एजेन्सी – दुई सातापछि संयुक्त अरव इमिरेट्स (युएई) र ओमानमा हुने टि२० विश्वकपको लागि पाकिस्तानले यसअघि घोषणा टोलीमा तीन खेलाडी परिवर्तन गरेको छ ।

पाकिस्तानले चर्चित ओपनर फखर जमान, शीर्षक्रमका ब्याटर हैदर अली र अनुभवी विकेटकिपर शरफराज अहमदलाई टोलीमा मौका दिएको छ । यसअघि सेप्टेम्बर ४ मा घोषणा भएको टोलीबाट खुसदील शाह, आजम खान र मोहम्मद हसनैनन विश्वकप अन्तिम टोलीबाट बाहिरिएका छन् । खुशदील भने रिजरभ टोलीमा रहनेछन् ।

पाकिस्तानले अघिल्लो महिना बाबर आजमको कप्तानीमा १५ सदस्य टोली घोषणा गरेको थियो । तर केहि प्रमुख खेलाडी टोलीमा नपरेपछि पाकिस्तानको चर्को आलोचना भएको थियो । हैदर अलीले पाकिस्तानबाट १५ टि२० आई खेलमा २ अर्धशतक सहित २ सय ५६ रन बनाई सकेका छन् ।

पाकिस्तानको राष्ट्रिय टि२० कपमा हैदरले नर्थनबाट खेल्दै ८ खेलमा ३ अर्धशतक सहित ३ सय १३ रन बनाउँदै सर्वाधिक रन बनाउने खेलाडी बनेपछि विश्वकप टोलीमा स्थान बनाएका हुन् । जसक्रममा बाबर आजम कप्तान रहेको सेन्ट्र पन्जाबविरुद्ध ५३ बलमा ६ चौका र ६ छक्का सहित ९१ रनको सानदार इनिङका साथ २ सय १ रनको लक्ष्य ४ विकेट गुमााउँदै १९.४ ओभरमा पूरा गरेका थिए ।

हैदरको उत्कृष्ट ब्याटिङसँगै बाबरको १ सय ५ रनको शतकीय इनिङ खेर गएको थियो । हैदरा ठूला सटका लागि परिचित पाकिस्तानका युवा ब्याटर हुन् । २१ वर्षिय हैदरलाई पाकिस्तानको भविष्यको रुपमा हेरिदै आएको छ । उनको अगमनले मध्यक्रम बलियो हुनेछ ।

विकेटकिपर शरफराज अहमदले पनि राष्ट्रिय टि२० कपमा उच्च प्रदर्शन गरेका थिए । फखर जमानले पाकिस्तान टोलीबाट खेल्दै निरन्तर उच्च प्रदर्शन गर्दै आएका छन् । अघिल्लो महिना पाकिस्तानले आश्चर्य रुपमा फखरलाई रिजरभ टोलीमा राखेको थियो । फखरले पाकिस्तानको मध्यक्रममा ब्याटिङ गर्दै आएका छन् । पाकिस्तानको सबैभन्दा कमजोर पक्ष मध्यक्रम छ । फखर र हैदरको आगमनले बलियो बन्ने छ । शरफराज दोस्रो रोजाईका विकेटकिपर हुन् । वर्तमान समयमा उत्कृष्ट लयमा रहेका मोहम्मद रिजवान पाकिस्तानका प्रमुख विकेटकिपर तथा ब्याटर हुन् ।

पाकिस्तान विश्वकपको सुपर १२ को समूह बी मा छ । समूह बी मा पाकिस्तानसँगै भारत, न्युजिल्यान्ड, अफगानिस्तान, समूह बी को विजेता र समूह ए को उपविजेता रहने छन् । पाकिस्तानले पहिलो खेलमा अक्टोबर २४ मा भारतसँग खेल्ने छ । विश्वकप इतिहासमा पाकिस्तानले हालसम्म भारतलाई पराजित गर्न सकेको छैन । पाकिस्तानले दोस्रो खेल न्युजिल्यान्डसँग २६ अक्टोबरमा खेल्ने छ । २९ अक्टोबरमा पाकिस्तान र अफगानिस्तानबीच प्रतिस्पर्धा हुने छ । नोभेम्बर २ मा पाकिस्तानले समूह ए को उपविजेतासँग खेल्ने छ । नोभेम्बर ७ मा समूह बीको विजेतासँग पाकिस्तानले प्रतिस्पर्धा गर्ने छ । शीर्ष दुईमा रहन सके सेमिफाइनलमा स्थान बनाउने छ । सेमिफाइनलमा स्थान बनाउन भारत र न्युजिल्यान्ड मध्य एकलाई पछि पार्नुपर्ने हुन्छ ।

२००९ मा श्रीलंका खेलाडी चडेको बस आक्रमणपछि पाकिस्तानले यूएईलाई घरेलु मैदान बनाउँदै आएको छ । जसले गर्दा पाकिस्तानलाई विश्वकपमा फाइदा पुग्ने देखिन्छ । पहिलो चरण (फस्ट राउन्ड) को समूह ए मा श्रीलंका, आरल्यान्ड, नेदरल्यान्ड्स र नामिबिया छन् । समूह बी मा बंगलादेश, स्कटल्यान्ड, ओमान र पपुवा न्युगिनी छन् । हरेक समूहका शीर्ष दुई टोली सुपर १२ मा स्थान बनाउने छन् । सुपर १२ को ग्रुप ए मा इंग्ल्यान्ड, अष्ट्रेलिया, दक्षिण अफ्रिका, वेस्टइन्डिजसँगै समूह ए को विजेता र समूह बीको उप विजेता रहने छन् । टि२० विश्वकप अक्टोबर १७ देखि नोभेम्बर १४ सम्म चल्नेछ ।

पाकिस्तानको टि२० विश्वकप टोली :

बाबर आजम (कप्तान), शादब खान, आसिफ अली, शरफराज अहमद , हरिस रौफ, हसन अली, ईमाद वासिम, हैदर अली, मोहम्मद हफिज, फखर जमान, मोहम्मद नवाज, मोहम्मद रिजवान (विकेटकिपर), मोहम्मद वासिम, शाहिन शाह अफ्रिदी र सोहिब मकसुद ।

भ्रमण वैकल्पिक खेलाडी : खुशदील शाह, उस्मान कादिर र शाहनवाज दहानी ।