काठमाडौं (हाम्रो खेलकुद) – नेपाली क्रिकेट टोलीका तीव्र गतिका बलर विक्रम सोबले पपुवा न्युगिनीविरुद्ध ओडिआई डेब्यूको पहिलो बलमै विकेट लिँदै सानदार सुरुवात गरेका छन् ।

विक्रमले दोस्रो ओभरको पहिलो बलमै ओपनर टोनी उरालाई एक रनमा बोल्ड आउट गरे । पिएनजीका प्रमुख ब्याट्सम्यान उरालाई आउट गर्दै विक्रमले डेब्यूको पहिलो बलमै विकेट लिएका हुन् । विक्रम यो सफलता हासिल गर्ने पहिलो नेपाली खेलाडी हुन् । विश्व क्रिकेटमा भने यसअघि २७ खेलाडीले यो उपलब्धि हासिल गरेका छन् ।

पहिलो ओभर विक्रमले विकेट मेडन राख्दै सानदार सुरुवात गरेका छन् । पहिलो बलमा विकेट लिएका सोबले त्यसपछिका पाँच बल कप्तान असाद भालालाई डट राखेका थिए ।

अल अमरेत क्रिकेट मैदान ओमानमा टस जितेर ब्याटिङ रोजेको पिएनजीले सुरुवाती दुई ओभरमा एक विकेट गुमाउँदै रन बनाएको छ । ओपनर लेगा सयाका एक र कप्तान असाद भाला क्रिजमा छन् ।

नेपालले आइसिसी विश्वकप लिग–२ अन्तर्गत ओमान र अमेरिकासँग त्रिकोणात्मक ओडिआई सिरिज खेल्नुअघि तयारी स्वरुप पिएनजीसँग दुई ओडिआई खेल खेल्न लागेको हो । तीव्र गतिका बलर विक्रम सोब यसअघि नेपाली टोलीमा परेर पनि डेब्यू गर्न पाएका थिएनन् । विक्रम घरेलु प्रतियोगितामा राम्रो प्रदर्शनको साथ चार वर्षपछि पूनरागमन गरेका थिए । आइसिसी विश्व क्रिकेट लिग च्याम्पियनशिप २०१५–१७ अन्तर्गत २०१६ मा उनी नेदरल्यान्ड्स भ्रमण गरेका थिए । २०१७ मा विक्रम यूएई भ्रमणमा गएका थिए । तर खेल्ने मौका पाएनन् ।

गत माघमा त्रिभुवन आर्मी क्लबलाई प्रधानमन्त्री कप उपाधि दिलाउन विक्रमले उत्कृष्ट प्रदर्शन गरेका थिए । २९ वर्षिय विक्रम तल्लोक्रममा ब्याटिङको क्षमता पनि राख्छन् । पहिलो खेलमा अभिनाश बोहरा र करण केसीलाई विश्राम दिएपछि उनले डेब्यूको मौका पाएका हुन् । ओपनर कुशल भुर्तेल र आसिफ शेखले ओडिआईमा डेब्यू गरेका छन् ।

नेपालको टोली : ज्ञानेन्द्र मल्ल(कप्तान) कुशल भुर्तेल, आसिफ शेख(विकेटकिपर), आरिफ शेख, शरद भेषावकर, रोहित कुमार पौडेल, कुशल मल्ल, सोमपाल कामी, पवन सरार्फ, विक्रम सोब र सन्दीप लामिछाने ।