एजेन्सी – तीव्र गतिका बलर कर्टिस क्याम्फरको लगातार चार बलमा चार विकेटको सहयोगमा आयरल्यान्डले आइसिसी टि२० विश्वकप २०२१ मा विजयी सुरुवात गरेको छ । सोमबार समूह ए मा रहेको आयरल्यान्डले नेदरल्यान्ड्सलाई ७ विकेटले पराजित गर्दै विश्वकपमा विजयी सुरुवात गरेको हो ।
जितको लागि १ सय ७ रनको सामान्य विजयी लक्ष्य पछ्याएको आयरल्यान्ड्सले १५.१ ओभरमा ३ विकेट गुमाउँदै पूरा गर्यो । आयरल्यान्डको जितमा ग्रेथ डेलानीले २९ बलमा ५ चौका र २ छक्का सहित ४४ रनको योगदान दिए ।
ओपनर पाउल स्टर्लिङ ३९ बलमा १ चौका र १ छक्का सहित ३० रनमा अविजित रहे । कर्टिस क्याम्फर ७ रनमा अविजित रहे । ओपनर केभिन ओ ब्रायन ९ र कप्तान एन्डी बालबर्नी ८ रनमा आउट भए । नेदरल्यान्ड्सका फर्द क्लासेन, पिटर सिलार र ब्रेन्डन ग्लोभरले १–१ विकेट लिए ।
यसअघि आबूधाबीमा टस जितेर ब्याटिङको रोजेको नेदरल्यान्ड्स निर्धारित २० ओभरमा १ सय ६ रनमा अल आउट भएको थियो । नेदरल्याड्सका ओपनर म्याक्स ओडाउडले ४७ बलमा ७ चौका सहित सर्वाधिक ५१ रन बनाए । कप्तान पिटर सिलारले २१ र भान बिकले ११ रन बनाए । अन्य कुनै पनि ब्याटरले राम्रो प्रदर्शन गर्न सकेनन् ।
कर्टिसले नेदरल्यान्ड्सविरुद्ध १० औं ओभरमा यस सफलता हात पारेका हुन् । कर्टिसले दशौं ओभरको दोस्रो बलमा कोलिन एकरमनलाई निल रकबाट ११ रनमा क्याच आउट गराएका थिए । तेस्रो बलमा रायन टेन डेस्काटेलाई शून्यमा एलबीडब्लू आउट गरे । चौथो बलमा स्कर्ट एडवाड्र्सलाई शून्यमा एलबीडब्लू आउट गर्दै ह्याट्रिक पूरा गरेका थिए । पाँचौं बलमा रोलेफ भान मर्वेलाई शून्यमा बोल्ड गरे । तीनै खेलाडी गोल्डेन डक पेभिलिएन फर्किए ।
टि२० आई चार बलमा लगातार चार विकेट लिने कर्टिस तेस्रो खेलाडी हुन् । यसअघि २०१९ मा अफगानिस्तानका स्पिनर राशिद खानले आयरल्यान्डविरुद्ध चार बलमा चार विकेट लिएका थिए । २०१९ मानै श्रीलंका पूर्व तीव्र गतिका बलर लासिथ मलिङ्गाले न्युजिल्यान्डविरुद्ध चार बलमा लगातार चार विकेट लिएका थिए ।
आयरल्यान्डका कर्टिस क्याम्फरले ४ ओभरमा २६ रन खर्चेर ४ विकेट लिए । मार्क आदिरले ४ ओभरमा ९ रन खर्चेर ३ विकेट लिए । जोश लिटिलको नाममा १ विकेट रह्यो । आयरल्यान्डले आफ्नो दोस्रो खेलमा बुधबार श्रीलंकासँग खेल्नेछ । नेदरल्यान्ड्सले बुधबारनै नामिबियासँग खेल्नेछ । आजको दोस्रो खेलमा नामिबिया र श्रीलंकाबीच प्रतिस्पर्धा हुँदैछ ।
पहिलो चरणको समूह ए मा आयरल्यान्ड, नामिबिया, नेदरल्यान्ड्स र श्रीलंका छन् । समूह बी मा बंगलादेश, ओमान, पपुवा न्युगिनी र स्कटल्यान्ड छन् । समूह बी का खेलहरु ओमानमा हुनेछन् । नामिबिया र पपुवा न्युगिनीले पहिलो पटक टि२० विश्वकप खेलेका हुन् । पहिलो चरणको समूह ए र बी बाट शीर्ष दुई दुई टोली सुपर १२ मा स्थान बनाउनेछन् ।
सुपर १२ को समूह ए मा अष्ट्रेलिया, इंग्ल्यान्ड, वेस्टइन्डिज, दक्षिण अफ्रिका, पहिलो चरणको समूह ए को विजेता र समूह बी को उपविजेता रहनेछन् । समूह बी मा भारत, पाकिस्तान, न्युजिल्यान्ड, अफगानिस्तान, समूह बी को विजेता र समूह ए को उपविजेता रहनेछन् । शीर्ष दुई दुई टोली सेमिफाइनलमा पुग्नेछन् । पहिलो चरणका खेलहरु सकिएपछि सुपर १२ का खेलहरु हुनेछन् । विश्वकपको फाइनल १४ नोभेम्बरमा हुनेछ ।
