काठमाडौं (हाम्रो खेलकुद) – मुख्य प्रशिक्षक डेभ ह्वाटमोरलाई नेपाली क्रिकेट टोलीले आइतबार राती जितका साथ सुखद बिदाई गरेको छ । आइसिसी विश्वकप लिग-२ त्रिकोणात्मक ओडिआई सिरिज अन्तर्गत अन्तिम खेलमा ओमानलाई ७ विकेटले पराजित गर्दै ह्वाटमोर मुख्य प्रशिक्षकबाट बिदा भएका छन् ।

ह्वाटमोरले अघिल्लो महिना ओमान त्रिकोणात्मक सिरिजपछ नेपाली टोली छाड्ने बताएका थिए । कोरोना महामारीको कारण परिवारबाट टाढा हुँदा कठिन भएको भन्दै उनले श्रीलंका फर्किने बताएका थिए । ह्वाटमोर नेपाली टोलीको मुख्य प्रशिक्षकमा गत पुषमा एक वर्षको लागि नियुक्त भएका थिए । माघमा नेपाल आइपुगेका ह्वाटमोरले प्रधानमन्त्री कप एकदिवसिय क्रिकेट प्रतियोगिता र काठमाडौं मेयर्स एकदिवसिय क्रिकेट गरि दुई घरेलु प्रतियोगितामा युवा खेलाडीको प्रदर्शन हेरेका थिए । त्यस प्रर्दशनपछि ह्वाटमोरले नेपाली टोली निर्माण गरेका थिए ।

वैशाखमा नेपालले ह्वाटमोरको प्रशिक्षकमा नेदरल्यान्ड्स र मलेसियाविरुद्ध त्रिकोणात्मक सिरिजमा सानदार प्रदर्शनका साथ उपाधि जितेको थियो । त्रिकोणात्मक सिरिजमा नेपालले अन्तिम तीन खेलमा लगातार दुई सय माथिको योगफल बनाएको थियो । नेपालले फाइनलमा नेदरल्यान्ड्सविरुद्ध २ सय ३८ रन जोड्दै टि२० आई इतिहासकै सर्वाधिक ठूलो योगफल थियो ।

ह्वाटमोरले राजीनामा कारण कोरोना महामारीको समयमा परिवारबाट बस्न कठिन भएको बताएका छन् । तर त्यो नेपाल छाड्ने बाहना देखिन्छ । उनले भारतको बरोडा क्रिकेट टोलीसँग सम्झौता गरिसकेको भारतीय सञ्चार माध्यमले बताउँदै आएका छन् । उनी ओमान भ्रमणपछि भारतीय घरेलु प्रतियोगिता रणजी र शैद मुश्ताक अली सम्हाल्ने गरि बरोडासँग जोडिने तयारीमा छन् ।

ह्वाटमोर कोरोना महामारीको कारण धेरै समय नेपाली खेलाडीसँग भने रहन पाएनन् । ह्वाटमोरले नेपालमा ८ महिना अवधिमा राम्रोसँग काम गर्ने अवसर नै पाएनन् । नेपालमा नामिबियासँग खेल्ने तयारी गरेको सिरिज पनि हुन सकेन । ह्वाटमोरले त्रिकोणात्मक टि२० सिरिज बाहेक अन्य कुनैपनि अन्तर्राष्ट्रिय खेल हेर्न पाएनन् । ह्वाटमोरको एक महिना मासिक पारिश्रमिक नेपालमा १० हजार अमेरिकी डलर थियो । नेपाल सरकारको नियम अनुसार उनको तलबको सबै गरेर ३५ प्रतिशत रकम कर काटिन्छ । क्यानका अनुसार खाना, बस्न, कर सबै कटाएर उनले मासिक ६ हजार ५ सय देखि ७ हजार सम्म तलब पाउँथे ।

ह्वाटमोरको प्रशिक्षकमा नेपालले तीन अन्तर्राष्ट्रिय सिरिज खेल्यो । कुल ११ अन्तर्राष्ट्रिय खेलमा नेपाल ८ खेलमा जित र ३ खेलमा पराजित भयो । वैशाखमा त्रिकोणात्मक टि२० सिरिजमा नेपालले कुल पाँच खेलमा चार मा जित र एक खेलमा पराजित भएको थियो । पपुवा न्युगिनीसँगको दुबै खेलमा नेपालले सहज जित हात पारेको थियो । ओमान र अमेरिकासँग त्रिकोणात्मक सिरिजमा दुई खेलमा जित र दुई खेलमा हार बेहोर्नु पर्यो । अमेरिका ओमानसँग एक एक खेलमा जित निकाल्दा एक एक खेलमा पराजित हुन पुग्यो ।

अव नेपाली क्रिकेट टोलीको मुख्य प्रशिक्षक को बन्ने निश्चित छैन । खुल्ला आवेदन मार्फत लिने वा सोझै नियुक्त गर्ने छलफलमै क्यान अलमलिएको छ । ह्वाटमोरले विशेष गरी ब्याटिङमा धेरै सुधारको आशा देखाएर नेपाली क्रिकेट छाडेका छन् । ह्वाटमोरको सबैभन्दा ठूलो उपलब्धी लगातार असफल बनेको ओपनिङ जोडीमा समाधान निकालिदिएका छन् । युवा ओपनर आसिफ शेख र कुशल भुर्तेल ह्वाटमोरले ओपनिङमा प्रयोग गरेका नयाँ जोडी थिए । दुबैले टि२० र ओडिआईमा राम्रो प्रभाव छाडेका छन् ।

ह्वाटमोरले ओमानसँगको जितपछि नेपालको प्रशिक्षक रहँदा समर्थकको निरन्तर साथको लागि धन्यवाद व्यक्त गरे । ‘समर्थकको कुरा गर्नुपर्दा मैले धेरै सुनेको थिएँ । त्यसको केहि झलक महसुस पनि गर्न पाएँ,’ उनले सम्झिए, ‘नेपालमा भएको त्रिकोणात्मक सिरिजमा सरकारले प्रतिबन्ध लगाउनुअघि समर्थकसहितको वातावरणमा पनि खेल्यौं । समर्थकहरु मैदानमा आएर टोलीको साथ दिएको देख्दा खुसी लग्यो । नेपाली क्रिकेटलाई साथ दिनुहुने सबैलाई धन्यवाद ।’

अन्त्यमा उनले टोलीसँग भविष्यमा काम गर्नेबारे इच्छा पनि जाहेर गरे । ‘हुनसक्छ भविष्यमा फेरी हामी यो यात्रालाई निरन्तरता दिन सक्नेछौं । सम्भावना छ भने । तर सबैलाई निरन्तर साथको लागि धन्यवाद,’ उनले भने ।

यो पनि पढ्नुहोस् : ह्वाटमोरले देखाएको आशाको निराशाजनक अन्त्य