काठमाडौं (हाम्रो खेलकुद) – युवा अलराउन्डर कुशल मल्लले नेपाललाई आइसिसी विश्वकप लिग–२ त्रिकोणात्मक ओडिआई सिरिजको पहिलो खेलमा अमेरिकाविरुद्ध तेस्रो सफलता दिलाएका छन् । अल अमरेत क्रिकेट मैदानमा टस जितेर पहिला ब्याटिङ थालेको अमेरिकाले २४ ओभरमा ३ विकेट गुमाउँदै १ सय २ रन बनाएको छ ।

अमेरिका मोनांक पटेल ५३ बलमा ५ चौका सहित ४३ रनमा अविजित छन् । अमेरिकालाई ओपनर स्टिभ टेलर र मोडानीले पहिलो विकेटका लागि ३.५ ओभरमा १७ रनको साझेदारी गर्दै सुरुवात दिलाएका थिए । तीव्र गतिका बलर विक्रम सोबको बलमा ओपनर तथा अमेरिका प्रमुख ब्याट्सम्यान टेलर एज लागेर सकेन्ड स्लिपमा कुशल भुर्तेलबाट १४ रनमा क्याच आउट हुन पुगेका थिए ।

टेलरले १७ बलमा १ चौका प्रहार गरे । १० औं ओभरको अन्तिम बलमा ओपनर सुशान्त मोडानीलाई स्पिनर सन्दीप लामिछानेले १६ रनमा एलबिडब्लू आउट गरे । मोडानीले २८ बलमा १ चौका प्रहार गरे । तेस्रो विकेटको लागि मोनांक पटेल र निसर्ग पटेलले ४९ रनको साझेदारी गर्दैै नेपाललाई दबाबमा राखेका थिए ।

स्पिनर कुशल मल्लले २३ औं ओभरको तेस्रो बलमा निसर्ग पटेललाई २१ रनमा बोल्ड आउट गर्दै नेपाललाई तेस्रो सफलता दिलाएका छन् । पटेलले ३९ बलको सामना गर्दा बाउन्ड्री भने प्रहार गर्न सकेनन् । अमेरिकाले नेपाललाई सरप्राइज दिँदै तल्लोक्रमका ब्याट्सम्यान नास्टुश केंजोगेलाई पाँचौ नम्बरमा ब्याटिङमा पठाएको छ ।