काठमाडौं (हाम्रो खेलकुद) – दक्षिण अफ्रिका ओपनर रिचार्ड लेभीले चौथो संस्करणको एभरेष्ट प्रिमियर लिग (इपिएल) पोखरा राइनोजबाटै खेल्ने भएका छन् । लेभीले तेस्रो संस्करण इपिएल पोखराबाटनै खेलेका थिए ।
चौथो संस्करणको लागि पोखराले लेभीलाई निरन्तरता दिएको हो । पोखराले पहिलो विदेशी खेलाडीको रुपमा उनको नाम सार्वजनिक गरेको छ । लेभीले दक्षिण अफ्रिकाबाट १३ टि२० आईमा २ सय ३६ रन बनाएका छन् । सन् २०१२ मा लेभीले न्युजिल्यान्डविरुद्ध ५१ बलमा ५ चौका र १३ छक्का सहित १ सय १७ रनमा अविजित इनिङ खेल्दै इतिहास रचेका थिए ।
लेभी दक्षिण अफ्रिकाबाट टि२० आईमा शतक प्रहार गर्ने पहिलो खेलाडी हुन् । त्यसपछि प्रर्दशन अपेक्षा अनुसार नहुँदा २०१२ मानै टोलीबाट बाहिरिएका थिए । लेभीले २ सय २० टि२० खेलमा ३ शतक र २२ अर्धशतक सहित ५ हजार ४ सय ६८ रन बनाएका छन् ।
२०१८ को इपिएलमा लेभीले ४ खेलमा १ सय ९० भन्दा माथिको स्ट्राइक रेटमा ब्याटिङ गर्दै २ सय ४ रन बनाएका थिए । लेभीले कुल १९ छक्का र १४ चौका हिर्काएका थिए । भैरहवाविरुद्ध ७९ र काठमाडौंसँगको खेलमा ३८ रन प्रहार गरे । त्यस्तै ललितपुरविरुद्ध ८४ रन बनाएका लेभीले विराटनगरसँगको खेलमा ३ रन बनाएका थिए । ललितपुरविरुद्ध लेभीले ३९ बलमा ३ चौका र ९ छक्का सहित ८४ रन बनाएका थिए ।
पोखराले जर्सी र लोगो पनि परिवर्तन गरेको छ । जर्सीको अगाडि माछापुच्छ्रे हिमालले सजिएको हुने भएको छ । घाँटीमा सुन्तला रंगको रहने छ । बाँकी माथिल्लो भाग कालो रंगमा हुने पोखराले जनाएको छ । जर्सीको तल्लोभाग कोलो र सुन्तला रंगसँग गएको छ ।
पोखरामा विकेटकिपर विनोद भण्डारी, सुनिल धमला, रित गौतम, किशोर महतो, बिक्रम शोब, बिपिन खत्री, लोकेश बम, पृथु बास्कोटा, विवेक यादव र विपिन रावल लगाएतका खेलाडी छन् । पोखराले बाँकी विदेशी खेलाडी पनि सार्वजनिक तयारी गरेको छ ।
गतवर्ष क्रिस गेलको नाम सार्वजनिक गरेपनि टि२० विश्वकपको कारण उनी आउने छैनन् । इपिएल असोज ९ देखि २३ सम्म टियुमा हुने छ । इपिएल विजेताले ५० लाख र उप विजेताले १५ लाख रुपैयाँ प्राप्त गर्ने छन् ।
