काठमाडौं (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिजको पहिलो खेलमा अमेरिकाविरुद्ध राम्रो सुरुवात गरेको छ । अल अमरेत क्रिकेट मैदानमा टस जितेर पहिला ब्याटिङ थालेको अमेरिकाले सुरुवाती १० ओभरमा २ विकेट गुमाउँदै ४७ रन बनाएको छ ।

अमेरिका मोनाक पटेल १५ बलमा २ चौका सहित १५ रनमा अविजित छन् । अमेरिकालाई ओपनर स्टिभ टेलर र मोडानीले पहिलो विकेटका लागि ३.५ ओभरमा १७ रनको साझेदारी गर्दै सुरुवात दिलाएका थिए । तीव्र गतिका बलर विक्रम सोबको बलमा ओपनर तथा अमेरिका प्रमुख ब्याट्सम्यान टेलर एज लागेर सकेन्ड स्लिपमा कुशल भुर्तेलबाट १४ रनमा क्याच आउट हुन पुगेका थिए ।

टेलरले १७ बलमा १ चौका प्रहार गरे । १० औं ओभरको अन्तिम बलमा ओपनर सुशान्त मोडानीलाई स्पिनर सन्दीप लामिछानेले १६ रनमा एलबिडब्लू आउट गरे । मोडानीले २८ बलमा १ चौका प्रहार गरे । सन्दीपले आफ्नो पहिलो ओभरको अन्तिम बलमा विकेट लिँदै नेपाललाई दोस्रो सफलता दिलाएपछि राम्रो सुरुवात गरेको छ ।

नेपालको प्लेइङ ११ : ज्ञानेन्द्र मल्ल (कप्तान), कुशल भुर्तेल, आसिफ शेख, रोहित कुमार पौडेल, कुशल मल्ल, सोमपाल कामी, विनोद भण्डारी (विकेटकिपर) करण केसी, विक्रम सोब, सन्दीप लामिछाने र सुशान भारी ।