काठमाडौं (हाम्रो खेलकुद) – अमेरिका ओपनर स्टिभ टेलर आइसिसी विश्वकप लिग–२ त्रिकोणात्मक ओडिआई सिरिज अन्तर्गत नेपालविरुद्ध शतक प्रहार गर्नबाट चुकेका छन् । टेलरको आक्रामक ब्याटिङसँगै अमेरिका जिततर्फ भने अग्रसर भएको छ ।

नेपालले प्रस्तुत गरेको मध्यम विजयी लक्ष्य पछ्याएको अमेरिकाले २० ओभरमा ४ विकेट गुमाउँदै १ सय १९ रन जोडिसकेको छ । अमेरिका ओपनर टेलर ६३ बलमा ९२ रनमा आउट भए । करण केसीको बलमा टप एज लाग्दै सोमपाल कामीबाट समातिएपछि उनी आफ्नो ओडिआई करिअरको पहिलो शतक प्रहार गर्नबाट चुकेका हुन् ।

टेलरले ६३ बलमा १२ चौका र ३ छक्का प्रहार गरे । टेलरले व्यक्तिगत ४२ रनमा जीवनदान पाएका थिए । स्पिनर सुशान भारीको आठौं ओभरको तेस्रो बलमा ठूलो सट खेल्नेक्रममा लङअङमा कुशल भुर्तेलले क्याच ड्रप गरेका थिए ।

टेलर आउट भएको अर्को बलमा नै करणले नयाँ ब्याट्सम्यान संजय कृष्णमुर्थीलाई आउट गरेका थिए । संजयले पहिलो स्लिपमा रहेका कुशल भुर्तेललाई क्याच थमाएका थिए । करणले लगातार २ विकेट लिएपनि अमेरिकालाई अब जितका लागि ३० ओभरमा ५६ रन आवश्यक छ ।

त्यसअघि सन्दीपले पाँचौं ओभरमा नेपाललाई दुई विकेट दिलाएका थिए । पाँचौं ओभरको पहिलो बलमा ओपनर सुशान्त मोदानीलाई गुगली बलमा सन्दीपले दुई रनमा एलबिडब्लू आउट गरे । चार बलपछि सन्दीपले कोरिमा गोरलाई शून्यमा बोल्ड आउट गर्दै एकै ओभरमा दुई विकेट लिएका थिए । एक समय २२–२ को अवस्थाबाट तेस्रो विकेटका लागि टेलर र पटेलले रनको अविजित साझेदारी गर्दै जिततर्फ अगाडि बढाएका छन् ।

त्यसअघि अल अमरेत क्रिकेट मैदानमा टस हारेर ब्याटिङको निम्तो पाएको नेपाल ४८ ओभरमा १ सय ७४ रनमा अल आउट भएको थियो । नेपालका लागि ज्ञानेन्द्र मल्लले १ सय ५ बलमा ३ चौका सहित सर्वाधिक ५५ रनको योगदान दिए ।

कुशलल भुर्तेलले ३६ र गुलशन झाले २८ रनको योगदान दिएका थिए । अमेरिका कप्तान सौरभ नेत्रवालकरले ९ ओभरमा २९ रन खर्चेर ४ विकेट लिए । काइल फिलिपले ९ ओभरमा १ मेडन सहित ४३ रन खर्चेर ३ विकेट लिए । करिमा गोर, एल्मोर हुचिन्सन, नास्टुश केनिजेगेले एक एक विकेट लिए । नेपालले पहिलो खेलमा अमेरिकालाई पाँच विकेटले पराजित गरेको थियो । ओमानसँग नेपाल ५ विकेटले पराजित हुन पुगेको थियो । खेलको प्रत्यक्ष प्रसारण डिस होमको एक्सन स्पोर्ट्सले गर्दैछ ।