वाधिक सफल कप्तान र खेलाडी । यस्ता व्यक्तित्व जसले राष्ट्रिय क्रिकेट टोली मात्र नभएर नेपाली क्रिकेटलाई निकै कठिन परिस्थितिबाट अगाडि बढाउँदै टि२० विश्वकप र ओडिआई मान्यता सम्मको सफलता दिलाए । नेपाली क्रिकेटमा युगान्तकारी परिवर्तन ल्याउन मैदान भित्र र बाहिर उत्तिकै डटेर लागेका पारसले मंगलबार आश्चर्य रुपमा अन्तर्राष्ट्रिय क्रिकेटबाट […]

71 views

0 Bookmark

भूपेन्द्र जिसी, काठमाडौं

पारस खड्का, नेपाली क्रिकेट इतिहासकै सर्वाधिक सफल कप्तान र खेलाडी । यस्ता व्यक्तित्व जसले राष्ट्रिय क्रिकेट टोली मात्र नभएर नेपाली क्रिकेटलाई निकै कठिन परिस्थितिबाट अगाडि बढाउँदै टि२० विश्वकप र ओडिआई मान्यता सम्मको सफलता दिलाए । नेपाली क्रिकेटमा युगान्तकारी परिवर्तन ल्याउन मैदान भित्र र बाहिर उत्तिकै डटेर लागेका पारसले मंगलबार आश्चर्य रुपमा अन्तर्राष्ट्रिय क्रिकेटबाट सन्न्यासको घोषणा गरेका छन् । र उनको करिअर ग्राफ हेर्ने हो भने सफलताले भरिपूर्ण करिअरको अन्त्य भने निरस रह्यो ।

पारस नेपाली क्रिकेट इतिहासका खम्बा हुन् । नेपालले विश्व क्रिकेटमा जतिपनि ठूला उपलब्धि हात पारेको छ त्यसको असली नायक हुन् पारस । उच्च प्रदर्शन र कुशल नेतृत्व क्षमताले भरिपूर्ण । नेपाली क्रिकेटलाई लगातार सफलता दिलाउँदै समर्थकलाई एकपछि अर्को खुसी दिए । मैदानमा उत्रेपछि सायदै आशाका केन्द्र पारसको आकस्मिक बहिर्गमनले समर्थकमाझ निराशा छाएको छ ।

अकस्मात आएको यस निर्णयले उनको बिदाइ केहि निरस भएको आँकलन गर्न सकिन्छ । पारसले पछिल्लो दशकमा मैदानभित्र दिएको योगदानलाई समर्थकले कम्तिमा पनि मैदानमै पुगेर बिसाउन चाहन्थे । त्यसो त पारस आफैंले पनि यस्तै सोचा राखेको हुनुपर्छ, तर कोरोना महामारी र पछिल्लो समय क्रिकेट गतिविधि नै नहुनुले त्यसो हुन सकेन ।

पारस नेपाल मात्र नभएर एसोसियट टोलीकै स्टार अलराउन्डर हुन् । विकासोन्मुख क्रिकेट राष्ट्रका लागि उदाहरणीय कप्तान हुन् । क्रिकेटको सर्वोच्च संस्था अन्तर्राष्ट्रिय क्रिकेट परिषद् (आइसिसी) ले नै पछिल्लो एक दशक यताकै सर्वोत्कृष्ट एसोसिएट खेलाडीमध्यमा समेटेका पारसले सामाजिक सञ्जालको पोष्टमार्फत सन्न्यासको घोषणा गरे ।

झट्ट हेर्दा र सुन्दा पत्याउनै गाह्रो । तर यो यथार्थ र सत्य थियो । नेपालका खेलाडी, पदाधिकारी र क्रिकेटप्रेमी समर्थक मात्र नभएर खेलमा कमै ध्यान दिने आम दर्शकले पनि उनको सन्न्यासबारे चासो लिए । एसोसिएट क्रिकेटका केहि खेलाडीले व्यक्तिगत रुपमा नै पारससँग खेल्न पाएकोमा खुसी व्यक्त गर्दै उनलाई शुभकामना दिए ।

पारस नेपाली युवा पुस्ताका लागि खेलाडी मात्र नभएर एक उदाहरणीय व्यक्तित्व हुन् । जति स्तरीय खेलमा पारसको ब्याटिङ, बलिङ र फिल्डि थियो । उनको नेतृत्व क्षमताले उनलाई एक सफल कप्तानी र कुशल व्यवस्थापकको रुपमा स्थापित गर्यो । मैदानभित्र पारसले सायदै कुनै खोट लगाउने कुनै ठाउँ दिए ।

पारसले आफ्नो खेलाडी करीअरमा टि२० विश्वकप, ओडिआई मान्यता हासिल गर्दै नेपाललाई टेस्ट मान्यताको दावी गर्ने हैसियतमा पुर्याएका छन् । अहिलेको अवस्थामा नेपाललाई टि२० विश्वकप र ओडिआई मान्यता उपलब्धि भन्दापनि आवश्यकता बनिसकेको छ । तर दशकअघि नेपालको लागि यहि नै सपना थियो । सायद धेरैले त्यो स्तर पुग्न सक्नेमा शंका नै व्यक्त गरे ।

पारसलाई नेपाली क्रिकेटमा ‘वान म्यान आर्मी’अर्थात एकल योद्धा समेत भन्ने गरिन्थ्यो । क्यान विवादमा फसेर प्रतिबन्धमा परेपछि पारसको नाम क्रिकेटकै पर्यायको रुपमा रहयो । उनले यसबीचमा गरेको योगदान हेर्दा पारस विनाको नेपाली क्रिकेट इतिहास अपूरो नै हुन्छ । मैदान बाहिर पनि आवश्यकता पर्दा टोलीका लागि अग्रसर पारसले फेरी एकपटक टोलीलाई नै अघि राख्दै आफू बिदा भए ।

नेपालबाट राष्ट्रिय तथा अन्तर्राष्ट्रिय स्तरमा बनेका अधिकांश कीर्तिमान पारसकै नाममा छन् । सिमित स्रोत र साधनकाबीच नेपाललाई एक पछि अर्को ठूलो सफलता दिलाउने विश्व क्रिकेट जगतकै उदाहरणीय कप्तान पारसको अन्त्य भव्य बिदाइ र राष्ट्रिय सम्मानका साथ गर्नुपर्ने थियो । क्यानले अब पारसको बिदाई कसरी गर्न त्यो हेर्न बाँकी छ । तर २०१९ मा कप्तानी छाडेको शैलीलाई दोहोर्याउँदै पारसले अन्तर्राष्ट्रिय क्रिकेटबाट बिदा लिएका छन् । महान् खेलाडीले सामान्य शैलीमा आफ्नो करीयर विश्राम गरेका छन् ।

पारसको उमेर र प्रदर्शनलाई हेर्ने हो भने उनले केहि हतार गरेजस्तो पनि देखिन्छ । गत फागुनमा काठमाडौं मेयर्स कपमा बागमी प्रदेशबाट त्रिभुवन आर्मी क्लबविरुद्ध सानदार शतकका साथ राम्रो लयको संकेत पनि दिएका थिए । अन्तर्राष्ट्रिय प्रतियोगितामा पनि चोटका कारण पछिल्लो समय केहि विश्राममा रहेपनि उनले लय गुमाएका थिएनन् ।

सन् २००२ मा यूएईमा भएको यू१५ एसिया कपबाट पारसको नेपाली क्रिकेटमा यात्रा सुरु भएको थियो । सन् २००३ मा नै उनले यू१९ टोलीमा स्थान बनाउन सफल रहे । त्यसको एक वर्षपछि नै उनले मलेसियाविरुद्ध खेलाडी सिनियर राष्ट्रिय टोलीबाट डेब्यू गरे । पारसले नेपालबाट २००४, २००६ र २००८ मा लगातार तीन यू१९ विश्वकप खेले ।

सन् २००४ मा बंगलादेशमा भएको यू१९ विश्वकपमा पारसले ५ खेलमा ८३ रन बनाउँदा ४ विकेट लिएका थिए । २००६ को यू१९ विश्वकप कनिष्क चौगाईंको कप्तानीमा पारसले श्रीलंका यू१९ विश्वकप खेले । नेपालले प्लेट फाइनलमा न्युजिल्यान्डलाई एक रनले हराउँदै नेपालले पहिलो पटक उपाधि जित्दा टोलीका महत्वपूर्ण सदस्य थिए । उक्त यू१९ खेलमा पारसले १ सय ५ रन बनाएका थिए । बलिङतर्फ ७ विकेट लिएका थिए ।

नेपालले प्लेट च्याम्पियनसिपको फाइनलमा स्थान बनाउन सेमिफाइनलमा दक्षिण अफ्रिकालाई २ रनले पराजित गरेको थियो । उक्त विश्वकपमा समूह चरणमा टेस्ट टोली जिम्बावेविरुद्ध पारसले ९ ओभरमा १ मेडन सहित २८ रन खर्चेर ४ विकेट लिएका थिए । २००८ मा मलेसियामा भएको यू१९ विश्वकपमा पारसले नेपालको नेतृत्व गरे । पारसले ६ खेलमा १ सय १३ रन बनाउँदा १२ विकेट लिदै सानदार प्रदर्शन गरेका थिए ।

नेपाल प्लेट फाइनलमा वेस्टइन्डिजसँग पराजित भएको थियो । जिम्बावेविरुद्ध र अष्ट्रेलियाविरुद्ध ४ विकेट लिदै उत्कृष्ट प्रदर्शन गरेका थिए । उनले २००८ को डिभिजन पाँच लगायत सिनियर टोलीका सबै खेल खेलिनै रहे । उमेर समूह कप्तानीबाट तत्कालिक प्रशिक्षक रोय डास लुकाकुले पारस भविष्यको कप्तान बताई सकेका थिए ।

२००९ मा तत्कालिन कप्तान विनोद दासलाई प्रतिस्थापन गर्दै एसीसी टी२० एलिट कपमा मलेसियाविरुद्ध पारसले पहिलो पटक राष्ट्रिय टोलीको कप्तानी गरेका थिए । दुर्भाग्य उक्त खेलमा नेपाल ६ विकेटले स्तब्ध भएको थियो । सन् २०१० मा घरेलु मैदानमा भएको आइसिसी वल्ड डिभिजन पाँचको उपाधि दिलाउदै पारसले नयाँ आयम दिए । घरेलु मैदान टियुमा अमेरिकालाई पाँच विकेटले हराउँदै नेपाललाई पहिलो पटक आइसिसीको पहिलो ठूलो उपाधि जिताएका थिए । नेपाली क्रिकेट विकासमा उक्त उपाधि टर्निङ प्वाइन्ट मानिन्छ ।

२०११ डिसेम्बरमा नेपालमा भएको एसिसी टि२० ट्रफीमा पनि पारसले उत्कृष्ट प्रदर्शन गरेका थिए । पारसले सन् २०१२ मा मलेसियामा भएको आईसीसी वोल्ड क्रिकेट लिग डिभिजन फोर–४ को उपाधि जिताए । फाइनलमा अमेरिकालाई ८ विकेटले पराजित गरेको थियो । त्यसैवर्ष वर्ष अक्टोबरमा यूएईमा भएको एसीसी टफी इलिटको उपाधि पनि पक्का गराए ।

जुन प्रतियोगितामा पारसको प्रदर्शन सर्वोत्कृष्ट रह्यो । नेपालले फाइनलमा अन्तिम ओभरमा १२ रन चाहिँएको अवस्था ११ रन जोड्दै युएईसँग संयुक्त रुपमा उपाधि बाँडेको थियो । जसक्रममा करीअरको पहिलो शतक प्रहार गर्नेक्रममा पारसले कुवेतविरुद्ध ७७ बलमा १ सय ६ रनको अविजित इनिङ खेलेका थिए । हङकङविरुद्ध ६१ इनिङ खेलेका थिए । सेमिफाइनलमा मलेसियालाई २१ रनले हराउँदै फाइनलमा स्थान बनाउन पारसले ८९ रनको कप्तानी इनिङ खेलेका थिए । पारस प्रतियोगिता प्लेयर अफ द सिरिज चुनिए ।

२०१२ मा यूएईमानै भएको टि२० विश्वकप ग्लोबल छनोटमा पारसले हङकङविरुद्ध ६६, बर्मुडाविरुद्ध ६५, पपुवा न्युगिनीविरुद्ध ६२ रनको इनिङ खेलपनि अन्य ब्याट्सम्यान चल्न नसक्दा सातौं स्थानमा रहँदै बाहिरिएको थियो । २०१३ मा यूएईमा भएको टि२० ग्लोबल छनोटमा नेपालले इतिहास रच्न सफल भयो । पारसको प्रदर्शन महत्त्वपूर्ण थियो ।

पहिलो खेलमा डेनमार्कलाई ५ विकेटले हराउन ४८ रन जोडेका पारसले दोस्रो खेलमा केन्यालाई पराजित गर्न ५४ रनको अविजित इनिङ खेलेका थिए । विश्वकपमा स्थान बनाउन निर्णायक क्वाटरफाइनल खेलमा पारसले हङकङविरुद्ध ४६ रनको प्लेयर अफ द म्याच इनिङ खेलेका थिए । जुन खेलमा नेपालले हङकङलाई पाँच विकेटले हराउँदै पहिलो पटक टि२० विश्वकपमा स्थान पक्का गर्यो ।

२०१४ मा नेपालले बंगलादेशमा भएको टि२० विश्वकपमा पहिलो पटक सहभागिता मात्र जनाएन सानदार प्रदर्शनका साथ फर्किएको थियो । उत्कृष्ट प्रदर्शनका साथ हङकङ र अफगानिस्तानलाई पराजित गर्दा बंगलादेशसँग हार्न पुगेको थियो । उक्त विश्वकपमा पारसको कप्तानी र प्रदर्शन दुबै सानदार रह्यो । जुन विश्वकप नेपाली क्रिकेट मात्र नभएर खेलकुदले नै पाएको सर्वाधिक ठूलो सफलता थियो ।

त्यसअघि सन् २०१३ मा बर्मुडामा भएको आईसीसी विश्व क्रिकेट लिग डिभिजन थ्रि-३ को उपाधि जिताउँदै पारसले नेपालको विश्व क्रिकेटमा ठूलो सम्भावना रहेको देखाए । एक पछि अर्को सफलता दिलाउने क्रममा पारसले सन् २०१४ मा मलेसियामा भएको डिभिजन ३ को उपाधि पनि नेपालको नाममा लेखाए ।

विश्वकपपछि नेपाली क्रिकेटको लोकप्रियता ह्वात्तै बढ्यो । पारसले पनि यति धेरै लोकप्रियता बढ्ला भनेर कहिले नसोचेको बेला बेलामा बताउने गर्दछन् । मैदानभित्र खेलाडीले उत्कृष्ट प्रर्दशन गरिरहँदा यता नेपाल क्रिकेट संघ (क्यान) भद्रगोल बनिरहेको थियो । खेलाडीनै क्यानविरुद्ध आन्दोलनमा उत्रनुपर्ने वातावरण सिर्जना भयो । सन् २०१५ मा आइसीसी टि ट्वान्टी विश्वकप छनोटमा खराब प्रर्दशन गर्दै बाहिरिएपछि नेपाली क्रिकेट केहि समय सुनसान जस्तै बन्न पुग्यो । तर कप्तान पारस आत्तिएनन् ।

अनेक चरणका विवादपश्चात २०१६ मा नेपाल क्रिकेट संघ (क्यान) आईसीसीको निलम्बनमा पर्यो । क्यान निलम्बन भएपनि पारसले आइसिसीसँग राम्रो समन्वय गर्दै कुनैपनि प्रतियोगिता खेल्नबाट बञ्चित हुन दिएनन् । २०१६ मा नेपालले पहिलो पटक क्रिकेटको मक्का मानिने लर्ड्स मैदानमा खेल्न पायो । जसमा एमसीसीलाई ४१ रनले पराजित गर्दै सनसनी मच्चायो । लर्ड्स खेलेपछि सबै खेलाडीले सपना जस्तो लागेको बताएका थिए ।

क्यान निलम्बनमा परेपनि आईसीसीको समन्वयमा नेपालले आईसीसी विश्व क्रिकेट लिगमा सन् २०१५ देखि २०१८ सम्म प्रतिस्पर्धा गर्यो । जसअन्तर्गत सन् २०१६ मा कीर्तिपुर मैदानमा आईसिसी विश्व क्रिकेट च्याम्पियन्स लिग अन्तर्गत नामिबियासँगको दोस्रो खेलमा कप्तान पारसले शतक प्रहार गर्दै सहज जित दिलाए ।

घरेलु मैदान चारैतिर खचाखत दर्शकम सामू २ सय ४० रनको लक्ष्य पछ्याउने क्रममा पारसले ९४ बलमा ५ चौका र ७ छक्का सहित १ सय ३ रनको उत्कृष्ट इनिङ खेले । कमजोर ब्याटिङको इतिहास बोकेकोए नेपालले उक्त लक्ष्य पछ्याउने कमैले आशा राखेका थिए । तर पारसले हजारौं समर्थकलाई निराश हुन दिएनन् ।

दुई वर्ष सम्म चलेको च्याम्पियनसिपमा पारसले १ शतक र ३ अर्धशतक सहित कुल ४ सय ८ रन बनाएका थिए । ८ राष्ट्र सम्मिलित आईसीसी विश्व क्रिकेट च्याम्पियन्स लिग नेपाल सातौं स्थानमा रहेपछि शीर्ष चारमा रहेर सोझै एकदिवसिय विश्वकप छनोट खेल्ने अवसर नेपाल गुमायो ।

सन् २०१८ मा नामिबियामा भएको डिभिजन २ मा कप्तान पारस खड्काले नेपाललाई शीर्ष स्थानमा रहँदै जिम्बावेमा हुने एकदिवसिय विश्वकप छनोटमा स्थान पक्का गरे । जसअन्तर्गत फाइनलमा यूएईविरुद्ध १ सय ३ बलमा ३ चौका र ८ छक्का सहित १ सय १२ रनको अविजित शतकीय इनिङ खेलेका थिए । दुर्भाग्य २ सय ७८ रनको विजयी लक्ष्य पछ्याउने क्रममा ७ रनले पराजित भएको थियो । त्यसै प्रतियोगितामा क्यानडाविरुद्ध रोमाञ्चक जित पारसको करीअरमा सधैं यादगार रहि रहने छ । प्रतियोगितामा सर्वाधिक रन बनाउने क्रममा पारसले ६ खेलमा २ सय ४१ रन जोडे ।

२०१८ मार्चमा भएको आईसीसी एक दिवसिय विश्वकप छनोटमा १० टोली सहभागि प्रतियोगितामा नेपाल आठौं स्थानमा रहेपछि पहिलो पटक वान डे अन्तर्राष्ट्रिय (ओडीआई) मान्यता प्राप्त गर्यो । नेपालले हङकङ र पप्पुवा न्युगिनीलाई हराउँदै पहिलो पटक मार्च १५ मा वान डे मान्यता पक्का गर्यो । जुन एक दशकदेखि नेपालले देखोको सपना थियो । ओडीआई मान्यता पाउन पारसको कप्तानी पनि उत्तिकै उत्कृष्ट थियो । पारस चल्थें त नेपालले जित्थ्यो । पारस चल्दैन थिए त नेपालले हाथ्र्यो । त्यसैले त पारसलाई वान म्यान आर्मी भनिन्थ्यो ।

नेपालले सन् २०१८ अगष्ट १ मा नेदरल्यान्डसँग ओडीआई डेब्यू गर्दै इतिहास रच्यो । पहिलो खेलमा नेपाल ५५ रनले पराजित हुन पुग्यो । दोस्रो खेलमा रोमान्चक १ रनको जित निकाल्दै नेपालले पहिलो ओडीआई जितको इतिहास रच्यो । पहिलो ओडीआई जिताउन कप्तान पारसले ५१ रन बनाउनुको साथै महत्वपूर्ण १ विकेट लिए । अन्तिम बलमा रोमान्चक जित दिलाएको तीन वर्षपछि अगष्ट तीनमानै पारसले अन्तर्राष्ट्रिय क्रिकेटबाट सन्न्यासको घोषणा गरे । त्यसैले अगष्ट तीन नेपाली किकेटका लागि अझ विशेष बनेको छ ।

पारसले २०१९को सुरुवातमै नेपाललाई अर्को एतिहासिक सफलता दिलाए । यूएईसँगको तीन ओडीआई सिरिज २–१ ले जिताउदै इतिहास रचे । पारसल तेस्रो खेलमा १ सय १५ रनको शतकीय इनिङ खेल्दै नेपालबाट ओडीआईमा शतक पुरा गर्ने पहिलो ब्याट्सम्यान समेत बने । त्यस्तै यूएईसँगको तीन टि२० सिरिज पनि २–१ ले जित्दै इतिहास रच्न सफल भयो ।

नेपालले २०१८ अक्टोबरमा आईसीसी वोल्ड टि ट्वान्टी एसिया रिजन बी को उपाधि जित्यो । जुन नेपालले टि२० प्रतियोगितामा जितेको पहिलो ट्रफी थियो । २०१९ जुलाईमा सिंगापुरमा सम्पन्न आईसीसी टि ट्वान्टी विश्वकप एसिया छनोटमा खराब प्रर्दशन गर्दै बाहिरिएपछि भने खेलाडी,समर्थक र शुभचिन्तक सबै निराश बने । सम्भवत उनको करीअरमा नेपालले हासिल गरेको खराब नतिजामध्यमा थियो । कतार र सिंगापुरसँग पराजित हुँदै बाहिरिनु परेको थियो ।

त्यसअघि नेपालले सिंगापुर,जिम्बावेसँगको त्रिकोणात्मक सिरिजमा मध्यम प्रर्दशन गरेको थियो । सिंगापुरलाई ९ विकेटले पराजित गर्नेक्रममा पारस खड्काले १ सय ६ रनको अविजित इनिङ खेल्दै इतिहास रचेका थिए । पारस नेपालबाट टि ट्वान्टीमा शतक प्रहार गर्ने पहिलो खेलाडी हुन् । लक्ष्य पछ्याउने क्रममा टि ट्वान्टी आईमा शतक प्रहार गर्ने विश्वको पहिलो कप्तान पनि बने ।

त्यसकै एक सातापछि पाँच राष्ट्र सम्मिलित टि ट्वान्टी सिरिजमा पनि पारसले प्रर्दशन उत्कृष्ट प्रदर्शन गरे । प्राप्य कप्तान र खेलाडी आफ्नो र टोलीको प्रर्दशन खराब भएमा, उमेर ढल्किदै गएमा, अर्को उत्कृष्ट कप्तान वा युवा खेलाडी देखिएमा राजीनामा दिने गर्दछन् । तीन वर्ष क्यानमा लागेको आइसिसी निलम्बन सशर्त फुकुवा भएको २४ घण्टा बित्न नपाउँदै पारसले असोज २७ मा कप्तानी छाडेका थिए । २०१९ अक्टोबर १० मा ओमानविरुद्ध खेलनै पारसले नेपालका लागि गरेको अन्तिम कप्तानी खेल बन्यो ।

नेपाली क्रिकेटमा एक दशक लामो यात्रा गर्ने उनी एक्लो कप्तान हुन् । सर्वाधिक कप्तानी, रन, उपलब्धि, पहिलो ओडिआई शतक, टि२० आई शतक, टि२० आई र ओडिआई सिरिज लगायत जतिपनि सफलता आउँछ त्यससँगै पारसको नाम जोडिएको हुन्छ । पारस विना नेपाली क्रिकेट कहिल्यै पूरा हुने छैन ।

पारसले कप्तानी छाडेपछि पारसले १३ औं दक्षिण एसियाली खेलकुद साग, २०२० को सुरुवातमा नेपालमा भएको ओमान र अमेरिकासँग आइसिसी विश्वकप लिग–२ अन्तर्गत त्रिकोणात्मक सिरिज हुँदै मार्चमा एसिसी इस्टर्न रिजन खेलेका थिए । थाईल्यान्डविरुद्ध २०२० मार्च ४ मा खेलेको खेल नै उनको अन्तिम अन्तर्राष्ट्रिय खेल बनेको छ ।

पारसले नेपालका लागि १० ओडिआई, ३३ टि२० आई, २ प्रथम श्रेणी, ४६ लिष्ट ए र ५६ टि२० खेलेका छन् । पारसले ओडिआईमा २०१८ अगष्ट ए मा नेदरल्यान्ड्सविरुद्ध डेब्यू गरेका थिए । अन्तिम ओडिआई खेल घरेलु मैदानमा अमेरिकाविरुद्ध २०२० फेब्रुअरी १२ मा खेले । पारसले ओडिआईमा एक शतक सहित कुल ३ सय १५ रन बनाएका छन् । पारसले ओडिआईमा ९ विकेट लिदा उत्कृष्ट प्रदर्शन ४–२६ छ ।

पारसले ३३ टि२० आई खेलमा १ शतक र ४ अर्धशतक सहित कुल ७ सय ९९ रन बनाएका छन् । ८ विकेट लिएका छन् । टि२० विश्वकपमा बंगलादेशविरुद्ध टि२० आईमा डेब्यू गरेका पारसको अन्तिम खेल थाईल्यान्डविरुद्ध रह्यो । लिष्ट ए मा पारसले ३ शतक र ९ अर्धशतक सहित कुल १ हजार ४ सय ९७ रन बनाउँदा २६ विकेट लिएका छन् । पारसले टि२० क्रिकेटमा कुल २८ विकेट लिदा १ हजार ३ सय १७ रन जोडेका छन् ।

पारस नेपाली क्रिकेटका महान् खेलाडी हुन् । पारसले क्यानसँग कुनै छलफल विनानै सन्न्यासको घोषणा गरे । पारस क्यान नेतृत्वमा जान चाहन्छन् । वर्तमान क्यानका पदाधिकारीसँग क्यानको सम्बन्ध राम्रो छैन । तरपनि क्यानसँग छलफल गर्दै राम्रो बिदाईका साथ सन्न्यास लिन पाएको सुनमा सगन्ध हुन्थ्यो । कुनैपनि खेलाडीको लागि डेब्यू र सन्न्यास पल निकै महत्वपूर्ण र कठिन हुन्छ । डेब्यूमा जति हर्ष हुन्छ सन्न्यासमा त्यतिनै पिडा ।

अब नेपाली क्रिकेटमा ७७ नम्बरको जर्सीमा पारस देखिने छैनन् । उनको त्यो उचाई, प्रदर्शन र कप्तानीको अभाव खड्किन सक्छ । दुई वर्षपछि हुने क्यान निर्वाचनको लागि असोज अघिनै पारसले सन्न्यास लिइसकेको हुनुपर्ने थियो । त्यसैले पारसले नेपालबाट खेल्ने ईच्छा हुँदाहुँदै पनि सन्न्यासको घोषणा गरेका आँकलन गर्न सकिन्छ ।

पारसले कम्तिमा २०२३ को ओडिआई मान्यता सम्म खेल्नुपर्ने देखिन्थ्यो । २०२३ मा आडिआई मान्यतालाई निरन्तरता दिँदै पारसले सन्न्यास लिएको भए अझ राम्रो हुन्थ्यो । पछिल्लो समय युवा खेलाडीले राम्रो संकेत दिएका छन् । एक खेलाडीमा मात्र निर्भर छैन भन्ने सन्देश दिएका छन् । तर पारसको अनुभव अहिलेका युवा खेलाडीको लागि निकै आवश्यक देखिन्छ ।

क्रिकेट विकासको लागि पारसले खेलाडी खेलेर मात्र नहुने बताउँदै आएका छन् । क्यानमा पनि कुशल नेतृत्व हुनुपर्ने लगातार माग उठाउँदै आएका छन् । मैदानमा पारसको जस्तै क्यानमा नेतृत्वको पर्खाइमा नेपाली क्रिकेट छ । पारस त्यो आवश्यकता पूरा गर्न चाहन्छन् । पारसको अबको मुख्य लक्ष्य दुई वर्षपछि चुनाव जित्ने हुनेछ । त्यसको सहज छैन र त्यति धेरै कठिन पनि छैन । विकास भएन भनेर निराश बनेको जिल्ला र प्रदेशको मन र विश्वास भने जित्न आवश्यक देखिन्छ । जुन कुरा पारसलाई राम्रोसँग थाहा छ र त्यहिँ तयारीको लागिनै सन्न्यास लिएका हुन् ।

डिभिजन पाँचबाट नेतृत्व समालेका पारसले आफूले छोड्दा ओडिआई टोली मात्र बनाएका छैनन् । एसोसियटको प्रमुख दाबेदार टोलीमा उभ्याएका छन् । टेस्टको सपना देखाएका छन् । विश्वले नेपाली क्रिकेटलाई हेर्ने नजर फेरिदिएका छन् । व्यावसायिक फ्रेन्चाइज लिगमा विदेशी टोलीको नजरमा नेपाली खेलाडी पर्ने स्तरमा पुर्याएका छन् । नेपाली क्रिकेटमा खेलाडीको रुपमा पारस युगमो अन्त्य भएको छ । तर क्यानमा भने सुरु हुनेछ । खेलाडी जीवनमा जस्तै क्यानमा नेतृत्व सफलता पूर्वक निर्वाह गर्न सके नेपाली क्रिकेटले थप नयाँ उचाई छिट्टै लिनेछ ।

क्यानमा कुशल नेतृत्व नहुँदा पारसले आफ्नो खेलाडी जीवनमा थुप्रै समस्या सामना गरे । तर पारसले अब आउने खेलाडीमा त्यो अभाव हुन नदिने प्रयास गर्नेछन् । नेपाली टोलीबाट सन्न्यास लिँदै क्यान नेतृत्वमा गएर क्रिकेटलाई अर्को स्तरमा लाग्ने उनको सपना छ । खेलाडी जीवनमा जस्तै अर्को इनिङमा प्रवेश गर्न लागेको उनको सफलताको कामना सबैले गर्नेछन् । नेपाली क्रिकेटका धरोहर पारसलाई नेपाल मात्र नभएर विश्व क्रिकेटलेनै मैदानमा भने पक्कै मिस गर्नेछ ।

यो पनि : पारसले सन्न्यास लिनुका पाँच कारण

March 30, 2024

सिरिज बराबर गर्ने नेपाल ‘ए’ को लक्ष्य

काठमाडौं (हाम्रो खेलकुद) – नेपाल ‘ए’ ले आयरल्यान्ड वल्भ्सविरुद्ध जारी टि२० सिरिजको दोस्रो खेल आज खेल्दैछ । खेल दिउँसो १ बजे टियु अन्तर्राष्ट्रिय क्रिकेट मैदानमा सुरु हुनेछ । शुक्रबार भएको पहिलो खेलमा नेपाल २१ रनले पराजित भएको थियो । जितका लागि २ सय २३ रनको लक्ष्य पछ्याउने क्रममा नेपाल २ सय १ रनमा समेटिएको थियो […]

March 29, 2024

कोलकत्ता नाइट राइडर्सको सानदार जित

एजेन्सी – कोलकत्ता नाइट राइडर्स (केकेआर) ले रोयल च्यालेन्जर्स बेंगलूरु (आरसिबि) माथि सानदार जित दर्ता गरेको छ । यस संस्करणको आईपिएलको दोस्रो जित दर्ता गर्ने क्रममा केकेआरले ७ विकेटको जित दर्ता गरेको हो । आरसिबिको घरेलु मैदान चिन्नस्वामी स्टेडियममा भएको खेलमा पाएको १८२ रनको लक्ष्य केकेआरले १९ बल बाँकी रहँदा ३ विकेट गुमाएर भेटायो । […]

March 29, 2024

धनगढी र सिइसीको लगातार दोस्रो जित

सुमन अधिकारी, बुटवल धनगढी क्रिकेट क्लब र पल्सर क्रिकेट एक्सलेन्स सेन्टर (सिइसी) काठमाण्डौ रुपन्देहीमा जारी छैंटौं खड्ग प्रसाद गौचन मेमोरियल यु—१९ क्रिकेट प्रतियोगिता–२०८० मा शुक्रबार विजयी भएका छन् । समुह बी मा रहेका यी दुवै टोलीले लगातार दुई खेलमा जित हात पारेका छन् । पहिलो खेलमा धनगढी क्रिकेट क्लबले सेन्टर क्रिकेट एकेडेमी कास्कीलाई ३ विकेटले […]

Success

Thank you for your time.