एजेन्सी – श्रीलंकाले सर्वाधिक सफल तीव्र गातिका लासिथ मलिङ्गालाई बाहिर राख्दै अर्को महिना संयुक्त अरव इमिरेट्स (युएइ) र ओमानमा हुने टि२० विश्वकपको लागि टोली घोषणा गरेको छ । दासुन शनाका कप्तानीमा श्रीलंकाले अन्तिम टोली घोषणा गरेको हो ।

श्रीलंका तथा टि२० क्रिकेटकै सर्वाधिक तीव्र गतिका बलर लासिथ मलिङ्गा विश्वकप टोलीमा छैनन् । मलिङ्गा गत वर्ष मार्चमा वेस्टइन्डिजसँगको टि२० सिरिजपछि टोलीमा छैनन् ।

मलिङ्गा टि२० शैलीकै सर्वोत्कृष्ट बलर हुन् । उनले आइपिएलमा १ सय ७० र टि२० आई १ सय ७ विकेट लिएका छन् । टि२० आईमा मलिङ्गा एक सय विकेट लिने पहिलो खेलाडी हुन् । सन् २०१४ मा श्रीलंकाले मलिङ्गाको कप्तानीमा पहिलो पटक टि२० विश्वकप उपाधि जितेको थियो । टि२० आईमा दुई पटक लगातार चार विकेट लिने मलिङ्गा एक्लो खेलाडी हुन् ।

३७ वर्षियले श्रीलंकाबाट ओडिआई, टेस्ट र फ्रेन्चाइज लिगबाट भने सन्न्यास लिई सकेका छन् । मलिङ्गाले टि२० विश्वकप खेल्दै आफ्नो क्रिकेट करिअरबाट बिट मार्न चाहेको केहि महिना अघि बताएका थिए ।

श्रीलंका टोलीमा अनुभवी कुशल परेरा र दीनेश चान्डिमल टोलीमा छन् । युवा स्पिनर महेश थेक्शनाले टोलीमा स्थान बनाएका छन् । उनले श्रीलंकाबाट शुक्रबार मात्र टि२० आईमा डेब्यू गरेका थिए । श्रीलंका पहिलो चरणको समूह ए मा छ । श्रीलंकासँगै आयरल्यान्ड, नेदरल्यान्ड्स र नामिबिया छन् । श्रीलंकाले पहिलो खेल नामिबियाले अक्टोबर १८ मा खेल्ने छ । श्रीलंकाले अक्टोबर २० मा आयरल्यान्ड र अक्टोबर २२ मा नेदरल्यान्ड्ससँग खेल्ने छ । शीर्ष दुईमा रहन सके सुपर १२ मा स्थान बनाउने छ ।

श्रीलंका टोली : दासुन शनका (कप्तान), धनन्जय डि सिल्भा, कुसल पेरेरा, दीनेश चान्डिमल, अविष्का फनान्डो, भानुका राजपक्षे, चरिथ असालका, वानिन्दु हसरंगा, कामिन्दु मेन्डिस, चामिका करुणारत्ने, नुवान प्रदीप, दुश्मन्था चामिरा, प्रवीन जयविक्रमा, लाहिरु मादुशंका र महेश थेक्शेना ।

वैकल्पिक खेलाडी : लाहिरु कुमारा, बिनुरा फनान्डो, अकिला धनन्जय र पुलना थरंगा

टि२० विश्वकपमा समूह चरण :

पहिलो चरण :

समूह ए : नेदरल्यान्ड्स, आयरल्यान्ड, नामिबिया र श्रीलंका

समूह बी : ओमान, पिएनजी, बंगलादेश र स्टकल्यान्ड

सुपर १२ :

समूह ए : इंग्ल्यान्ड, वेस्टइन्डिज, दक्षिण अफ्रिका, अष्ट्रेलिया, पहिलो चरणको समूह ए को विजेता र समूह बी को उपविजेता ।

समूह बी : भारत, पाकिस्तान, अफगानिस्तान, न्युजिल्यान्ड, पहिलो चरणको समूह बी को विजेता र समूह ए को उपविजेता ।