काठमाडौं (हाम्रो खेलकुद) – नेपालले आज आइसिसी विश्वकप लिग–२ त्रिकोणात्मक ओाडिआई सिरिज अन्तर्गत पहिलो खेलमा अमेरिकासँग खेल्दैछ । खेल नेपाली समय अनुसार दिउँसो ४ः१५ पछि ओमानको अल अमरेत क्रिकेट मैदान मस्कटमा सुरु हुनेछ ।

ओमान भ्रमणमा रहेको नेपालले तयारी स्वरुप पपुवा न्युगिनी (पिएनजी) सँगको दुबै खेल जितेको हुँदा उच्च मनोबल छ । नेपालको मुख्य कमजोरी ब्याटिङ हो । त्यसैले नेपालले आफ्नो टिम सन्तुलनमा विशेष ध्यान दिँदै ब्याटिङ मजबुत बनाउन प्रयास गर्ने छ ।

नेपालको ओपनिङ आसिफ शेख र कुशल भुर्तेलले नै गर्नेछन् । पिएनजीसँगको दोस्रो खेलमा दुवै ओपनर तीन तीन रनमा आउट भएका थिए । पहिलो खेलमा आसिफ ३० र कुशल १५ रनमा आउट भएका थिए । वैशाखमा भएको त्रिकोणात्मक टि२० सिरिजमा सर्वोत्कृष्ट प्रदर्शन गरेका यी दुई ओपनरबाट नेपालले ठूलो आशा र विश्वास राखेको छ ।

ओमान भ्रमणमा आसिफ र कुशलनै नेपालको पहिलो रोजाईका ओपनर हुन् । आसिफ र कुशल दुबैको भूमिका फरक हुन सक्छ । आसिफ संयमितका साथ इनिङलाई सम्हाल्दै अघि बढाउने भूमिका पाउन सक्छन् । कुशल आक्रामकका साथ पावरप्लेमा रन जोड्ने हुन सक्छ । दुबैलाई राम्रो प्रदर्शनको मनोबल दबाब पनि छ ।

कप्तान ज्ञानेन्द्र मल्ल तेस्रो नम्बरमा खेल्ने छन् । पिएनजीसँगको दोस्रो खेलमा ज्ञानेन्द्र ४५ रन बनाउँदै आउट भएका थिए । ज्ञानेन्द्र राम्रो प्रदर्शन गर्न नसकेको भन्दै आलोचित हुँदै आएका छन् । सुरुवातपछि ठूलो इनिङमा बदल्न सकि रहेका छैनन् । चौथो नम्बरमा नेपालले रोहित कुमार पौडेललाईनै निरन्तरता दिन सक्छ । रोहित राम्रो लयमा छन् ।

पिएनजीविरुद्ध संघर्षपूर्ण २ विकेटको जित हात पार्न रोहितले छैटौं नम्बरमा ब्याटिङ गर्दै ४१ रन जोडेका थिए । दोस्रो खेलमा चौथो नम्बरमा ब्याटिङ गर्दै रोहितले ८६ रनको इनिङ खेलेका थिए । त्यसैले रोहितलाई चौथो नम्बरमानै निरन्तरता दिने सम्भावना छ ।

पिएनजीसँगको दोस्रो खेलमा नेपालले शरद भेषावकर, आरिफ शेख र पवन सरार्फलाई बेन्चमा राखेको थियो । अमेरिकाविरुद्ध अनुभवी ब्याट्सम्यान शरदलाई खेलाउने सम्भावना छ । नेपाली टोलीमा युवाको बाहुल्यता हुँदा शरदलाई टिममा राख्दै थप सन्तुलित बनाउन सक्छ ।

शरद अनुभवी खेलाडी हुँदा खराब सुरुवात र दबाबमा आफ्नो अनुभवको फाइदा उठाउन सक्छन् । शरदलाई मौका दिन विनोद भण्डारी सुशान भारी र विक्रम सोब मध्य एकलाई बेन्चमा राख्नुपर्ने हुन्छ । लेग स्पिनर सन्दीप लामिछानेले उत्कृष्ट प्रदर्शन गरि रहेको हुँदा भारीलाई बेन्चमा राख्ने सम्भावना छ ।

युवा अलराउन्डर कुशल मल्ललाई जिम्मेवारी प्रदर्शनको आवश्यक छ । दुबै खेलमा कुशल एक रनमा आउट भएका छन् । कमजोर प्रदर्शनमा उनको खराब सर्ट छनोट रहेको छ । तर टोलीका प्रमुख अलराउन्डर हुन् । उनलाई नेपालले खेलमा विश्वास देखाउने छ । सन्दीपलाई स्पिन आक्रामणमा कुशलले साथ दिने छन् ।

विनोद भण्डारीलाई सातौं नम्बरमा नेपालले खेलाउँदै ब्याटिङमा गहिराई र मजबुत बनाउन सक्छ । पिएनजीसँगको दोस्रो खेलमा विनोद १७ रनमा रन आउट भएका थिए । विनोद विकेटकिपरको रुपमा खेल्ने देखिन्छ ।

सोमपाल कामी र करण केसी पहिलो रोजाईका बलिङ अलराउन्डर हुन् । तल्लोक्रममा यी दुई ब्याट्सम्यान राम्रो प्रदर्शन गर्ने गर्दछन् । करण ठूला सर्ट प्रहार गर्न माहिर छन् । पिएनजीसँग करणले २६ बलमा ४ छक्का सहित ४२ रन जोडेका थिए । करण र सोमपाल नायक बन्न सक्छन् । करण र सोमपाललाई तेस्रो तीव्र गतिका बलरको रुपमा विक्रम सोबलेनै मौका दिन सक्छन् । सोबले पिएनजीसँगको दुबै खेलमा राम्रो प्रभाव छाडेका थिए ।

सोबको विकल्पको रुपमा अभिनाश बोहरा र गुलशन झा छन् । गुलशनलाई सरप्राइज रुपमा प्रयोग गर्न सक्छ । तर गुलशनको फिटनेशको कारण त्यो सम्भावना कम छ । सन्दीप नेपालका प्रमुख हतियार र स्पिनर हुन् । पिएनजीसँगको पहिलो खेलमा ४ र दोस्रो खेलमा ६ विकेट लिएका सन्दीप अमेरिकालाई पुन घातक हुन सक्छन् । गतवर्ष अमेरिकालाई ३५ रनमा अल आउट गर्न सन्दीपले ६ विकेट लिएका थिए ।

ब्याटिङ मजबुत बनाउन नेपालले चार मात्र प्रमुख बलर खेलाउन सक्छ । अर्कोतर्फ नेपालले विनोदलाई बेन्चमा राख्दै पाँच प्रमुख बलर मैदान उतार्न पनि सक्छ । पिच अवस्थामा बढी निर्भर पर्ने छ । कुशल अलराउन्डरको राम्रो विकल्प हुन् । शरद पनि राम्रो स्पिन गर्ने गर्दछन् । ज्ञानेन्द्र र रोहित पनि आवश्यक परे पार्टटाइमको विकल्प हुन सक्छन् । नेपाललाई प्लेइङ-११ छनोट गर्न सहज हुने छैन । पछिल्लो खेलमा पिएनजीविरुद्ध सानदार प्रदर्शन गरेको हुँदा टोलीमा फेरबदलको सम्भावना कम बनेको हो ।

नेपालको सम्भावित प्लेइङ ११ : ज्ञानेन्द्र मल्ल (कप्तान), कुशल भुर्तेल, आसिफ शेख, शरद भेषावकर, रोहित कुमार पौडेल, कुशल मल्ल, सोमपाल कामी, विनोद भण्डारी (विकेटकिपर) करण केसी, विक्रम सोब, सन्दीप लामिछाने ।