काठमाडौं (हाम्रो खेलकुद) – पोखरा राइनोजले एभरेष्ट प्रिमियर लिग (इपिएल) को फाइनलमा चितवन टाइगर्सविरुद्ध मध्यम सुरुवात गरेको छ । टियु क्रिकेट मैदानमा टस हारेर पहिला ब्याटिङ थालेको पोखराले ५ ओभरमा २ विकेट गुमाउँदै ४१ रन बनाएको छ ।

पोखरा ओपनर रिचार्ड लेभी १५ बलमा ५ चौका सहित २६ रनमा क्याच आउट भएका छन् । विपिन रावल ७ बलमा १ चौका र १ छक्का सहित १२ रनमा अविजित छन् । पोखराले आज लेभीको जोडीको रुपमा विपिन रावललाई पठाएको थियो ।

रावलले क्वालिफायरमा भैरहवा ग्ल्याडियटर्सविरुद्ध पाँचौं नम्बरमा ब्याटिङ गर्दै अविजित ४० रन बनाएका थिए । पोखरालाई ओपनर लेभी र विपिनले पहिलो विकेटका लागि ३.३ ओभरमा ३७ रनको साझेदारी गर्दै राम्रे सुरुवात दिलाएका थिए । लेभी करिम जन्नतको चौथो ओभरको तेस्रो बलमा दीलिप नाथबाट मिडअनमा क्याच आउट हुन पुगेका थिए ।

कमलसिंह ऐरीको पाँचौं ओभरको पाँचौं बलमा युवा ब्याटर रित गौतम हासिम अन्सारीबाट मिडअफमा २ रनमा क्याच आउट भए । साहन अर्चाचिगे क्रिजमा आएका छन् । पोखरा र चितवन दुबैले आजको खेलमा टोलीमा परिवर्तन गरेका छैनन् । लिग र क्वालिफायर खेलमा चितवनले पोखरालाई समान ९ विकेटले पराजित गरेको थियो ।

चितवन शीर्ष स्थानमा रहँदै क्वालिफायरमा पोखरालाई पराजित गर्दै फाइनलमा स्थान बनाएको थियो । पोखराले दोस्रो क्वालिफायरमा भैरहवा ग्ल्याडियटर्सलाई ७ विकेटले स्तब्ध पार्दै फाइनलमा चितवनसँग भेट पक्का गरेको थियो