एजेन्सी – स्पिनर सकिब अल हसन र तीव्र गतिका बलर मुश्ताफिजुर रहमानको उत्कृष्ट प्रदर्शनमा बंगलादेशले आइसिसी टि२० विश्वकप २०२१ मा घरेलु टोली ओमानलाई २६ रनले पराजित गरेको छ । समूह बी मा रहेको बंगलादेशले आफ्नो दोस्रो खेलमा ओमानलाई पराजित गर्दै सुपर १२ को सम्भावना जीवित राखेको छ ।

जितको लागि १ सय ५४ रनको विजयी लक्ष्य पछ्याएको ओमानले २० ओभरमा ९ विकेट गुमाउँदै १ सय २७ रन बनायो । ओमानका ओपनर जतिन्दर सिंहले ३३ बलमा ४ चौका र १ छक्का सहित सर्वाधिक ४० रनको योगदान दिए । कश्याप प्रजापतीले १८ बलमा १ चौका र २ छक्का सहित २१ रन बनाए ।

एक समय ओमानले राम्रो सुरुवात गर्नेक्रममा ११ ओभरमा ८०–२ को अवस्थामा रहँदै बंगलादेशलाई दबाबमा राखेको थियो । त्यसपछिका ब्याटर चल्न नसक्दा ओमान एक खेल अगावै सुपर १२ मा पुग्ने अवसर गुमाएको छ । जिशान मकसुद १२, अयान खान ९, कलिमुल्लाह ५, सन्दीप गौड र नसिम खुशी ४–४ रनमा आउट भए । मोहम्मद नदीम १२ बलमा १ चौका र १ छक्का सहित १४ रनमा अविजित रहे ।

बंगलादेशका तीव्र गतिका बलर मुश्ताफिजुर रहमानले ४ ओभरमा ३६ रन खर्चेर ४ विकेट लिए । स्पिनर सकिब अल हसनले ४ ओभरमा २८ रन खर्चेर ३ विकेट लिए । मोहम्मद सैफद्दीन र माहेदी हसनले १-१ विकेट लिए ।

त्यसअघि अल अमरेत क्रिकेट मैदानमा टस जितेर पहिला ब्याटिङ रोजेको बंगलादेश निर्धारित २० ओभरमा १ सय ५३ रनमा अल आउट भएको थियो । बंगलादेशका ओपनर मोहम्मद नईमले ५० बलमा ३ चौका र ४ छक्का सहित सर्वाधिक ६४ रनको योगदान दिए । सकिब अल हसनले २९ बलमा ६ चौका सहित ४२ रनमा रन आउट भए ।

कमजोर सुरुवात गरेको बंगलादेशलाई नईम र सकिबले तेस्रो विकेटका लागि १ सय रनको महत्वपूर्ण शतकीय साझेदारी गरेका थिए । सकिब रन आउट भएसँगै बंगलादेशले लगातार विकेट गुमाएको थियो । बंगलादेशका ८ खेलाडीले दोहोरो अंकमा रन बनाउन सकेनन् । कप्तान मोहमुदूल्लाह रियाद १० बलमा १ चौका र १ छक्का सहित १७ रनमा आउट भए । लिटन दास ६, माहेदी हसन शून्य, नुरुल हसन ३ र मुश्फिकुर रहिम ६ रनमा आउट भए ।

ओमानका तीव्र गतिका बलर बिलाल खानले ४ ओभरमा १८ रन खर्चेर ३ विकेट लिए । अर्का तीव्र गतिका बलर फैज बुटले ४ ओभरमा ३० रन खर्चेर ३ विकेट लिए । कलिमुल्लाहले २ र जिशान मकसुदको नाममा १ विकेट रह्यो ।

पहिलो चरणको समूह बीमा रहेको स्कटल्यान्ड २ खेलमा ४ अंकका साथ शीर्ष स्थानमा छ । ओमान २ खेलमा १ मा जित र १ मा हार सहित २ अंक जोड्दै दोस्रो स्थानमा छ । बंगलादेश २ खेलमा १ मा जित र १ मा हार सहित २ अंकका साथ नेटरनरेटको आधारमा तेस्रो स्थानमा छ । पपुवा न्युगिनी सुरुवाती दुई दुबै खेलमा हारका साथ समूह चरणबाटै बाहिरिने पहिलो टोली बनेको छ ।

बंगलादेशले बिहीबार पपुवा न्युगिनीसँग खेल्नेछ । बंगलादेशले उक्त खेलमा फराकिलो जित निकाल्नुपर्ने हुन्छ । पराजित भएमा स्वत बाहिरिने छ । बंगलादेश फराकिलो जितले मात्र सुपर १२ मा पुग्ने छैन । अन्य टोलीको नतिजामा पनि भर पनुपर्ने हुन्छ । स्कटल्यान्डले बिहीबारनै ओमानसँग खेल्नेछ । स्कटल्यान्ड विजयी भएमा शीर्ष स्थानमा रहँदै सुपर १२ को समूह बीमा स्थान बनाउने छ । स्कटल्यान्ड विजयी भएमा र बंगलादेश अन्तिम खेलमा जितका साथ सुपर १२ मा सोझैं पुग्नेछ । ओमान विजयी भएमा नेटरनरेटको आधारमा सुपर १२ मा पुग्ने दुई टोलीको टुङ्गो लाग्नेछ ।

पहिलो चरणको समूह ए मा आयरल्यान्ड, नामिबिया, नेदरल्यान्ड्स र श्रीलंका छन् । समान १ खेल खेल्दा श्रीलंका २ अंकका साथ शीर्षस्थानमा छ । आयरल्यान्डको २ अंक भएपनि नेटरनरेटका आधारमा दोस्रो स्थानमा छ । नेदरल्यान्ड्स र नामिबिया अंक बिहिन हुँदै तेस्रो र चौथो स्थानमा छन् ।

समूह बी मा बंगलादेश, ओमान, पपुवा न्युगिनी र स्कटल्यान्ड छन् । पहिलो चरणको समूह ए र बी बाट शीर्ष दुई दुई टोली सुपर १२ मा स्थान बनाउनेछन् ।सुपर १२ को समूह ए मा अष्ट्रेलिया, इंग्ल्यान्ड, वेस्टइन्डिज, दक्षिण अफ्रिका, पहिलो चरणको समूह ए को विजेता र समूह बी को उपविजेता रहनेछन् ।

समूह बी मा भारत, पाकिस्तान, न्युजिल्यान्ड, अफगानिस्तान, समूह बी को विजेता र समूह ए को उपविजेता रहनेछन् । शीर्ष दुई दुई टोली सेमिफाइनलमा पुग्नेछन् । पहिलो चरणका खेलहरु सकिएपछि सुपर १२ का खेलहरु हुनेछन् । विश्वकपको फाइनल १४ नोभेम्बरमा हुनेछ ।