काठमाडौं (हाम्रो खेलकुद)– नेपाली क्रिकेट टोलीका ओपनरद्वय आसिफ शेख र कुशल भुर्तेलसँगै तीव्र गतिका बलर विक्रम सोबले पपुवा न्युगिनीविरुद्ध सिनियर टोलीबाट लागि डेब्यू गरेका छन् ।

नेपालले पपुवा न्युगिनी (पिएनजी) विरुद्धको पहिलो खेलमा टस हारेर पहिला फिल्डिङ गर्ने भएको छ । अल अमरेत क्रिकेट मैदान ओमानमा पिएनजीका कप्तान असाद भालाले टस जितेर पहिला ब्याटिङ गर्ने निर्णय लिएका हुन् । दीपेन्द्रसिंह ऐरी पहिलो खेलमा टोलीमा छैनन् । नेपालले करण केसी, विनोद भण्डारी लगायतका खेलाडीलाई आराम दिएको छ ।

नेपालले आइसिसी विश्वकप लिग–२ अन्तर्गत ओमान र अमेरिकासँग त्रिकोणात्मक ओडिआई सिरिज खेल्नुअघि तयारी स्वरुप पिएनजीसँग दुई ओडिआई खेल खेल्न लागेको हो । पिएनजीसँग दुई ओडिआई खेलपछि नेपालको सम्पूर्ण तयारी पूरा हुने छ । नतिजाले वरीयता बाहेक अन्यमा खासै फरक नपर्ने हुँदा टोलीमा कुनै दबाब छैन । यो खेल कमजोरी पहिचान र सुधार गर्ने राम्रो अवसर हुने छ ।

तीव्र गतिका बलर विक्रम सोब यसअघि नेपाली टोलीमा परेर पनि डेब्यू गर्न पाएका थिएनन् । विक्रम घरेलु प्रतियोगितामा राम्रो प्रदर्शनको साथ चार वर्षपछि पूनरागमन गरेका थिए । आइसिसी विश्व क्रिकेट लिग च्याम्पियनशिप २०१५–१७ अन्तर्गत २०१६ मा उनी नेदरल्यान्ड्स भ्रमण गरेका थिए । २०१७ मा विक्रम यूएई भ्रमणमा गएका थिए । तर खेल्ने मौका पाएनन् ।

गत माघमा त्रिभुवन आर्मी क्लबलाई प्रधानमन्त्री कप उपाधि दिलाउन विक्रमले उत्कृष्ट प्रदर्शन गरेका थिए । २९ वर्षिय विक्रम तल्लोक्रममा ब्याटिङको क्षमता पनि राख्छन् । पहिलो खेलमा अभिनाश बोहरा र करण केसीलाई विश्राम दिएपछि उनले डेब्यूको मौका पाएका हुन् ।

नेपालले १९ महिनापछि ओडिआई खेल खेल्न लागेको हो । पिएनजी सोमबार अमेरिकासँग ७ विकेटले पराजित भएको थियो । पछिल्लो पटक नेपालले ओडिआई २०२० फेब्रुअरीमा नेपालले आइसिसी विश्वकप लिग–२ अन्तर्गत अमेरिकासँग टियु मैदानमा खेलेको थियो । त्यसपछि नेपालले पहिलो पटक ओडिआई खेल खेल्न लागेको हो । वैशाखमा नेपालले मलेसिया र नेदरल्यान्ड्सँग टि२० आई त्रिकोणात्मक सिरिजमा सानदार ब्याटिङ गर्दै उपाधि जितेको थियो । सुरुवात दुई खेलमा सहज जित निकालेको नेपालले अन्तिम तीन खेलमा लगातार २ सय माथिको योगफल कटाएको थियो ।

ओडिआईमा नेपाल र पिएनजीबीच पहिलो पटक भिड्न लागेका हुन् । नेपालले अन्तिम पटक २०१८ मा आइसिसी विश्वकप ग्लोबल छनोटको निर्णायक खेलमा पिएनजीलाई ६ विकेटले हराउँदै ओडिआई मान्यता पाएको थियो । आइसिसी विश्व क्रिकेट लिग च्याम्पियनसिप अन्तर्गत नेपाल २०१५ मा पिएनजीसँग दुबै खेलमा पराजित भएको थियो । त्यसैवर्ष नेपाल टि२० विश्वकपको ग्लोबल छनोटमा पनि पिएनजीसाँग पराजित भएको थियो ।

विश्व ओडिआई वरीयतामा नेपाल १६ औं र पिएनजी पुछारमा २० औं स्थानमा छ । आइसीसी विश्वकप लिग–२ मा नेपालले चार खेलमा समान दुई मा जित र हार बेहोरेको छ । पिएनजीले ८ खेल खेल्द सबैमा पराजित भएको छ ।

नेपालको टोली : ज्ञानेन्द्र मल्ल(कप्तान) कुशल भुर्तेल, आसिफ शेख(विकेटकिपर), आरिफ शेख, शरद भेषावकर, रोहित कुमार पौडेल, कुशल मल्ल, सोमपाल कामी, पवन सरार्फ, विक्रम सोब र सन्दीप लामिछाने ।