काठमाडौं (हाम्रो खेलकुद) – नेपाली क्रिकेट टोलीका युवा ब्याट्सम्यान आसिफ शेखले आइसिसी विश्वकप लिग–२ त्रिकोणात्मक ओडिआई सिरिज अन्तर्गत दोस्रो खेलमा घरेलु टोली ओमानविरुद्ध अर्धशतक प्रहार गरेका छन् । अल अमरेत क्रिकेट मैदानमा टस जितेर पहिला ब्याटिङ थालेको नेपालले २० ओभरमा २ विकेट गुमाउँदै ९० रन बनाएको छ । आसिफले ६४ बलमा आफ्नो ओडिआई करिअरको पहिलो अर्धशतक पूरा गरेका हुन् ।

आसिफ ६५ बलमा ५ चौका सहित ५२ रनमा अविजित छन् । आसिफ नेपालबाट ओडिआईमा अर्धशतक प्रहार गर्ने १० औं खेलाडी हुन् । आसिफले दोस्रो ओभरको चौथो बलमा खाता नखोल्दै जीवनदान पाएका थिए । कलिमुल्लाह बलमा मोहम्मद नदीमले क्याच ड्रप गरेपछि आसिफ डक आउट हुनबाट बचेका थिए । जुन जीवनदानको भरपूर्ण फाइदा उठाएका छन् ।

नेपालले खाता नखोल्दै ओपनर कुशल भुर्तेललाई शून्यमा गुमाएको थियो । तीव्र गतिका बलर बिलाल खानको पहिलो ओभरको दोस्रो बलमा कुशल विकेटकिपर सुरज कुमारबाट शून्यमा क्याच आउट हुन पुगेका थिए । अघिल्लो खेलमा अमेरिकालाई पराजित गर्न ८४ रनको इनिङ खेलेका कुशल दोस्रो खेलमा भने चल्न सकेनन् ।

दोस्रो विकेटका रुपमा कप्तान ज्ञानेन्द्र मल्ल २१ रनमा आउट भए । मोहम्मद नदीमको बलमा ज्ञानेन्द्र नेस्टर धम्बाबाट क्याच आउट हुन पुगेका थिए । ज्ञानेन्द्रले ३३ बलमा १ चौका प्रहार गरे । दोस्रो विकेटका लागि ज्ञानेन्द्र र आसिफले ५८ रनको साझेदारी गरेका थिए । क्रिजमा रोहित कुमार पौडेल १४ रनमा खेलि रहेका छन् ।