काठमाडौं (हाम्रो खेलकुद) – नेपाली स्पिनर सन्दीप लामिछानेले आइसिसी विश्वकप लिग २ त्रिकोणात्मक ओडिआई सिरिज अन्तर्गत अमेरिकासँग दोस्रो खेलमा एकै ओभरमा दुई विकेट लिँदै सानदार सुरुवात दिलाएका छन् ।

नेपालले प्रस्तुत गरेको मध्यम विजयी लक्ष्य पछ्याएको अमेरिकाले सरुवाती ६ ओभरमा २ विकेट गुमाउँदै ४३ रन बनाएको छ । अमेरिका स्पिनर स्टिभ टेलर २३ बलमा ४ चौका र २ छक्का सहित ३८ रनमा अविजित छन् । मनांक पटेल १ रनमा खेलि रहेका छन् ।

सन्दीपले पाँचौं ओभरमा दुई विकेट लिएका थिए । पाँचौं ओभरको पहिलो बलमा ओपनर सुशान्त मोदानीलाई गुगली बलमा सन्दीपले दुई रनमा एलबिडब्लू आउट गरेका थिए । चारबलपछि सन्दीपले कोरिमा गोरलाई शून्यमा बोल्ड आउट गर्दै एकै ओभरमा दुई विकेट लिएका थिए ।

त्यसअघि अल अमरेत क्रिकेट मैदानमा टस हारेर ब्याटिङको निम्तो पाएको नेपाल ४८ ओभरमा १ सय ७४ रनमा अल आउट भएको थियो । नेपालका लागि ज्ञानेन्द्र मल्लले १ सय ५ बलमा ३ चौका सहित सर्वाधिक ५५ रनको योगदान दिए । कुशलल भुर्तेलले ३६ र गुलशन झाले २८ रनको योगदान दिएका थिए ।

अमेरिकाका कप्तान सौरभ नेत्रवालकरले ९ ओभरमा २९ रन खर्चेर ४ विकेट लिए । काइल फिलिपले ९ ओभरमा १ मेडन सहित ४३ रन खर्चेर ३ विकेट लिए । करिमा गोर, एल्मोर हुचिन्सन, नास्टुश केनिजेगेले एक एक विकेट लिए । नेपालले पहिलो खेलमा अमेरिकालाई पाँच विकेटले पराजित गरेको थियो । ओमानसँग नेपाल ५ विकेटले पराजित हुन पुगेको थियो । खेलको प्रत्यक्ष प्रसारण डिस होमको एक्सन स्पोर्ट्सले गर्दैछ ।