काठमाडौं (हाम्रो खेलकुद) – ओपनर स्टिभ टेलरको उत्कृष्ट ब्याटिङसँगै आइसिसी विश्वकप लिग–२ त्रिकोणात्मक ओडिआई सिरिजमा अमेरिकाले नेपाललाई पहिलो पटक पराजित गरेको छ ।

शुक्रबार राती सम्पन्न खेलमा अमेरिकाले नेपाललाई ६ विकेटले पराजित गरेको छ । योसँगै अमेरिका विश्वकप लिग २ मा लगातार ६ हारमा पूर्णविराम लगाएको छ । नेपालले ओडिआईमा अमेरिकासँग पहिलो पटक हारेको हो । जितको लागि १ सय ७५ रनको विजयी लक्ष्य पछ्याएको अमेरिकाले २९.३ ओभरमा ४ विकेट गुमाउँदै पूरा गर्यो ।

अमेरिका जितमा स्टिभ टेलरले ६३ बलमा १२ चौका र ३ छक्का सहित सर्वाधिक ९२ रनको योगदान दिए । आफ्नो ओडिआई करिअरकै उत्कृष्ट प्रदर्शन गर्दै अमेरिकालाई सहज जित दिलाउन टेलरले महत्वपूर्ण योगदान दिए । तीव्र गतिका बलर करण केसीको बलमा सोमपाल कामीबाट क्याच आउट हुन पुगेपछि उनी अमेरिकाबाट सर्वाधिक छिटो शतक प्रहार गर्ने ब्याट्सम्यान बन्नबाट चुकेका थिए ।

टेलरले ब्यक्तिगत ४२ रनमा जीवनदान पाएका थिए । स्पिनर सुशान भारीको आठौं ओभरको तेस्रो बलमा टेलरले ठूलो सट खेल्नेक्रममा लङअङमा कुशल भुर्तेलले क्याच छोड्न पुगेका थिए । जसकरण मल्होत्रा ३२ बलमा २ चौका र ३ छक्का सहित ३६ रनमा अविजित रहे । त्यस्तै मोनांक पटेल ७० बलमा १ चौका सहित ३८ रनमा अविजित रहे । अमेरिका प्रमुख ब्याट्सम्यान मल्होत्राले खाता नखोल्दै शून्यमा जीवनदान पाएका थिए । सोमपाल कामीको बलमा गुलशन झाले मल्होत्रा क्याच ड्रप गरेका थिए ।

सन्दीपले पाँचौं ओभरमा नेपाललाई दुई सफलता दिलाएका थिए । सन्दीपले गुगली बलमा पाँचौं ओभरको पहिलो बलमा ओपनर सुशान्त मोदानीलाई दुई रनमा एलबिडब्लू आउट गर्दै नेपाललाई पहिलो सफलता दिलाएका थिए । चार बलपछि सन्दीपले कोरिमा गोरलाई शून्यमा बोल्ड आउट गर्दै एकै ओभरमा दुई विकेट लिएका थिए । एक समय २२–२ को अवस्थाबाट तेस्रो विकेटका लागि टेलर र मोनांक पटेलले ९७ रनको उत्कृष्ट साझेदारी गरेका थिए ।

२० औं ओभरमा करणले दुई विकेट लिएका थिए । तेस्रो बलमा टेलर टप एज लागेर सोमपालबाट समातिन पुगेपछि शतकबाट चुकेका थिए । लगत्तै अर्को बलमा युवा खेलाडी सन्जय कृष्णमुर्तीलाई कुशल भुर्तेलबाट क्याच गराउँदै गोल्डेन डक पेभिलिएन फर्काएका थिए । पाँचौं विकेटका लागि मल्होत्रा र पटेलले ५६ रनको अविजित साझेदारी गर्दै जित पक्का गराए । नेपालका सन्दीप लामिछाने र करण केसीले दुई दुई विकेट लिए ।

त्यसअघि अल अमरेत क्रिकेट मैदानमा टस हारेर ब्याटिङको निम्तो पाएको नेपाल ४८ ओभरमा १ सय ७४ रनमा अल आउट भएको थियो । नेपालका लागि ज्ञानेन्द्र मल्लले १ सय ५ बलमा ३ चौका सहित सर्वाधिक ५५ रनको योगदान दिए । ज्ञानेन्द्र बाहेक अन्य नेपाली ब्याट्सम्यानको प्रदर्शन सम्झन लायक रहेन । नेपालले खराब ब्याटिङ गर्दै अन्तिम ३४ रन जोड्दा ६ विकेट गुमाएको थियो ।

ज्ञानेन्द्रले ९१ बलमा ओडिआई करिअरको तेस्रो अर्धशतक प्रहार गरेका थिए । ज्ञानेन्द्र नेपालबाट ओडिआईमा तेस्रो अर्धशतक प्रहार गर्ने रोहित कुमार पौडेलपछि दोस्रो खेलाडी हुन् । ज्ञानेन्द्र नेपालबाट ओडिआईमा सर्वाधिक धेरै रन बनाउने खेलाडी पनि बनेका छन् । ज्ञानेन्द्रले १५ खेलमा ३ अर्धशतक सहित कुल १ हजार ३ सय ६६ रन बनाएका छन् । ज्ञानेन्द्र अघि पूर्व कप्तान पारस खड्काले १० खेलमा १ हजार ३ सय १५ रन बनाएका थिए ।

डेब्यू खेल खेलेका तीव्र गतिका बलर काइल फिलिपको बलमा आसिफ ठूलो सट खेल्ने धुनमा टप एज लागेर करिमा गोरबाट तीन रनमा क्याच आउट हुन पुगेका थिए । दोस्रो विकेटका लागि कुशल र ज्ञानेन्द्रले ५१ रनको साझेदारी गर्दै नेपाललाई खेलमा फर्किने आशा देखाएका थिए । स्पिनर करिमाले १२ औं ओभरको तेस्रो बलमा कुशललाई ३६ रनमा बोल्ड आउट गरेका थिए ।

त्यसपछि नेपालले लगातार विकेट गुमाउन पुग्यो । कुशलले ४३ बलमा ५ चौका र १ छक्का प्रहार गरे । एल्मोर हचिन्सनको १५ औं ओभरको तेस्रो बलमा रोहित कुमार पौडेल दुई रनमा क्याच आउट भएपछि नेपाल ६३–३ को अवस्थामा पुगेको छ । कभरमा करिमाले एक हातले उत्कृष्ट क्याच लिएपछि रोहित पेभिलिएन फर्किनु परेको छ ।

२४ औं ओभरको तेस्रो बलमा विकेटकिपर विनोद भण्डारी १० रनमा आउट हुन पुगे । नेपालले सबैलाई आश्चार्य पार्दै डेब्यू खेल खेलेका तीव्र गतिका बलर गुलशन झालाई छैटौं नम्बरमा पठाएको थियो । गुलशनले ज्ञानेन्द्रसँग पाँचौ विकेटका लागि ५१ रनको साझेदारी गरेका थिए । ३९ औं ओभरमा नेपालले दुई विकेट गुमाएको थियो । कप्तान सौरभ नेत्रवालकरको दोस्रो बलमा गुलशन २८ रनमा करिमा गोर क्याच आउट भए । ५३ बल खेलेका गुलशनले २ चौका र १ छक्का प्रहार गरे । गुलशनले ३३ औं ओभरको दोस्रो बलमा ब्यक्तिगत १४ रनमा जीवनदान पाएका थिए । स्पिनर नास्टुश केन्जिगेको बलमा फस्ट स्लिपमा टेलरले क्याच ड्रप गरेका थिए ।

चार बलपछि कुशल मल्ल करिमाबाटै शून्यमा पेभिलिएन फर्के । खराब लयबाट गुज्रिएका कुशल पाँचौं खेलमा पनि खराब प्रदर्शन गरे । कुशल सुरुवाती तीन खेलमा लगातार एक एक खेलमा आउट भएका थिए । ओमानसँगको खेलमा चार रनमा आउट भएका थिए । सौरभकै बलमा सोमपाल कामी दुई रनमा एल्मोर हचिन्सनबाट क्याच आउट हुँदा नेपाल १४४–७ को कमजोर अवस्थामा पुगेको थियो । करण केसी १२ र सन्दीप लामिछाने ११ रनमा आउट भए ।

अमेरिका कप्तान सौरभ नेत्रवालकरले ९ ओभरमा २९ रन खर्चेर ४ विकेट लिए । काइल फिलिपले ९ ओभरमा १ मेडन सहित ४३ रन खर्चेर ३ विकेट लिए । करिमा गोर, एल्मोर हुचिन्सन, नास्टुश केनिजेगेले एक एक विकेट लिए ।

नेपालले ओडिआई खेलमा अमेरिकासँग पहिलो पटक पराजित भएको हो । यसअघि खेलेका तीनै खेलमा नेपालले अमेरिकामाथि सहज जित हात पारेको थियो । नेपालले पहिलो खेलमा अमेरिकालाई पाँच विकेटले पराजित गरेको थियो । गतवर्ष नेपालमा पहिलो खेलमा ३५ रन र दोस्रो खेलमा ८ विकेटले विजयी भएको थियो । दोस्रो खेलमा अमेरिकालाई नेपालले ३५ रनमा अल आउट गरेको थियो । ओमानसँग नेपाल ५ विकेटले पराजित हुन पुगेको थियो । नेपालले अन्तिम खेल ओमानसँग आइतबार हुने छ ।

विश्वकप लिग(२ अंक तालिका

ओमान १२ खेलमा १० मा जित र २ मा हार सहित २० अंकका साथ शीर्ष स्थानमा छ । अमेरिका १५ खेलमा ७ मा जित र ८ मा हार सहित १४ अंक जोड्दै दोस्रो स्थानमा छ । स्कटल्यान्ड ८ खेलमा ४ मा जित र ३ मा हार सहित ९ अंकका साथ तेस्रो स्थानमा छ । एक खेल वर्षाको कारण रद्ध भएको थियो ।

नामिबिया ७ खेलमा ४ मा जित र ३ मा हार सहित ८ अंक सहित चौथो स्थानमा छ । युएई ७ खेलमा समान ३ मा जित र ३ मा हार सहित ७ अंक जोड्दै पाँचौं स्थानमा छ । एक खेल रद्ध हुन पुगेको थियो । नेपाल ७ खेलमा ३ मा जित र ४ मा हार सहित ६ अंकका साथ छैटौं स्थानमा छ । पपुवा न्युगिनी ८ खेलमानै हारका साथ अंक विहिन हुँदै पुछारमा छ ।