काठमाडौं (हाम्रो खेलकुद) – नेपालले शुक्रबार राती दोस्रो तथा ऐतिहासिक डे नाइट ओडिआई खेलमा पपुवा न्युगिनीमाथि १ सय ५१ रनको कीर्तिमानी जित हात पारेको छ ।

आइसिसी विश्वकप लिग–२ अन्तर्गत ओमान र अमेरिकासँग त्रिकोणात्मक ओडिआई सिरिजको तयारीको लागि नेपालले पपुवा न्युगिनीसँग दुई खेल खेलेको हो । पहिलो खेलमा २ विकेटको जित हासिल गरेको नेपालले सिरिज २–० ले जितेको थियो । दुबै खेलमा जित निकालेको नेपाली टोली उच्च मनोबलका साथ विश्वकप लिग–२ मा अमेरिका र ओमानसँग खेल्नेछ ।

शुक्रबार दोस्रो खेलमा जितको लागि २ सय ३४ रनको विजयी लक्ष्य पछ्याएको पिएनजी १९.१ ओभरमा ८२ रनमा अल आउट भयो । नेपालको घातक बलिङ सामू पिएनजीका ६ खेलाडीले दोहोरो अंकमा रन बनाउन सकेनन् । ओपनर टोनी उराले सर्वाधिक १९ रन बनाएका थिए । नेपालका सन्दीप लामिछानेले ५.१ ओभरमा ११ रन खर्चेर ६ विकेट लिए ।

त्यसअघि अल अमरेत क्रिकेट मैदानमा टस जितेर पहिला ब्याटिङ रोजेको नेपाल ४९.३ ओभरमा २ सय ३३ रनमा अल आउट भएको थियो । नेपालका लागि रोहित कुमार पौडेलले १ सय २३ बलमा २ चौका र ३ छक्का सहित सर्वाधिक ८६ रनको इनिङ खेलेका थिए । कप्तान ज्ञानेन्द्र मल्ल ४५ र करण केसीले ४२ रनको योगदान दिएका थिए ।

पहिलो खेलमा १ सय ३५ रनको विजयी लक्ष्य पछ्याउन संघर्ष गरेको नेपालले ब्याटिङमा सुधार गरेको थियो । दोस्रो खेलमा पनि रोहितको प्रदर्शन महत्वपूर्ण रह्यो । पिएनजीसँगको दोस्रो खेलमा नेपाली क्रिकेटमा देखिएका तीन सकारात्मक पक्ष यस प्रकार रहे ।

३. टस जितेर ब्याटिङ

टस जितेर ब्याटिङ रोज्ने नेपालको एक सकरात्मक लक्ष्य थियो । ब्याटिङ नेपालको कमजोरीमा पर्दछ । बलिङ नेपालको मुख्य हतियार हो । पहिलो खेलमा संघर्षपूर्ण ब्याटिङ गरेको थियो । पहिला ब्याटिङ गरेपछि स्कोर बोर्डको दबाब हुँदैन । अर्कोतर्फ पिएनजीसँगको खेल नेपालले आइसिसी विश्वकप लिग–२ अन्तर्गत ओमान र अमेरिकासँग तयारी लागि हो ।

उक्त त्रिकोणात्मक सिरिजमा नेपालले पहिला ब्याटिङ गर्नुपर्ने हुन्छ । त्यसको राम्रो तयारी गरेको छ । नेपालले पहिला टस जितेर ब्याटिङ गर्दा पराजित भएको भएपनि खासै फरक पर्ने थिएन । किनभने यो नेपाली खेलाडीको कमजोरी सुधार गर्ने राम्रो र अन्तिम अवसर थियो ।

२. रोहितलाई माथि खेलाउने निर्णय

पहिलो खेलमा नेपालको जितका नायक रोहित कुमार पौडेल थिए । उनको ४१ रनको सहयोगमा नेपालले कठिन जित हात पारेको थियो । दोस्रो खेलमा नेपालले रोहितलाई माथि खेलाउने निर्णय लिएको थियो । पहिलो खेलमा रोहितले छैटौं नम्बरमा ब्याटिङ गरेका थिए । दोस्रो खेलमा नेपालले शरद भेषावकर र आरिफ शेखलाई विश्राम दिँदा चौथो नम्बरमा खेलाउने निर्णय सहि सावित गरे ।

रोहितले तल्लोक्रममा राम्रो प्रदर्शन गर्दै आएका छन् । कुनैपनि खेलाडी तल्लोक्रममा खेलेर राम्रो ब्याट्सम्यान बन्न सक्दैन । त्यसको लागि माथिनै खेल्ने अवसर पाउनु पर्छ । रोहितले पाएको जिम्मेवारी भरपूर्ण सदुपयोग पनि गरे । रोहितलाई माथि ल्याउने निर्णय नेपालको एक सकरात्मक पक्ष थियो ।

१. सन्दीपको उच्च लय

ओमान र अमेरिकासँग खेल्नु अघि सन्दीपको उच्च लय नेपालको सर्वाधिक ठूलो सकरात्मक पक्ष हो । सन्दीपले नेपालबाट लगातार उत्कृष्ट प्रदर्शन गर्दै आएका छन् । पिएनजीसँगको पहिलो खेलमा चार विकेट लिएका सन्दीपले दोस्रो खेलमा ६ विकेट लिएका थिए । सन्दीप नेपाली टोलीमा प्रमुख हतियार हुन् । उनको प्रदर्शन नेपालका लागि निकै महत्वपूर्ण हुने गर्दछ । अमेरिका र ओमानसँग खेल्नुअघि उनको लय नेपाली क्रिकेटका लागि सकरात्मक पक्ष देखिन्छ ।