एजेन्सी – भारतले चौथो टेस्ट खेलमा इंग्ल्यान्डमाथि १ सय ५७ रनको सानदार जित हात पारेको छ । यो जितसँगै भारतले पाँच टेस्ट सिरिजमा २–१ को अग्रता लिएको छ ।

जितको लागि ३ सय ६८ रनको विजयी लक्ष्य पछ्याएको घरेलु टोली इंग्ल्यान्ड पाँचौं दिन ९२.२ ओभरमा २ सय १० रनमा अल आउट हुन पुग्यो । पाँचौं दिन ३२ ओभरमा ७७–० को अवस्थाबाट सुरुवात गरेको इंग्ल्यान्डले कमजोर ब्याटिङका साथ पराजित हुन पुगेको हो । इंग्ल्यान्डका दुबै ओपनर रोरी बर्न्स र हसिब हमिदले अर्धशतकीय इनिङ खेलेपनि अन्य ब्याट्सम्यान चल्न नसक्दा पराजित हुन पुगेको हो ।

इंग्ल्यान्डलाई बर्न्स र हमिदले पहिलो विकेटका लागि ४०.४ ओभरमा १ सय रनको शतकीय साझेदारी गर्दै राम्रो सुरुवात दिलाएका थिए । तीव्र गतिका बलर शार्दूल ठाकुरले बन्र्सलाई ऋषभ पन्तबाट क्याच आउट गराउँदै पहिलो सफलता दिलाएका थिए । त्यसपछि इंग्ल्यान्डले एकपछि अर्को विकेट गुमाएको थियो । बर्न्स १ सय २५ बलमा ५ चौका प्रहार गरे । हमिदले १ सय ९३ बलमा ६ चौका सहित सर्वाधिक ६३ रनको योगदान दिए । कप्तान जो रुटले ७८ बलमा ३ चौका सहित ३६ रन जोडे । अन्य ब्याट्सम्यानको प्रदर्शन सम्झन लायक रहेन । डेविड मलान ५, ओली पोप २, जोनी बेयरस्टो र मोईन अलीले खाता खोल्न सकेनन् ।

तल्लोक्रमका क्रिस वोक्स १८, क्रेग ओभरटन र ओली रोबिन्सन १०–१० रन जोडे । भारतका तीव्र गतिका बलर उमेश यादवले सर्वाधिक ३ विकेट लिए । जस्प्रित बुमराह, रविन्द्र जडेजा र शार्दूल ठाकुरले २–२ विकेट लिए ।

त्यसअघि भारतले दोस्रो इनिङमा उत्कृष्ट ब्याटिङ गर्दै ४ सय ६६ रनमा अल आउट भएको थियो । पहिलो इनिङमा ९९ रनले पछि परेको भारतले समग्रमा ३ सय ६७ रनको अग्रता लिएको थियो । भारतका ओपनर रोहित शर्माले २ सय ५६ बलमा १४ चौका र १ छक्का सहित सर्वाधिक १ सय २७ रनको शतकीय इनिङ खेले ।

रोहितको यो करीअरको आठौं टेस्ट शतक पर्दछ । भारतलाई ओपनर रोहित शर्मा र लोकेश राहुलले ८३ रनको साझेदारी गरेका थिए । राहुल १ सय १ बलमा ६ चौका र १ छक्का सहित ४६ रनमा क्याच आउट भए । दोस्रो विकेटका रोहित र चेतेश्वर पुजाराले १ सय ५३ रनको महत्वपूर्ण साझेदारी गरेका थिए । पुजारा १ सय २७ बलमा ९ चौका सहित ६१ रनमा क्याच आउट भए । विराट कोहलीले ९६ बलमा ७ चौका सहित ४४, रविन्द्र जडेजा १७ र अजिंक्या रहाणे शून्यमा आउट भए ।

तल्लोक्रममा ऋषभ पन्त र शार्दूल ठाकुरले सातौं विकेटका लागि १ सय रनको साझेदारी गरेपछि भारतले बलियोे योगफल तयार पारेको थियो । ठाकुर ७२ बलमा ७ चौका र १ छक्का सहित ६० रनमा आउट भए । पन्तले १ सय ६ बलमा ४ चौका सहित ५० रन जोडे । उमेश यादव २५ र जस्प्रित बुमराह २४ रनमा आउट भए । इंग्ल्यान्डका क्रिस वोक्सले सर्वाधिक ३ विकेट लिए । ओली रोबिन्सन र मोईन अलीले २–२ विकेट लिए । जो रुट, क्रेग ओभरटन र जेम्श एन्डरसनले एक एक विकेट लिए ।

त्यसअघि पहिलो इनिङमा इंग्ल्यान्ड दोस्रो दिन तेस्रो सेसनमा ८४ ओभरमा २ सय ९० रनमा अल आउट भएको थियो । इंग्ल्यान्डका ओली पोपले १ सय ५९ बलमा ६ चौका सहित सर्वाधिक ८१ रनको योगदान दिए । एक समय ६२–५ को कमजोर अवस्थामा पुगेको इंग्ल्यान्डलाई छैटौं विकेटका लागि पोप र जोनी बेयरस्टोले ८९ रनको महत्वपूर्ण साझेदारी गरेका थिए ।

बेयरस्टोलाई मोहम्मद शिराजले ३७ रनमा एलबीडब्लू आउट गर्दै साझेदारी तोडेका थिए । बेयरस्टोले ७७ बलमा ७ चौका प्रहार गरे ।
सातौं विकेटका लागि ओली पोपले मोईन अलीसँग ७१ रनको साझेदारी गरेपछि इंग्ल्यान्डले अग्रता लिएको थियो । मोईन अली ७१ बलमा ७ चौका सहित ३५ रनमा क्याच आउट भए । अलीलाई रविन्द्र जडेजाले रोहित शर्माबाट क्याच आउट गराएका थिए ।

अन्तिम विकेटका रुपमा रन आउट हुनुअघि क्रिस वोक्सले ६० बलमा ११ चौका सहित महत्वपूर्ण ५० रन जोडे । दोस्रो दिन पहिलो एक घण्टा भारतको पक्षमा गएको थियो । सुरुवातमै क्रेग ओभरटन एक रनमा विराट कोहलीबाट क्याच आउट भएका थिए । त्यसपछि डेविड मलानलाई उमेश यादवले रोहित शर्माबाट ३१ क्याच आउट गराउँदै घरेलु टोली इंग्ल्यान्डलाई दबाबमा राखेका थिए । मलानले ६७ बलमा ५ चौका प्रहार गरे । त्यसपछि इंग्ल्यान्डले राम्रो पूनरागमन गरेको थियो ।

पहिलो दिन कमजोर सुरुवात गरेको घरेलु टोली इंग्ल्यान्डलाई मलान र कप्तान जो रुटले तेस्रो विकेटका लागि ४६ रनको साझेदारी गर्दै इनिङ उकासेका थिए । तर रुटलाई दिनको अन्तिम समयतिर उमेश यादवले २१ रनमा बोल्ड आउट गर्दै इंग्ल्यान्डलाई महत्वपूर्ण सफलता दिलाए । रुटले २५ बलमा ४ चौका प्रहार गरे ।

भारतलाई तीव्र गतिका बलर जस्प्रित बुमराहले चौथो ओभरमा दुबै ओपनरलाई आउट गराउँदै राम्रो सुरुवात दिलाएका थिए । चौथो ओभरको दोस्रो बलमा ओपनर रोरी बन्र्सलाई पाँच रनमा बोल्ड आउट गरेका थिए । अन्तिम बलमा हसिब हमिदलाई शून्यमा पन्तबाट क्याच आउट गराउँदा इंग्ल्यान्ड ६९२ को कमजोर अवस्थामा पुगेको थियो ।

भारतका उमेश यादवले सर्वाधिक तीन विकेट लिए । जस्प्रित बुमराह र रविन्द्र जडेजाले दुई दुई विकेट लिए । मोहम्मद शिराज र शार्दूल ठाकुरको नाममा एक एक विकेट रह्यो ।

त्यसअघि लन्डनमा टस हारेर ब्याटिङको निम्तो पाएको भारत ६१.३ ओभरमा १ सय ९१ रनमा अल आउट भएको थियो । भारतका लागि शार्दूल ठाकुरले टेस्टमा पूनरागमन गर्दै सर्वाधिक ५७ रनको योगदान दिए । तल्लोक्रममा आक्रामक ब्याटिङ गर्दै शार्दूले ३६ बलमा ७ चौका र ३ छक्का प्रहार गरे । एक समय १२७–७ को अवस्थामा पुगेको भारतलाई शार्दूलले आक्रमक ब्याटिङ गर्दै केहि इनिङ उकासेका थिए ।

शार्दूल ६१ औं ओभरको अन्तिम बलमा क्रिस वोक्सको एलबीडब्लू आउटको धरापमा परे । कप्तान विराट कोहलीले ९६ बलमा ८ चौका सहित ५० रनको योगदान दिए । इंग्ल्यान्डको टेस्ट टोलीमा चोटपछि पूनरागमन गर्दै तीव्र गतिका बलर क्रिस वोक्सले नवौं ओभरको अन्तिम बलमा ओपनर रोहित शर्मालाई विकेटकिपर जोनी बेयरस्टोबाट ११ रनमा क्याच आउट गराएका थिए ।

ओली रोबिन्सनले लोकेश राहुललाई १४ रनमा एलबीडब्लू आउट गरेका थिए । खराब लयबाट गुज्रिएका चेतेश्वर पुजारा जेम्श एन्डरसनको बलमा चार रनमा बेयरस्टोबाट क्याच आउट भए । रविन्द्र जडेजा ३४ बलमा २ चौका सहित सहित वोक्सको बलमा रुटबाट १० रनमा क्याच आउट भए । अजिक्या रहाणे चौथो टेस्टमा पनि चल्न सकेनन् । रहाणेलाई क्रेग ओभरटनले माईन अलीबाट १४ रनमा क्याच आउट गराए ।

वोक्सले विकेटकिपर ऋषभ पन्तलाई ९ रनमा अलीबाट क्याच गराउँदा भारत ५३ ओभरमा १२७–७ को कमजोर अवस्थामा पुगेको थियो ।
त्यसपछि शार्दूले इनिङ उकासेका थिए । शार्दूल आउट भएपछि भारतले एक रन मात्र जोड्न सक्यो । इंग्ल्यान्डका तीव्र गतिका बलर क्रिस वोक्सले सर्वाधिक ४ विकेट लिए । ओली रोबिन्सन तीन, जेम्श एन्डरसन र क्रेग ओभरटनले एक एक विकेट लिए । शतकीय इनिङ खेलेका रोहित प्लेयर अफ द म्याच चुनिए ।

भारतले टेस्टमा द ओभलमा सन् १९७१ पछि जित हात पारेको हो । पहिलो टेस्ट बराबरीमा सकिएको थियो । दोस्रो खेलमा भारत १ सय ५१ रनले विजयी हुँदा तेस्रो खेलमा ७६ रनको इनिङ अन्तरले पराजित भएको थियो । पाँचौ तथा निर्णायक खेल शुक्रबारदेखि म्यानचेस्टरमा हुने छ ।