काठमाडौं (हाम्रो खेलकुद) – अमेरिका विकेटकिपर ब्याट्सम्यान मोनांक पटेलले आइसिसी विश्वकप लिग–२ त्रिकोणात्मक ओडिआई सिरिज अन्तर्गत नेपालविरुद्ध अर्धशतक प्रहार गरेका छन् । अल अमरेत क्रिकेट मैदानमा टस जितेर पहिला ब्याटिङ थालेको अमेरिकाले २८ ओभरमा ३ विकेट गुमाउँदै १ सय १८ रन बनाएको छ ।

अमेरिका मोनांक पटेल ६५ बलमा ५ चौका सहित ५० रनमा अविजित छन् । भारतीय मुलका पटेलले ६४ बलमा आफ्नो ओडिआई करिअरको तेस्रो अर्धशतक पूरा गरे । पटेलले अमेरिका इनिङलाई सम्हाल्दै नेपाललाई दबाबमा राख्न खोजेका छन् । अमेरिकालाई ओपनर स्टिभ टेलर र मोडानीले पहिलो विकेटका लागि ३.५ ओभरमा १७ रनको साझेदारी गर्दै सुरुवात दिलाएका थिए । तीव्र गतिका बलर विक्रम सोबको बलमा ओपनर तथा अमेरिका प्रमुख ब्याट्सम्यान टेलर एज लागेर सकेन्ड स्लिपमा कुशल भुर्तेलबाट १४ रनमा क्याच आउट हुन पुगेका थिए । टेलरले १७ बलमा १ चौका प्रहार गरे ।

१० औं ओभरको अन्तिम बलमा ओपनर सुशान्त मोडानीलाई स्पिनर सन्दीप लामिछानेले १६ रनमा एलबिडब्लू आउट गरे । मोडानीले २८ बलमा १ चौका प्रहार गरे । तेस्रो विकेटको लागि मोनांक पटेल र निसर्ग पटेलले ४९ रनको साझेदारी गर्दैै नेपाललाई दबाबमा राखेका थिए ।
स्पिनर कुशल मल्लले निसर्ग पटेललाई २१ रनमा बोल्ड आउट गर्दै नेपाललाई तेस्रो सफलता दिलाएका छन् । पटेलले ३९ बलको सामना गर्दा बाउन्ड्री भने प्रहार गर्न सकेनन् ।