एजेन्सी – आइसिसी टि२० विश्वकप अघि इंग्ल्यान्डले वार्मअप खेलमा भारतलाई १ सय ८९ रनको बलियो लक्ष्य दिएको छ । आइसिसी एकेडेमी ग्राउन्ड दुबईमा टस हारेर ब्याटिङको निम्तो पाएको इंग्ल्यान्डले निर्धाारित २० ओभरमा ५ विकेट गुमाउँदै १ सय ८८ रन बनायो ।

इंग्ल्यान्डका जोनी बेयरस्टोले ३६ बलमा ४ चौका र १ छक्का सहित सर्वाधिक ४९ रनको योगदान दिए । मोईन अली २० बलमा ४ चौका र २ छक्का सहित ४३ रनमा अविजित रहे । मोईन अलीले तीव्र गतिका बलर भुवनेश्वर कुमारलाई अन्तिम ओभरको पाँचौं र छैटौं बलमा लगातार छक्का प्रहार गर्दै बलियो योगफलमा पुर्याएका थिए ।

इंग्ल्यान्डलाई ओपनर जेसन रोय र जोनी बेयरस्टोले ३.४ ओभरमा ३६ रनको साझेदारी गर्दै सुरुवात दिलाएका थिए । तीव्र गतिका बलर मोहम्मद शामीले बटलरलाई १८ रनमा बोल्ड आउट गर्दै भारतलाई पहिलो सफलता दिलाए । कप्तान बटलरले १३ बलमा ३ चौका प्रहार गरे । शामीको छैटौं ओभरको तेस्रो बलमा रोय १७ रनमा जस्प्रित बुमराहबाट समातिन पुगे ।

डेविड मलान १८ बलमा ३ चौका सहित १८ रनमा बोल्ड आउट भए । मलान स्पिनर राहुल चाहरको बलमा बोल्ड हुन पुगेका थिए । शामीले १५ औं ओभरको पाँचौं बलमा लियाम लिभिङस्टोनलाई ३० रनमा बोल्ड आउट गरे । लिभिङस्टोनले २० बलमा ४ चौका र १ छक्का प्रहार गरे ।

भारतका मोहम्मद शामीले ४ ओभरमा ४० रन खर्चेर ३ विकेट लिए । जस्प्रित बुमराह र राहुल चाहरले १–१ विकेट लिए ।