एजेन्सी – आइसिसी टि२० विश्वकप अघि वार्मअप खेलमा पाकिस्तानले पहिलो वार्मअप खेलमा वेस्टइन्डिजलाई ७ विकेटले पराजित गरेको छ । जितको लागि १ सय ३१ रनको विजयी लक्ष्य पछ्याएको पाकिस्तानले १५.३ ओभरमा ३ विकेटको क्षतिमा पूरा गर्यो ।

पाकिस्तानका कप्तान बाबर आजमले ४१ बलमा ६ चौका र १ छक्का सहित सर्वाधिक ५० रनको योगदान दिए । फखर जमान २४ बलमा ४ चौका र २ छक्का सहित ४६ रनमा अविजित रहे । ओपनर मोहम्मद रिजवान १३ र मोहम्मद हफिज शून्यमा आउट भए । शोएब मलिक १४ रनमा अविजित रहे । वेस्टइन्डिजका स्पिनर हेडन वाल्श जुनियरले सर्वाधिक २ विकेट लिए । रवि रामपाउलको नाममा १ विकेट रह्यो ।

त्यसअघि आइसिसी एकेडेमी दुबईमा टस जितेर पहिला ब्याटिङ थालेको वेस्टइन्डिजले निर्धारित २० ओभरमा ७ विकेट गुमाउँदै १ सय ३० रन बनाएको थियो । वेस्टइन्डिजका शिम्रन हेटमायरले २४ बलमा ३ चौका सहित सर्वाधिक २८ रनको योगदान दिए । कप्तान काइरन पोलार्ड १० बलमा ५ चौका सहित २३ रनमा अविजित रहे ।

तीव्र गतिका बलर हसन अलीले तेस्रो ओभरको पाँचौं बलमा ओपनर आन्द्रे फ्लेचरलाई २ रनमा बोल्ड आउट गरेका थिए । शाहिन शाह अफ्रिदीले अर्का ओपनर लेन्डन सिमन्सलाई छैटौं ओभरको अन्तिम बलमा १८ रनमा क्याच आउट गराए । सिमन्सले २३ बलमा ३ चौका प्रहार गरे ।

रोश्टन चेश ९ रनमा क्याच आउट भए । हरिस रौफले १४ औं ओभरको पहिलो बलमा क्रिस गेललाई २० रनमा बोल्ड आउट गरेका थिए । गेलले ३० बलमा २ चौका प्रहार गरे । निकोलस पुरन १३ बलमा १ छक्का सहित १३ रनमा आउट भएका थिए ।

पाकिस्तानका हसन अलीले ४ ओभरमा २१ रन खर्चेर २ विकेट लिए । हरिस रौफ र शाहिन शाह अफ्रिदीले २–२ विकेट लिए । इमाद वासिमको नाममा १ विकेट रह्यो । पाकिस्तानले आफ्नो दोस्रो वार्मअप खेलमा बुधबार दक्षिण अफ्रिकासँग खेल्नेछ ।

बुधबारनै वेस्टइन्डिजले अफगानिस्तानसँग वार्मअप खेल खेल्नेछ । टि२० विश्वकप तयारी स्वरुप वार्मअप खेल खेलेका हुन् । टि२० विश्वकपका पहिलो चरणका खेलहरु सुरु भएका छन् ।