काठमाडौं (हाम्रो खेलकुद) – साविक विजेता ललितपुर प्याट्रीयट्सले चौथो संस्करणको एभरेष्ट प्रिमियर लिग (इपिएल) मा अफगानिस्तानका युवा अलराउन्डर आजमतुल्लाह ओमरजाईलाई टोलीमा अनुबन्ध गरेको छ ।

ललितपुरले तेस्रो विदेशी खेलाडीको रुपमा २१ वर्षिय अफगानी अलराउन्डर आजमतुल्लाहलाई टोलीमा भित्र्याएको छ । मध्यगतिमा बलिङ गर्ने उनले अफगानिस्तानबाट एक ओडिआई खेल खेलेका छन् । उनले गत जनवरीमा आयरल्यान्डविरुद्ध ओडिआईमा डेब्यू गरेका थिए । उनीसँग पाँच प्रथम श्रेणी, २४ लिष्ट ए र १० टि२० खेलको अनुभव छ ।

उनले तल्लोक्रममा राम्रो ब्याटिङको क्षमता राख्छन् । उनले २०१८ मा बंगलादेशबाट यू१९ विश्वकप र २०१९ मा इमर्जिङ टिम्स एसिया कप खेलि सकेका छन् । यू१९ विश्वकपमा न्युजिल्यान्डलाई पराजित गर्न आजमतुल्लाहले २३ बलमा ३ चौका र ७ छक्का सहित ६६ रनको आक्रामक इनिङ खेल्दै प्लेयर अफ द म्याच चुनिएका थिए ।

ललितपुरले यसअघि भुटानका ब्याट्सम्यान मिक्यो दोर्जी र इंग्ल्यान्डका एलेक्स ब्लेकलाई विदेशी खेलाडीको रुपमा अनुबन्ध गरि सकेको छ । ललितपुरमा ज्ञानेन्द्र मल्ल, सन्दीप जोरा, राशिद खान, पवन सरार्फ, कुशल भुर्तेल, सोनु तामाङ, योगेन्द्रसिंह कार्की, कमल खत्री, रिजन ढकाल, विभत्सु थापा र अरियो पौडेल लगायतका खेलाडी छन् ।

इपिएल असोज ९ देखि २३ सम्म टियुमा हुने छ । इपिएल विजेताले ५० लाख र उप विजेताले १५ लाख रुपैयाँ प्राप्त गर्ने छन् । ललितपुरले २०१८ को फाइनलमा भैरहवा ग्ल्याडियसटर्सलाई १४ रनले पराजित गर्दै उपाधि जितेको थियो ।