काठमाडौं (हाम्रो खेलकुद) – नेपाली क्रिकेट टोलीका स्पिनर सन्दीप लामिछाने स्वास्थ्यमा समस्या आएको छ । आइसिसी विश्वकप लिग–२ अन्तर्गत मंगलबार ओमानविरुद्ध खेलमा फिल्डिङ गर्नेक्रममा उनको पेटमा एक्कासी समस्या देखिएको थियो ।

तस्बिर सौजन्य : पल राड्ली ट्वीटर

फिल्डिङ गर्ने समयमा पेटको दुखाईको कारण मैदान छाडेका थिए । उनलाई एम्बुलेन्ससम्म लगिएपनि अस्पताल भने लानुपरेको थिएन । खेलको सुरुवाती ओभरमा नै समस्या आएपछि सन्दीपले ओमानसँगको खेलमा बलिङ गरेका थिएनन् । सन्दीप मैदानमा नै नभएपछि मुख्य बलरबिना नै मैदान उत्रिएको नेपाल ओमानसँग ५ विकेटले पराजित भएको छ ।

सन्दीपको मैदान बाहिर उपचार भएपछि सुधार आएको बुझिएको छ । नेपाली टोलीले उनलाई पूर्णरुपमा विश्राम दिएको छ । उपचारपछि सन्दीप पेभिलिएनमै बसेर नेपालको खेल हेरेका थिए । सन्दीप बिनाको नेपाली टोलीको बलिङ भने सम्झन लायक रहेन ।

नेपालले प्रस्तुत गरेको १ सय ९७ रनको विजयी लक्ष्य ओमानले ३१.१ ओभरमा ५ विकेट गुमाउँदै पूरा गर्यो । ओमानको जितमा जतिन्दर सिंहले ६२ बलमा १२ चौका र ६ छक्का सहित सर्वाधिक १ सय ७ रनको विष्फोटक शतकीय इनिङ खेल्दै सहज जित दिलाए । नेपालका कुनैपनि प्रमुख बलरको प्रदर्शन राम्रो हुन सकेन । सोमपाल कामी, विक्रम सोब र करण केसी प्रमुख तीनै बलरले कमजोर प्रदर्शन गरे ।

तस्बिर सौजन्य : पल राड्ली ट्वीटर

सोमपाल कामीले ४ ओभरमा १ मेडन सहित ३८ रन खर्चिदा विकेट लिन सकेनन् । उनको एकै ओभरमा जतिन्दर सिंहले ३ चौका र ३ छक्कासहित ३० रन जोडेका थिए । विक्रम सोबले २.१ ओभरमा २९ रन खर्चे । कुशल मल्लले १० ओभरमा ३८ रन खर्चेर २ विकेट लिए । करणले ५ ओभरमा ५२ रन खर्चेर २ विकेट लिएका थिए ।

त्यसअघि अल अमरेत क्रिकेट मैदानमा टस जितेर पहिला ब्याटिङ थालेको नेपाल ४७.४ ओभरमा १ सय ९६ रनमा अल आउट भएको थियो । नेपालका लागि आसिफले १ सय १२ बलमा ७ चौका र १ छक्का सहित सर्वाधिक ९० रनको योगदान दिए । आसिफ बाहेक अन्य ब्याट्सम्यानले राम्रो प्रदर्शन गर्न सकेनन् । रोहित कुमार पौडेल २०, करण केसी र ज्ञानेन्द्र मल्लले २१-२१ रन बनाए ।

ओमानका तीव्र गतिका बलर बिलाल खानले १० ओभरमा १ मेडन सहित ४७ रन खर्चेर सर्वाधिक ४ विकेट लिए । नेपालले पहिलो खेलमा अमेरिकालाई ५ विकेटले पराजित गरेको थियो । नेपालले अव सेप्टेम्बर १७ मा अमेरिकासँग खेल्ने छ ।