एजेन्सी – बंगलादेशले न्युजिल्यान्डविरुद्ध टि२० आई इतिहासकै पहिलो सिरिज जितेको छ । चौथो टि२० आई खेलमा घरेलु टोली बंगलादेशले न्युजिल्यान्डलाई ६ विकेटले हराउँदै पाँच खेलको सिरिज एक खेल अगावै ३–१ ले जितेको हो ।

सामान्य ९४ रनको विजयी लक्ष्य पछ्याएको बंगलादेशले १९.१ ओभरमा ४ विकेटको क्षतिमा पूरा गर्यो । बंगलादेशका कप्तान महमुदूल्लाह रियाद ४८ बलमा १ चौका र २ छक्का सहित ४३ रनमा अविजित रहे । ओपनर मोहम्मद नईम ३५ बलमा १ चौका र १ छक्का सहित २९ रन बनाउँदै रन आउट भए । लिटन दास ६, सकिब अल हसन ८ र मुश्फिकुर रहिम शून्यमा आउट भए । न्युजिल्यान्डका स्पिनर अजाज पटेलले सर्वाधिक दुई विकेट लिए । कोले म्याकोन्चीले एक विकेट लिए ।

त्यसअघि शेरे बंगला राष्ट्रिय मैदानमा टस जितेर ब्याटिङ रोजेको न्युजिल्यान्ड १९.३ ओभरमा ९३ रनमा अल आउट भयो । न्युजिल्यान्डका विल योंगले ४८ बलमा ५ चौका र १ छक्का सहित सर्वाधिक ४६ रनको योगदान दिए । कप्तान टम लाथम २६ बलमा १ चौका सहित २१ रन बनाए । फिन एलेन ८ बलमा १ छक्का सहित १२ रनमा आउट भए । न्युजिल्यान्डका ८ खेलाडीले दोहोरो अंकमा रन बनाउन सकेनन् । जसमा चार खेलाडीले खाता खोल्न सकेनन् ।

बंगलादेशका स्पिनर नासुम अहमदल ४ ओभरमा २ मेडन सहित १० रन खर्चेर ४ विकेट लिए । तीव्र गतिका बलर मुस्ताफिजुर रहमानले ३.३ ओभरमा १२ रन खर्चेर ४ विकेट लिए । माहदी हसन र मोहम्मद सैफउद्दिनले एक एक विकेट लिए । बंगलादेश पहिलो र दोस्रो खेलमा ७ विकेट र ४ रनले विजयी भएको थियो । तेस्रो खेलमा न्युजिल्यान्ड ५२ रनले विजयी भएको थियो । पाँचौ तथा अन्तिम खेल शुक्रबार हुने छ ।