काठमाडौं (हाम्रो खेलकुद) – नेपालले आइसिसी विश्वकप लिग–२ त्रिकोणात्मक ओडिआई सिरिजको पहिलो खेलमा अमेरिकाविरुद्ध महत्वपूर्ण विकेट हात पारेको छ । अल अमरेत क्रिकेट मैदानमा टस जितेर पहिला ब्याटिङ थालेको अमेरिकाले ३८ ओभरमा ५ विकेट गुमाउँदै १ सय ५९ रन बनाएको छ ।

अमेरिका मोनांक पटेल ९४ बलमा ७ चौका र १ छक्का सहित ७७ रनमा अविजित छन् । पटेलले ६४ बलमा ओडिआई करिअरको तेस्रो अर्धशतक पूरा गरेका थिए । भारतीय मुलका विकेटकिपर ब्याट्सम्यान जसकरण मल्होत्रा नेपालसँगको खेलमा सस्तैमा आउट भएका छन् । मल्होत्रालाई स्पिनर सुशान भारीले ११ रनमा कुशल भुर्तेलबाट क्याच गराउँदै नेपाललाई महत्वपूर्ण सफलता दिलाएका हुन् ।

मल्होत्राले पिएनजीसँग दोस्रो ओडिआई खेलमा १ सय २४ बलमा ४ चौका र १६ छक्का सहित १ सय ७३ रनको अविजित इनिङ खेलेका थिए । उनी टिक्नु नेपालको लागि घातक बन्न सक्थ्यो । उक्त इनिङ खेल्नेक्रममा उनले ६ बलमा लगातार ६ छक्का प्रहार गरेका थिए । अमेरिकालाई ओपनर स्टिभ टेलर र मोडानीले पहिलो विकेटका लागि ३.५ ओभरमा १७ रनको साझेदारी गर्दै सुरुवात दिलाएका थिए । तीव्र गतिका बलर विक्रम सोबको बलमा ओपनर तथा अमेरिका प्रमुख ब्याट्सम्यान टेलर एज लागेर सकेन्ड स्लिपमा कुशल भुर्तेलबाट १४ रनमा क्याच आउट हुन पुगे । टेलरले १७ बलमा १ चौका प्रहार गरे ।

१० औं ओभरको अन्तिम बलमा ओपनर सुशान्त मोडानीलाई स्पिनर सन्दीप लामिछानेले १६ रनमा एलबिडब्लू आउट गरे । मोडानीले २८ बलमा १ चौका प्रहार गरे । तेस्रो विकेटको लागि मोनांक पटेल र निसर्ग पटेलले ४९ रनको साझेदारी गर्दैै नेपाललाई दबाबमा राखेका थिए ।
स्पिनर कुशल मल्लले निसर्ग पटेललाई २१ रनमा बोल्ड आउट गर्दै नेपाललाई तेस्रो सफलता दिलाएका छन् ।

पटेलले ३९ बलको सामना गर्दा बाउन्ड्री भने प्रहार गर्न सकेनन् । अमेरिकाले नेपाललाई सरप्राइज दिँदै तल्लोक्रमका ब्याट्सम्यान नास्टुश केंजोगेलाई पाँचौ नम्बरमा ब्याटिङमा पठाएको थियो । उनी १३ रनमा आउट भए ।