एजेन्सी – अमेरिकाले पहिलो ओडिआई खेलमा पपुवा न्युगिनीमाथि ७ विकेटको सहज जित हात पारेको छ । जितको लागि १ सय ५९ रनको विजयी लक्ष्य पछ्याएको अमेरिकाले २८.२ ओभरमा ३ विकेटको क्षतिमा पूरा गर्यो ।

अमेरिका कप्तान तथा ओपनर स्टिभ टेलरले ५५ बलमा ७ चौका र ७ छक्का सहित ८२ रनको उत्कृष्ट आक्रामक इनिङ खेल्दै सहज जित दिलाए । विकेटकिपर मोनक पटेल ३८ बलमा १ चौका र १ छक्का सहित ३४ रनमा अविजित रहे । सुशान्त मोडानी २४ र गजानन्द सिंह ९ रनमा आउट भए । पिएनजीका डेमियन राभू र चाल्र्स अमिनीले एक एक विकेट लिए ।

त्यसअघि अल अमरेत क्रिकेट क्रिकेट मैदान ओमानमा टस जितेर ब्याटिङ रोजेको पिएनजी ४४.२ ओभरमा १ सय ५८ रनमा अल आउट भएको थियो । पिएनजीका कप्तान असाद भालाले ७४ बलमा ६ चौका र १ छक्का सहित सर्वाधिक ६१ रनको योगदान दिए । सेसे बाउ ३१, गाउडी टोका १८ र जेसन किला १० रनमा आउट भए । ७ खेलाडीले दोहोरो अंकमा रन बनाउन सकेनन् ।

अमेरिका स्पिनर निसर्ग पटेलले १० ओभरमा ३० रन खर्चेर ४ विकेट लिए । नोस्टुश केंजीगेले ३ र सौरभ नेत्रवालकारले २ विकेट लिए । आइसीसी विश्वकप लिग-२ अन्तर्गत त्रिकोणात्मक ओडिआई सिरिज अघि तयारीको लागि दुई दुई खेल खेलेका हुन् । नेपालले पनि पिएनजीसँग दुई ओडिआई खेल खेल्ने छ । नेपाल र पिएनजीबीचको पहिलो खेल भोली (मंगलरबार) हुने छ ।