काठमाडौं (हाम्रो खेलकुद) – नेपालले आज आइसिसी विश्वकप लिग–२ त्रिकोणात्मक ओडिआई सिरिज अन्तर्गत घरेलु टोली ओमानसँग खेल्दै छ । खेल नेपाली समय अनुसार दिउँसो ४:१५ पछि अल अमरेत क्रिकेट मैदानमा सुरु हुने छ । ओमान भ्रमणको अन्तिम खेलमा नेपाल जितका साथ अन्त्य गर्न चाहन्छ ।

पाकिस्तानी मुलका खेलाडीको बाहुल्यता भएको ओमान नेपालमाथि लगातार चौथो जित निकाल्ने सोचमा छ । नेपाल पहिलो पटक ओडिआईमा ओमानलाई हराउन चाहन्छ । पछिल्ला दुई खेलमा नेपाल ओमानसँग ५ विकेट र अमेरिकासँग ६ विकेटले पराजित भएको थियो । दुबै खेलमा बलिङ, ब्याटिङ र फिल्डिङ तीनै क्षेत्रमा नेपालले कमजोर प्रदर्शन गरेको थियो ।

पछिल्ला दुवै खेलमा कमजोर प्रदर्शन गरेको हुँदा टोलीमा आज परिवर्तनको सम्भावना बढी छ । खेलाडीको प्रदर्शन, विपक्षी टोलीको कमजोरी, नेपालको आवश्यकता र टोली सन्तुलनलाई विशेष ध्यान दिँदै नेपालले तीन परिवर्तन गर्ने सम्भावना छ ।

फ्लप युवा अलराउन्डर कुशल मल्ललाई नेपालले बेन्चमा राख्ने लगभग निश्चित छ । उनले ओमान भ्रमणमा ५ खेलमा ७ रन बनाएका छन् । पपुवा न्युगिनीसँग दुबै खेलमा १-१ रनमा आउट भएका थिए । अमेरिकासँग पहिलो खेलमा एक र दोस्रो खेलमा शून्यमा आउट भएका थिए ।
ओमानसँग चार रनमा पेभिलिएन फर्केका थिए । नेपालको मध्यक्रम कमजोर हुनुमा कुशल नचल्नु एक कारण हो । कुशलको स्थानमा नेपाली क्रिकेट टोलीका सर्वाधिक अनुभवी ब्याट्सम्यान शरद भेषावकर खेल्ने सम्भावना उच्च छ ।

शरदले दबाबमा मध्यक्रममा टोलीलाई सम्हाल्न सक्छन् । उनको अनुभवको नेपाली क्रिकेटलाई आवश्यक पनि छ । मध्यक्रम बलियो बनाउन शरदनै नेपालको अन्तिम विकल्प हुन् । युवा खेलाडीको बाहुल्यता हुँदा टोलीमा उनको आवश्यक पनि धेरै देखिन्छ । उनको आगमनले मध्यक्रम बलियो हुने आशा राखिएको छ । शरद पार्टटाइम राम्रो स्पिन बलिङ गर्ने गर्दछन् ।

विकेटकिपर विनोद भण्डारीलाई पनि बेन्चमा राख्ने सम्भावना छ । उनी अमेरिकासँग १० र ओमानसँग ६ रनमा आउट भएका थिए । विकेटकिपरको विकल्पमा ओपनर आसिफ शेख टोलीमा छन् । आसिफले ओपनरको रुपमा राम्रो प्रभाव छाडि सकेका छन् । मध्यक्रम बलियो बनाउन नेपालले विनोदको स्थानमा आरिफ शेखलाई मौका दिने सम्भावना छ । आरिफ पपुवा न्युगिनीसँग पहिलो खेलपछि टोलीमा छैनन् । आरिफ मध्यक्रममा भरपर्दा ब्याट्सम्यान हुन् ।

पार्टटाइम बलिङको राम्रो विकल्प हुँदा आरिफको सम्भावना बढेको छ । नेपाली तीव्र गतिका बलरले ओमान भ्रमणमा कमजोर प्रदर्शन गरेका छन् । अझ पछिल्लो दुबै खेलमा प्रदर्शन निकै कमजोर छ । मध्यगतिका आरिफ टोलीलाई सहि नतिजा दिन सक्छन् । आरिफको आगमनले नेपाली टोली सन्तुलनमा धेरै फाइदा पुग्न सक्छ ।

तेस्रो परिवर्तनको रुपमा गुलशन झा छन् । अमेरिकाविरुद्ध डेब्यू गर्दै ब्याटिङमा २८ रन जोडेका गुलशनले बलिङ ३ ओभरमा ३१ रन खर्चेका थिए । गुशलनको स्थानमा नेपालले स्पिन अलराउन्डर पवन सरार्फलाई मौका दिने सम्भावना छ । पवन तल्लोक्रममा राम्रो ब्याटिङसँगै स्पिन बलिङ गर्ने गर्दछन् ।

ओमानसँगको पहिलो खेलमा नेपाली तीव्र गतिका बलरले सुरुवाती १० ओभरमै १ सय ८ रन बनाएका थिए । स्पिनरले राम्रो पूनरागमन गराउँदै खेललाई ३० औं ओभर सम्म पुर्याएका थिए । अमेरिकाले प्रस्तुत गरेको १ सय ७९ रनको विजयी लक्ष्य ओमानले ४९.४ ओभरमा ८ विकेट गुमाउँदै पूरा गरेको थियो । जसक्रममा स्पिनर स्टिभ टेलरले १० ओभरमा २४ रन खर्चेर १ विकेट लिएका थिए ।

स्पिनर संघर्षको कारण अमेरिकाले पार्टटाइम बलर टेलरलाई पूरै ओभर गराएको थियो । अर्का स्पिनर निसर्ग पटेलले ९.४ ओभरमा २७ रन खर्चेका थिए । यस पटक घरेलु मैदानमा ओमान स्पिनरको सामना खुलेर गर्न सकेको छैन । पवन नेपालको राम्रो हतियार बन्न सक्छन् । पवन, शरद र आरिफको आगमनले नेपाली टोली मजबुत बन्नसक्छ । टोलीमा अन्य परिवर्तनको भने सम्भावना देखिदैन । पछिल्ला दुबै खेलमा सोमपालको प्रदर्शन कमजोर छ । दुबै खेलमा विकेटविहिन छन् । तर सोमपाल नेपालका पहिलो रोजाईका खेलाडी हुन् ।

नेपालको प्लेइङ-११ : ज्ञानेन्द्र मल्ल (कप्तान), कुशल भुर्तेल, आसिफ शेख (विकेटकिपर), रोहित कुमार पौडेल, शरद भेषावकर, सोमपाल कामी, आरिफ शेख, करण केसी, पवन सरार्फ, सन्दीप लामिछाने र सुशान भारी ।

यो पनि पढ्नुहोस्ः ह्वाटमोरको अन्तिम खेलमा सुखद नतिजा अपेक्षा