काठमाडौं (हाम्रो खेलकुद) – नेपालले आज पपुवा न्युगिनी (पिएनजी) सँग पहिलो ओडिआई खेल खेल्दैछ । खेल नेपाली समय अनुसार बिहान ११:१५ मा अल अमरेत क्रिकेट मैदान ओमानमा सुुरु हुनेछ ।

नेपालको ओपनर जोडीमा आसिफ शेख र कुशल भर्तेल रहने लगभग निश्चित छ । कुशल र आसिफ शेखले वैशाखमा टि२० आई त्रिकोणात्मक सिरिजमा सर्वोत्कृष्ट प्रदर्शन गरेको हुँदा ओडिआईमा निरन्तरता दिने छ । उक्त सिरिजमा कुशलले ५ खेलमा ४ मा अर्धशतक सहित सनसनी मच्चाएका थिए । उनी डेब्यूको सुरुवाती तीन खेलमा लगातार अर्धशतक प्रहार गर्ने टि२० आईको पहिलो खेलाडी हुन् । आसिफ र कुशलले सुरुवाती दुई खेलमा लगातार शतकीय साझेदारी गर्दै विश्व कीर्तिमान कायम गरेका थिए ।

कुशलको भूमिका पावर प्लेमा आक्रामक रुपमा रन जोड्ने हुन सक्छ । आसिफले एकतर्फबाट सम्हालिएर इनिङलाई अघि बढाउने भूमिका निर्वाह गर्नसक्छन् । ब्याटिङमा पुनः हाबी हुन खोजेको नेपाल यी दुई ओपनरबाट उच्च प्रदर्शन चाहन्छ । यी दुबैले नेपालका लागि ओडिआई शैलीमा डेब्यू गर्ने छन् । आसिफ र कुशलबाट टिम, समर्थक र सुभचिन्तक उत्कृष्ट प्रदर्शनको अपेक्षा गरेका छन् ।

ज्ञानेन्द्र मल्ल, दीपेन्द्रसिंह ऐरी र शरद भेषावकर मध्यक्रममा खेल्ने छन् । दीपेन्द्रलाई अभ्यासको क्रममा चोट लागेको कारण खेल्ने वा नखेल्ने अनिश्चित छ । चोट सामान्य रहेपनि नेपालले उनलाई विश्राम दिने सम्भावना छ । ज्ञानेन्द्र र शरद प्रमुख ब्याट्सम्यान हुन् । अनुभवी यी दुई ब्याट्सम्यानलाई जिम्मेवारीको साथ प्रदर्शन गर्नुपर्ने हुन्छ ।

कमजोर सुरुवात गरेको खण्डमा सम्हालेर अघि बढ्नुपर्ने जिम्मेवारी शरद र ज्ञानेन्द्रको काँधमा छ । दीपेन्द्र फिट नहुँदा आरिफ शेख खेल्ने सम्भावना छ । भरपर्दा युवा ब्याट्सम्यान आरिफ मध्य गतिका पार्टटाइम अलराउन्डरको राम्रो विकल्प हुन् । दीपेन्द्र पूर्णरुपमा फिट नहुँदा आरिफको सम्भावना बढी छ ।

युवा बाँया हाते कुशल मल्ल अलराउन्डरको रुपमा खेल्ने छन् । आक्रामक ब्याटिङको लागि चर्चित युवा स्टार कुशललाई नेपालले छैटौं नम्बरमा ब्याटिङ गराउने सम्भावना छ । कुशल ठूला सर्ट खेल्न रुचाउँछन् । कुशल ओडिआई र टि२० आई दुबैमा कम उमेरमा अर्धशतक प्रहार गर्ने कीर्तिमान छ । आबूधाबी टि१० लिगको अनुभव बटुली सकेका कुशलबाट टोली आक्रामक ब्याटिङ चाहन्छ ।

सोमपाल कामी र करण केसी नेपालका पहिलो रोजाईका तीव्र गतिका बलर हुन् । यी दुबै खेलाडीले ब्याटिङ मार्फत पनि खेल जिताउन सक्छन् । यी दुबै अलराउन्डर मानिन्छन् । पिच स्पिनर र तीव्र गतिका बलर दुबैलाई राम्रो सहयोग गरि रहेको छ । तेस्रो तीव्र गतिका बलरमा गुलशन झाले डेब्यू गर्ने सम्भावना छ ।

गुशलन बाउन्सर र तीव्र गतिमा छोटो समयै प्रभावित पार्दै टोलीमा स्थान बनाएका हुन् । गुलशन पिएनजीका खेलाडीलाई बाउन्सरले दबाबमा राख्न सक्छन् । आरिफले पार्टटामको रुपमा तीव्र गतिको युनिटलाई साथ दिने सम्भावना छ ।

नेपालको प्रमुख स्पिनरमा सन्दीप लामिछाने मात्र खेल्ने सम्भावना छ । टोलीले स्टार स्पिनर सन्दीपबाट उत्कृष्ट प्रदर्शनको अपेक्षा राखेको छ । कुशल मल्लले स्पिन आक्रामणमा सन्दीपलाई साथ दिने छन् । नेपालले समग्रमा ६ प्रमुख ब्याट्सम्यान, एक अलराउन्डर, तीन तीव्र गतिका बलर र एक स्पिनर प्लेइङ–११ मा मैदान उतार्ने सम्भावना छ ।

पिएनजीविरुद्ध नेपालको सम्भावित प्लेइङ–११ :

आसिफ शेख, कुशल भुर्तेल, ज्ञानेन्द्र मल्ल (कप्तान), आरिफ शेख, शरद भेषावकर, कुशल मल्ल, विनोद भण्डारी (विकेटकिपर), सोमपाल कामी, करण केसी, गुलशन झा र सन्दीप लामिछाने