काठमाडौं (हाम्रो खेलकुद) – ओपनर आसिफ शेख र कुशल भुर्तेलको कीर्तिमानी साझेदारीमा नेपालले आइसिसी विश्वकप लिग–२ अन्तर्गत त्रिकोणात्मक ओडिआई सिरिजको पहिलो खेलमा अमेरिकाविरुद्ध ब्याटिङतर्फ सानदार सुरुवात गरेको छ ।

अमेरिकाले प्रस्तुत गरेको २ सय ३१ रनको विजयी लक्ष्य पछ्याएको नेपालले १३ ओभरमा कुनै विकेट नगुमाउँदै ६२ रन बनाएको छ । कुशल भुर्तेल ४० बलमा २ चौका र १ छक्का सहित ३७रनमा अविजित छन् । आसिफ शेख ३९ बलमा २ चौका सहित २२ रनमा खेलि रहेका छन् । पहिलो विकेटका लागि आसिफ र कुशलले ६२ रनको साझेदारी गरि सकेका छन् । नेपालको ओडिआई क्रिकेट इतिहासमा ओपनरले पहिलो विकेटका लागि गरेको यो हालसम्मकै उच्च साझेदारी हो ।

यसअघि नेपालबाट ओडिआईमा पहिलो विकेटका लागि सर्वाधिक ठूलो साझेदारी ६१ रन थियो । जुन साझेदारी २०१९ मा ज्ञानेन्द्र मल्ल र विनोद भण्डारीले युएईविरुद्ध गरेका थिए । नेपालको ओडिआईमा कुनैपनि विकेटका लागि भएको सर्वाधिक ठूलो साझेदारी ८९ रनको छ । जुन साझेदारी पपुवा न्युगिनीसँगको दोस्रो ओडिआई खेलमा तेस्रो विकेटका लागि ज्ञानेन्द्र मल्ल र रोहित कुमार पौडेलले गरेका थिए ।

त्यसअघि अल अमरेत क्रिकेट मैदानमा टस जितेर पहिला ब्याटिङ रोजेको अमेरिकाले निर्धारित ५० ओभरमा ९ विकेट गुमाउँदै २ सय ३० रन बनाएको थियो ।अमेरिका मोनांक पटेलले १ सय १४ बलमा ९ चौका र १ छक्का सहित सर्वाधिक १ सय रनको शतकीय इनिङ खेले । नेपालका सन्दीप लामिछाने, सुशान भारी र विक्रम सोबले दुई दुई विकेट लिए ।