काठमाडौं (हाम्रो खेलकुद) – ओमानमा जारी त्रिकोणात्मक ओडिआई सिरिजमा दोस्रो जित हासिल गरेपछि नेपाल आइसिसी विश्वकप लिग–२ को अंक तालिकाको चौथो स्थानमा उक्लिएको छ ।

नेपालले आइतबार राती घरेलु टोली ओमानलाई ७ विकेटले पराजित गर्दै नामिबिया र संयुक्त अरव इमिरेट्स (युएई) लाई पछि छाड्दै चौथो स्थानमा फड्को मारेको हो । नेपाल ८ खेलमा ४ मा जित र ४ मा हार सहित ८ अंक जोड्दै दुई स्थान सुधार गर्दै चौथो स्थानमा छ । नेपालले ओमानलाई ओडिआईमा पहिलो पटक पराजित गरेको हो ।

अल अमरेत क्रिकेट मैदानमा टस हारेर ब्याटिङको निम्तो पाएको घरेलु टोली ओमान ३७.१ ओभरमा १ सय २१ रनमा अल आउट हुन पुग्यो । ओमानका कप्तान जिशान मकसुदले सर्वाधिक ४१ रन बनाए । नेपालका सन्दीप लामिछाने र करण केसीले चार चार विकेट लिए । जितको लागि १ सय २२ रनको विजयी लक्ष्य नेपालले १८.२ ओभरमा ३ विकेटको क्षतिमा पूरा गर्यो । नेपालको जितमा कप्तान ज्ञानेनद्र मल्लले ५२ र आसिफ शेखले ४० रनको योगदान दिए ।

यसअघिका तीनै ओडिआई खेलमा ओमानले नेपालमाथि सहज जित हात पारेको थियो । ओमान र अमेरिकासँग त्रिकोणात्मक सिरिजमा नेपालले दुई खेलमा जित निकालेको छ । नेपालले पहिलो खेलमा अमेरिकालाई ५ विकेटले पराजित गरेको थियो । ओमानसँग पहिलो खेलमा ५ विकेटले पराजित भएको थियो ।

अमेरिकासँग दोस्रो खेलमा नेपाल ६ विकेटले पराजित हुन पुगेको थियो । नेपाल गत भदौ ८ मा ओमान पुगेको थियो । यस त्रिकोणात्मक सिरिजको तयारीको लागि नेपालले पपुवा न्युगिनीसँग दुई ओडिआई खेल खेलेको थियो । पहिलो खेलमा नेपाल दुई विकेट र दोस्रो खेलमा १ सय ५१ रनले विजयी भएको थियो । नेपालले गतवर्ष टियु मैदानमा ओमान र अमेरिकासँग त्रिकोणात्मक सिरिजसँगै विश्वकप लिग–२ मा डेब्यू गरेको थियो ।

उक्त सिरिजमा नेपालले अमेरिकालाई दुबै खेलमा पराजित गरेको थियो । ओमानसँग दुबै खेलमा पराजित भएको थियो । त्यसपछि कोरोना महामारीको कारण विश्वकप लिग–२ का सबै खेलहरु रोकिँदै आएका थिए । नेपालले अव तालिका अनुसार २०२२ को फेब्रुअरीमा टियु मैदानमा पपुवा न्युगिनी र युएईसँग त्रिकोणात्मक ओडिआई सिरिज खेल्ने कार्यक्रम छ । नेपालले विदेशी टोलीसँग सहकार्य गर्दै त्यसअघि पनि खेल्न सक्छ ।

विश्वकप लिग-२ अंक तालिका

ओमान १३ खेलमा १० मा जित र ३ मा हार सहित २० अंकका साथ शीर्ष स्थानमा छ । अमेरिका १५ खेलमा ७ मा जित र ८ मा हार सहित १४ अंकका साथ दोस्रो स्थानमा छ । स्कटल्यान्ड ८ खेलमा ४ मा जित र ३ मा हार सहित ९ अंकका साथ तेस्रो स्थानमा छ । एक खेल वर्षाको कारण रद्ध भएको थियो ।

नेपाल ८ खेलमा ४ मा जित र ४ मा हार सहित ८ अंकका साथ चौथो स्थानमा छ । नामिबिया ७ खेलमा ४ मा जित र ३ मा हार सहित ८ अंक का साथ पाँचौं स्थानमा छ । नेट रनरेटको कारण नामिबिया नेपाल भन्दा पछि परेको हो । युएई ७ खेलमा समान ३ मा जित र ३ मा हार सहित ७ अंक जोड्दै छैटौं स्थानमा छ । एक खेल रद्ध हुन पुगेको थियो । पपुवा न्युगिनी ८ खेलमानै हारका साथ अंक विहिन हुँदै पुछारमा छ ।

यस्तो छ विश्वकप यात्रा

विश्वकप लिग २ आइसिसी एकदिवसिय विश्वकप २०२३ मा हुने विश्वकप छनोट यात्रा हो । नेपालले गतवर्ष माघमा ओमान र अमेरिकासँग खेल्दै विश्वकप लिग २ मा डेब्यू गरेको थियो । नेपालसहित ओमान, स्कटल्यान्ड, नामिबिया, अमेरिका, पपुवा न्युगिनी र यूएई गरि ७ टोलीले २०२३ सम्म प्रतिस्पर्धा गर्ने छन् । होम अवे त्रिकोणात्मक सिरिज हुँदा एक टोलीले कुल ३६ ओडिआई खेल खेल्नेछन् ।

जसबाट शीर्ष तीन टोली सन् २०२३ मा भारतमा हुने एकदिवसिय विश्वकपको लागि ग्लोबल छनोटमा सोझै स्थान बनाउने छन् । पुछारका चार टोलीले प्लेअफ खेल्नुपर्ने हुन्छ । प्ले अफमा च्यालेन्ज ए र बी बाट आउने शीर्ष दुई टोली गरि ६ टोलीबीच प्रतिस्पर्धा गर्ने छन् । प्लेअफबाट दुई टोलीले ग्लोबल छनोट खेल्ने अन्तिम अवसर पाउनेछन् ।

ग्लोबल छनोटमा १० टोली हुने छन् । आइसिसी विश्वकप सुपर लिगमा १२ टेस्ट टोली र नेदरल्यान्ड्स गरि कुल १३ टोली छन् । विश्वकप सुपर लिगमा १३ टोली मध्य भारत आयोजक देश हुँदा छनोट भई सकेको छ । सुपर लिग पछि अन्य शीर्ष ७ टोलीले विश्वकपमा स्थान बनाउने छन् । बाँकी पाँच टोलीले ग्लोबल छनोटमा झर्नेछन् ।

सुपर लिगका पुछारका पाँच टोली, विश्वकप लिग-२ का शीर्ष तीन टोली र प्लेअफका शीर्ष दुई टोली गरि कुल १० टोलीले ग्लोबल छनोटमा प्रतिस्पर्धा गर्ने छन् । जसबाट शीर्ष दुई टोलीले विश्वकपमा स्थान बनाउनेछन् ।

यो पनि : नेपाल फर्कने प्रशिक्षक ह्वाटमोरको इच्छा