काठमाडौं (हाम्रो खेलकुद) – पाकिस्तानका पूर्व कप्तान तथा स्टार अलराउन्डर शाहिद अफ्रिदी चौथो संस्करणको एभरेष्ट प्रिमियर लिग (इपिएल) खेलेर आज पाकिस्तान फर्कंदै छन् । अफ्रिदी आज चार बजे फर्कनेछन् ।

अफ्रिदी काठमाडौं किंग्स इलेभेनबाट इपिएल दुई खेल खेल्न बिहीबार नेपाल आएका थिए । अफ्रिदीले इपिएलमा दुई खेल खेल्ने कार्यक्रम रहेपनि एक खेल मात्र खेलेर फर्किनु पर्ने भएका छ । शनिबार अफ्रिदीले ललितपुर प्याट्रियटर्सविरुद्ध पहिलो खेल खेलेका थिए । अफ्रिदीले ब्याटिङको अवसर नपाउँदा बलिङमा ४ ओभरमा ३२ रन खर्चेका थिए । काठमाडौंले ललितपुरमाथि ७ विकेटको सहज जित निकाल्दा ब्याटिङ गर्नु परेको थिएन ।

सोमबार अफ्रिदीले विराटनगर वारियर्सविरुद्ध खेल खेलेर स्वदेश फर्किने कार्यक्रम थियो । तर आइतबार वर्षाको कारण आउट फिल्ट भिजेको हुँदा खेल नै स्थगित हुन पुग्यो । यो खेल अर्को दिन गर्नेबारे आयोजकले सम्भाव्यता अध्ययन गरिरहेको छ । काठमाडौंले भोली हुने एकमात्र खेलमा पोखरा राइनोजसँग खेल्नेछ ।

अफ्रिदीले शुक्रबार राष्ट्रपति विद्यादेवी भण्डारीसँग भेटवार्ता गरेका थिए । अफ्रिदीले नेपाल बसाइको क्रममा नेपाल मुश्लिम आयोगसँग पनि छलफल गरेका थिए । यसक्रममा उनले आइतबार माउन्ट फ्लाइट पनि गरेका थिए ।

सोमबार खेल स्थगित भएको केहि समयमै अफ्रिदीले टियु मैदान छाडेका थिए । अफ्रिदी नेपाल भ्रमणमा खेल भन्दा पनि मनोरञ्जन, कूटनीतिक भेटघाट र अफ्रिदी फाउन्डसेनको काममा बढी ब्यस्त देखिए । अफ्रिदी फ्रेन्चाइज लिग खेल्न नेपाल आउने सर्वाधिक ठूला नाम हुन् । अफ्रिदी फर्केसँगै अव उनको स्थानमा सिंगापुरका अलराउन्डर जनक प्रकाशले खेल्नेछन् ।

यो पनि पढ्नुहोस् : यस्तो रह्यो अफ्रिदीको चार ओभर