काठमाडौं (हाम्रो खेलकुद) – नेपाली राष्ट्रिय क्रिकेट टोलीले आइसिसी विश्वकप लिग–२ त्रिकोणात्मक ओडिआई सिरिज अन्तर्गत ओमान र अमेरिकासँग पहिलो चरणको खेल खेलिसकेको छ ।

नेपालले पहिलो खेलमा अमेरिकालाई ५ विकेटले पराजित गरेको थियो । घरेलु टोली ओमानसँग नेपाल पाँच विकेटले पराजित हुन पुग्यो । ओमानसँगको नतिजालाई बिर्सदै नेपालले शुक्रबार अमेरिकामाथि जित निकाल्ने सोचमा छ । नेपालको लक्ष्य अमेरिकामाथि लगातार चौथो जित निकाल्ने हुने छ । भारतीय मुलका खेलाडीको बाहुल्यता भएको अमेरिकामाथि जित निकाल्न सहज भने हुने छैन । नेपाल बाँकी दुबै खेलमा जित निकाल्न चाहन्छ । त्यसको लागि टोलीले आफ्नो कमजोरी सुधार गर्न आवश्यक छ ।

नेपालले ओमानमा आफ्नो टोलीको क्षमताअनुसार प्रदर्शन गर्न सकेको छैन । पुरानै गल्ती र समस्याहरु टोलीमा दोहोरिएका छन् । नेपालले अमेरिका र ओमानसँग खेल्नुअघि सुधार गर्नुपर्ने पाँच कमजोरीहरु :

जिम्मेवारी ब्याटिङ र सहि सट छनोट

खराब सट छनोट र गैरजिम्मेवार ब्याटिङ नेपालको समस्याको रुपमा रहँदै आएको छ । नेपालको रन बन्न नसक्नुमा यी दुइ कुरा मुख्य कारण बन्दै आएका छन् । डट बल बढी वा विकेट पतनपछि दबाबमा खेलाडी सम्हालिन सकिरहेका छैनन् । गलत सट छनोट र गैर जिम्मेवार ब्याटिङ त्यसका मुख्य कारण हुन् । जिम्मेवारी ब्याटिङ निकै कम खेलाडीमा झल्किन्छ ।

अल अमरेत मैदानको आउटफिल्ड केहि स्वलो छ । ब्याट्सम्यानले जिम्मेवारी र सहि सर्ट छनोट गर्ने हो भने रन बनाउन कुनै कठिन भने देखिदैन । विपक्षी बलरको उत्कृष्ट बलमा भन्दा पनि ब्याट्सम्यानले आफ्नो कारण बढी विकेट गुमाउँदै आएका छन् । नेपालले बलियो योगफल बनाउन र पूरा गर्न यी समस्याहरु समाधान गर्न आवश्यक देखिन्छ ।

साझेदारीमा जोड

नेपालको राम्रो योगफल बन्न नसक्नुमा साझेदारी नहुनु हो । विशेषगरि मध्यक्रम र तल्लोक्रममा अपेक्षा अनुसार ठूलो साझेदारी हुन सकेको छैन । पपुवा न्युगिनीविरुद्ध ज्ञानेन्द्र मल्ल र रोहित कुमार पौडेलले तेस्रो विकेटका लागि ८९ रनको साझेदारी गरेका थिए । अमेरिकाविरुद्ध रोहित र विनोद भण्डारीले पाँचौं विकेटको लागि ८३ रनको साझेदारी गरेपछि नेपालले २ सय ३१ रनको विजयी लक्ष्य पूरा गरेको थियो ।

ओमानविरुद्ध नेपालबाट दोस्रो विकेटका लागि आसिफ र ज्ञानेन्द्रले ५८ तथा तेस्रो विकेटका लागि आसिफ र रोहितले ४२ रनको साझेदारी गरेका थिए । अन्य विकेटका लागि साझेदारी हुन सकेन । आसिफ, कुशल भुर्तेल र रोहित कुमार पौडेलले एक इनिङबाट राम्रो रन जोड्दा अर्को इनिङबाट साथ पाउन सकिरहेका छैनन् । लगातार विकेट पतन हुँदा रन जोडिरहेको खेलाडीलाई कठिन पर्दै आएको छ । ब्याट्सम्यानले साझेदारीमा विशेष ध्यान दिन आवश्यक देखिन्छ ।

तीव्र गतिका बलरबाट उत्कृष्ट प्रदर्शनको आवश्यक

ओमानमा नेपालको तीव्र गतिका बलिङ युनिटको प्रदर्शन कमजोर छ । अमेरिकाविरुद्ध तीन तीव्र गतिका बलरले २० ओभरमा कुल १ सय १८ रन खर्चेर २ विकेट लिएका थिए । तीन स्पिनरले ३० ओभरमा कुल १ सय ११ रन खर्चिदै कुल ५ विकेट लिएका थिए । सोमपाल कामीले ९ ओभरमा ४४ रन, विक्रम सोबले ६ ओभरमा ३३ रन खर्चेर २ विकेट र करण केसीले ५ ओभरमा ४१ रन दिएका थिए ।

ओमानसँगको खेलमा तीन तीव्र गतिका बलरले मात्र ११.१ ओभरमा कुल १ सय १९ रन खर्चेर १ विकेट लिन सफल रहे । सोमपालले ४ ओभरमा ३८ रन खर्चेका थिए । जसमा एकै ओभरमा ३० रन सामेल थियो । करणले ५ ओभरमा ५२ रन खर्चेर २ विकेट लिदा विक्रमले २.१ ओभरमा २९ रन दिएका थिए । ओमानविरुद्ध दुई स्पिनरले २० ओभरमा ७८ रन खर्चेर ३ विकेट लिएका थिए । पिएनजीसँगको दोस्रो खेलमा तीन तीव्र गतिका बलरले १२ ओभरमा ६० रन खर्चेर २ विकेट लिएका थिए ।

स्पिनरले ११.१ ओभरमा १९ रन खर्चेर ७ विकेट लिएका थिए । टोलीमा दुई स्पिन र तीन प्रमुख तीव्र गतिका बलर छन् । जितको लागि तीव्र गतिका बलिङ युनिटबाट धेरै सुधारको आवश्यक देखिन्छ । अभिनाश बोहरा र गुलशन झा विकल्पमा छन् ।

अनुभवी खेलाडीबाट ठूलो इनिङ

ओमान भ्रमणमा अनुभवी खेलाडी ठूलो इनिङ खेल्न सकिरहेका छैनन् । कप्तान ज्ञानेन्द्र मल्ल, विनोद भण्डारी र शरद भेषावकर टोलीका मुख्य अनुभवी खेलाडी हुन् । कप्तानको प्रदर्शनले अन्य खेलाडी र विपक्ष्य टोलीको मनोबलमा पनि प्रभाव पार्दछ । ज्ञानेन्द्र पिएनजीसँगको पहिलो खेलमा ६ र दोस्रो खेलमा ४५ रनमा आउट भएका थिए । अमेरिकासँग १७ र ओमानविरुद्ध २१ रनमा आउट भएका थिए । ज्ञानेन्द्र सुरुवात दिएपछि ठूलो इनिङ खेल्न चुक्दै आएका छन् । कप्तान, प्रमुख ब्याट्सम्यान र अनुभवी खेलाडीलेनै ठूलो इनिङ खेल्न नसकेपछि युवा खेलाडीको आलोचना गर्नु त्यति उचित हुँदैन ।

विकेटकिपर विनोद भण्डारीले अमेरिकाविरुद्ध ३७ रनको महत्वपूर्ण योगदान दिएका थिए । विनोदले भूमिका अनुसार उत्कृष्ट अन्त्य गर्न आवश्यक देखिन्छ । शरद पहिलो खेलमा ६ रनमा आउट भएपछि टिम रणनीतिको कारण टोलीमा छैनन् । अनुवभी खेलाडीहरुलाई जिम्मेवारीका साथ ठूलो इनिङ खेल्न आवश्यक देखिन्छ ।

प्लेइङ ११ मा शरदको आवश्यक

शरद टोलीका प्रमुख ब्याट्सम्यान हुन् । तर पिएनजीसँगको पहिलो खेलपछि टोलीमा छैनन् । मध्यक्रम ब्याटिङ नेपालको कमजोर देखिएको छ । यो अवस्थामा शरद सहि विकल्प देखिन्छन् । शरद दबाबमा क्रिजमा रहँदै युवा खेलाडीलाई राम्रो सल्लाह र सुझाव दिदै इनिङलाई अगाडि बढाउन सक्छन् । टोलीमा युवा खेलाडीको बाहुल्यता हुँदा उनको आवश्यक बढी देखिन्छ ।

ठूलो अपेक्षा गरिएका कुशल मल्ल चारै खेलमा चल्न सकेनन् । सुरुवाती तीन खेलमा कुशल १-१ रन र ओमानविरुद्ध चार रनमा आउट भएका थिए । उनलाई विश्राम दिँदै शरदलाई मौका दिन सक्छ । शरदको आगमनले नेपालको मध्यक्रम ब्याटिङ मजबुत बन्न सक्छ ।