एजेन्सी – कुनैपनि खेलाडी राम्रो लयमा छ भने कठिन बललाई पनि बाउन्ड्रीमा सजिलै परिणत गर्नसक्छ । तर खराब लयबाट गुजिएको समयमा सहज बल पनि कठिन लाग्दै खराब सटका साथ आउट हुनसक्छ । खेलाडीको जीवनमा लय र खराब प्रदर्शन सामान्य मानिन्छ । करिअरमा उतारचढाव आउने जाने गर्दछ ।

टि२० विश्वकप २०२१ आइतबारदेखि संयुक्त अरव इमिरेट्स (युएई) र ओमानमा सुरु भइसकेको छ । नोभेम्बर १४ सम्म चल्ने विश्वकपमा १६ टोलीको सहभागी छ । पहिलो चरणको समूह ए मा आयरल्यान्ड, नामिबिया, नेदरल्यान्ड्स र श्रीलंका छन् । समूह बी मा बंगलादेश, ओमान, पपुवा न्युगिनी र स्कटल्यान्ड छन् । समूह बी का सम्पूर्ण खेलहरु ओमानमा हुनेछन् ।

पहिलो चरणको समूह ए र बी बाट शीर्ष दुई दुई टोली सुपर १२ मा स्थान बनाउनेछन् । सुपर १२ को समूह ए मा अष्ट्रेलिया, इंग्ल्यान्ड, वेस्टइन्डिज, दक्षिण अफ्रिका, पहिलो चरणको समूह ए को विजेता र समूह बी को उपविजेता रहनेछन् । समूह बी मा भारत, पाकिस्तान, न्युजिल्यान्ड, अफगानिस्तान, समूह बी को विजेता र समूह ए को उपविजेता रहनेछन् । शीर्ष दुई दुई टोली सेमिफाइनलमा पुग्नेछन् । पहिलो चरणको समूह ए र बी को खेलपछि सुपर १२ का खेलहरु सुरु हुनेछन् ।

टि२० विश्वकप पाँच वर्षपछि हुँदैछ । त्यसैले हरेक खेलाडीलाई यो विश्वकप निकै महत्वपूर्ण छ । खेलाडी पनि विश्वकपमा आफ्नो प्रदर्शन देखाउन आतुर छन् । टि२० आई सिरिज र फ्रेन्चाइज लिगमा हाबी हुँदै आएका खेलाडीको असली परिक्षा विश्वकपमा हुनेछ । खेलाडीले राम्रो प्रदर्शन गर्न सक्ने वा नसक्नेमा पछिल्लो समयको लय र प्रदर्शनले प्रभाव पार्ने गर्दछ ।

टोलीको नतिजा र स्तरले पनि खेलाडीको प्रदर्शनमा प्रत्यक्ष वा अप्रत्यक्ष रुपमा प्रभाव पाने गर्दछ । विश्वकपमा सहभागी सम्पूर्ण खेलाडीको लय, प्रदर्शन गर्न सक्ने क्षमता, ब्याटिङक्रम लगायत सम्पूर्ण पक्षलाई हेर्दा यी पाँच खेलाडीले सर्वाधिक रन बनाउन सक्छन् ।

५.ग्लेन फिलिप्स (न्युजिल्यान्ड)

२४ वर्षिय विकेटकिपर ग्लेन फिलिप्स न्युजिल्यान्डका प्रमुख ब्याटर हुन् । ग्लेन फिलिप्सको आगमनले न्युजिल्यान्डको ब्याटिङ लाइनअप मजबुत मात्र बनेको छैन उपाधिको दाबेदारनै बनेको छ । फ्रेन्चाइज लिगमा ओपनरको भूमिकामा देखिने फिलिप्स न्युजिल्यान्डको जर्सीमा तेस्रो र चौथो नम्बरमा ब्याटिङ गर्दै आएका छन् । फिलिप्स आक्रामक ब्याटिङ र ठूला सटका लागि चर्चित युवा स्टार हुन् ।

फिलिप्सले २५ टि२० आईमा १ शतक सहित ५ सय ६ रन बनाएका छन् । १ सय ४७ टि२० खेलमा उनले ४ शतक र २५ अर्धशतक सहित ४ हजार २४ रन बनाएका छन् । २०२० नोभेम्बरमा फिलिप्सले वेस्टइन्डिजविरुद्ध १ सय ८ रनको शतकीय इनिङ खेलेका थिए । यस सिजनको आइपिएल राजस्थान रोयल्सबाट खेलेका थिए । फिलिप्समा ब्याटिङको जिम्मेवारी पनि बढि हुनेछ ।

शीर्ष चार भित्र ब्याटिङ गर्ने हुँदा ठूलो इनिङ खेल्ने राम्रो अवसर पाउने छन् । फ्रेन्चाइज लिग र न्युजिल्यान्डको टोलीबाट सानदार प्रदर्शन गर्दै आएका छन् । फिलिप्सले टि२० विश्वकपमा सानदार प्रदर्शनका साथ सर्वाधिक रन बनाउने ब्याटर बन्न सक्छन् ।

४. बाबर आजम (पाकिस्तान)

पाकिस्तानका कप्तान बाबर आजम क्लासिक ब्याटर हुन् । जिम्मेवारीले भरिपूर्ण बाबरले पाकिस्तानको टोलीबाट तीनै शैलीमा उच्च प्रदर्शन गर्दै आएका छन् । विश्व टि२० आई वरियता दोस्रो स्थानमा रहेका बाबर आफ्नो उत्कृष्ट प्रदर्शनमा पाकिस्तानलाई दोस्रो टि२० विश्वकप उपाधि जिताउने सोचमा छन् ।

बाबरले पाकिस्तानबाट टि२० क्रिकेटमा ओपनिङ गर्दै आएका छन् । ठूलो इनिङको लागि चिनिने बाबरको कभर डाइभ सटले सबैलाई आर्कषित पार्ने गर्दछ । बाबरले ६१ टि२० आई खेलमा १ शतक र २० अर्धशतक सहित २ हजार २ सय ४ रन बनाएका छन् । १ सय ९६ टि२० खेलमा बाबरले ६ शतक र ५९ अर्धशतक सहित कुल ७ हजार ५५ रन जोडेका छन् । बाबरको मुख्य खुबी परिपक्क र जिम्मेवारी ब्याटिङ हो ।

बाबरले घरेलु र अन्तर्राष्ट्रिय दुबै खेलहरुमा लगातार रन बनाउँदै आएका छन् । गत अप्रिलमा दक्षिण अफ्रिकाले प्रस्तुत गरेको २ सय ४ रनको विजयी लक्ष्य पछ्याउनेक्रममा बाबरले १ सय २२ रनको उत्कृष्ट शतकीय इनिङ खेलेका थिए । जुलाईमा इग्ल्यान्डविरुद्ध २ सय ३२ रन बनाउन बाबरले पहिलो टि२० खेलमा ८५ रनको इनिङ खेलेका थिए ।

दुई साता सम्पन्न अघि पाकिस्तानको नेशलन टि२० कपमा पनि एक शतक सहित उत्कृष्ट प्रदर्शन गरेका थिए । अर्कोतर्फ पाकिस्तानले एक दशक भन्दा लामो समय देखि यूएईलाई घरेलु मैदान बनाउँदै आएको हुँदा बाबरलाई थप फाइदा पुग्नेछ । बाबरको लय, जिम्मेवारी र खेल्ने शैलीलाई देख्दा सर्वाधिक रन बनाउने खेलाडी बन्न सक्छन् ।

३.ग्लेन म्याक्सवेल (अष्ट्रेलिया)

अष्ट्रेलिया विष्फोटक ब्याटर ग्लेन म्याक्सवेल उच्च लयमा छन् । म्याक्सवेल अष्ट्रेलिया टोलीका प्रमुख ब्याटर हुन् । म्याक्सवेल आफ्नो आक्रामक ब्याटिङमा एकै ओभरमा खेललाई मोड्न सक्छन् । म्याक्सवेलले ७२ टि२० आई खेलमा ३ शतक र ९ अर्धशतक सहित १ हजार ७ सय ८० रन बनाएका छन् ।

२०१६ मा म्याक्सवेलले श्रीलंकाविरुद्ध १ सय ४५ रनको उत्कृष्ट इनिङ खेलेका थिए । रिभर्सस्वीप र स्विचहिटका लागि म्याक्सवेल माहिर छन् । म्याक्सवेल ठूला ठूला सटको क्षमता राख्छन् । म्याक्सवेलले अष्ट्रेलिया टोलीबाट चौथो नम्बरमा ब्याटिङ गर्नेछन् । युएईको पिच स्पिनर सहयोगी देखिएको छ । तर म्याक्सवेल स्पिनरमाथि झन आक्रामक रुपमा प्रस्तुत हुँदै आएका छन् ।

अर्कोतर्फ उच्च लयमा छन् । यसै साता आइपिएलमा बेंगलोरबाट उनले पछिल्ला ६ खेल मध्य चार खेलमा अर्धशतक प्रहार गरेका थिए । म्याक्सवेल आइपिएलको लयलाई निरन्तरता दिएमा टि२० विश्वकपमा सर्वाधिक रन बनाउने ब्याटर बन्न सक्छन् ।

२.लोकेश राहुल (भारत)

लोकेश राहुल भारतका भरपर्दा ब्याटर हुन् । सम्भव त लोकेशले भारतको ओपनिङ गर्नेछन् । राहुलको ब्याटिङ क्लासछ । भारतीय टोलीबाट राहुलले उत्कृष्ट प्रदर्शन गर्दै आएका छन् । आइपिएलमा पन्जाब किंग्सका कप्तान समेत रहेका राहुलले लगातार उत्कृष्ट प्रदर्शन गर्दै आएका छन् ।

राहुलले ४९ टि२० आई खेलमा २ शतक र १२ अर्धशतक सहित १ हजार ५ सय ५७ रन बनाएका छन् । १ सय ६५ टि२० खेलमा राहुलले ४ शतक र ४५ अर्धशतक सहित ५ हजार ४ सय ६८ रन बनाएका छन् । राहुल सुरुवाती समय लिन चाहन्छन् । पछिल्ला चार आइपिएल संस्करणमा राहुलले सहजै ५ सय माथि कटाएका छन् । गत वर्षका ओरेन्ज क्याप विजेता हुन् ।

राहुल आफ्नो विकेट हतपत गुमाउँदैनन् । आइपिएल अन्तिम खेलमा चेन्नई सुपर किंग्सविरुद्ध ४२ बलमा ७ चौका र ८ छक्का सहित अविजित ९८ रनको इनिङ खेलेका थिए । राहुल टोलीको आवश्यक अनुसार विष्फोटक र संयमित दुबै ब्याटिङका लागि माहिर छन् । यसले उनको मनोबलमा झन बढी प्रभाव पार्नेछ । राहुल टि२० विश्वकपमा सर्वाधिक रन बनाउने ब्याटर बन्न सक्छन् ।

१.मोहम्मद रिजवान (पाकिस्तान)

पाकिस्तानका विकेटकिपर ओपनर मोहम्मद रिजवान आफ्नो करिअरकै उच्च लयमा छन् । पाकिस्तानबाट लगातार उत्कृष्ट प्रदर्शन गर्दै आएका रिजवानले ४३ टि२० आई खेलमा १ शतक र ८ अर्धशतक सहित १ हजार ४४ रन बनाएका छन् । यस वर्ष (२०२१) मा रिजवानले १७ खेलमा १ शतक र ७ अर्धशतक सहित ७ सय ५२ रन बनाएका छन् । यसले पनि उनको लय स्पष्ट हुन्छ ।

उनले प्रहार गरेका ८ मध्य ५ अर्धशतक अविजित छन् । गत फेब्रुअरीमा दक्षिण अफ्रिकाविरुद्ध १ सय ४ रनको अविजित इनिङ खेलेका थिए । रिजवान टोलीको आवश्यक अनुसार आक्रामक ब्याटिङ पनि गर्ने गर्दछन् । अर्कोतर्फ यूएई पछिल्लो एक दशकदेखि घरेलु मैदान हुँदा उनलाई सहज पनि हुनेछ ।

दोस्रो पटक टि२० विश्वकप जित्ने सोचमा रहेको पाकिस्तानलाई रिजवानको प्रर्दशन निकै महत्वपूर्ण हुनेछ । अर्कोतर्फ ओपनर बाबर आजमसँग रिजवानको साझेदारी र तालमेल राम्रो हुँदै आएको छ । १५ टि २० आई खेलमा साझेदारी गर्दा तीन पटक शतकीय र तीन पटक ५० माथिको साझेदारी गरेका छन् । रिजवानले आफ्नो लय र यूएईको पिच बारे भरपूर्ण फाइदा उठाउन सक्छन् ।