एजेन्सी – आइसिसी विश्वकप लिग–२ त्रिकोणात्मक ओडिआई सिरिजको पहिलो खेल नेपालसँग खेल्नुअघि अमेरिकालाई झड्का लागेको छ । अमेरिका मध्यक्रममा प्रमुख ब्याट्सम्यान आरोन जोन्स र तीव्र गतिका बलर जेसी सिंह चोटका कारण त्रिकोणात्मक सिरिजबाट बाहिरिएका छन् ।

जोन्सको बायाँ हात भाचिएको छ । जोन्स अमेरिका टोलीमा उपकप्तान समेत हुन् । सिंह साइड स्ट्रेनको कारण सिरिज गुमाउने भएका छन् । अमेरिकाले सिंहको स्थानमा तीव्र गतिका बलर काइल फिलिपलाई टोलीमा समेटेको छ । वेस्टइन्डिज मुलका फिलिपले अमेरिकाबाट ५ लिष्ट ए खेलमा ६ विकेट लिएका छन् । जोन्सको स्थानमा १८ वर्षिय युवा अलराउन्डर सन्जय कृष्णमुर्तीलाई टोलीमा राखेको जनाएको छ ।

फिलिप यसअघिनै अमेरिका टोलीसँगै थिए । कृष्णमुर्ती शुक्रबार अमेरिकाबाट ओमान पुगेका थिए । १८ वर्षिय कृष्णमुर्ती अमेरिका यू१९ प्रतियोगिता सर्वाधिक विकेट लिने बलर हुन् । उनले अमेरिका घरेलु क्रिकेटमा ब्याटिङमा पनि उत्कृष्ट प्रदर्शन गर्दै आएका छन् । अमेरिका घरेलु क्रिकेटमा ब्याटिङ र बलिङ दुबैमा उत्कृष्ट प्रदर्शनपछि १८ वर्षिय कृष्णमुर्तीर्ला टोलीमा समेटेको हो ।

जोन्स अमेरिका मध्यक्रममा प्रमुख ब्याट्सम्यान हुन् । जोन्सले अमेरिकाबाट १४ ओडिआईमा ३ अर्धशतक सहित कुल ४ सय ३८ रन बनाएका छन् । उत्कृष्ट प्रदर्शन ९५ रन छ । जोन्स नहुँदा मध्यक्रम ब्याटिङ कमजोर बन्न सक्छ । नेपाल र अमेरिकाबीचको पहिलो खेल आज दिउँसो ४ : १५ मा ओमानको अल अमरेत क्रिकेट मैदानमा सुरु हुने छ ।

अमेरिकाको टोली : सौरभ नेत्रावलकर (कप्तान), अभिषेक पराडकार, डोमिनिक रिखी, एल्मोर हचिन्सन, गजानन्द सिंह, जसकरण मल्होत्रा, करिमा गोरे, मोनाक पटेल, निसरग पटेल, नोशतुश केंजीगे, स्टिभ टेलर, सुशान्त मोदानी, सन्जय कृष्णमुर्ती, काइल पिलिप