एजेन्सी – पूर्व दक्षिण अफ्रिकी क्रिकेटर डेविड विसेको सानदार ब्याटिङसँगै नामिबियाले आइसिसी टि२० विश्वकपमा पहिलो जित निकालेको छ । समूह ए मा रहेको नामिबियाले नेदरल्यान्ड्सलाई ६ विकेटले पराजित गर्दै सुपर १२ को सम्भावना कायमै राखेको छ । लगातार दोस्रो हारसँगै नेदरल्यान्ड्स भने समूह चरणबाटै बाहिरिएको छ ।

जितको लागि १ सय ६५ रनको विजयी लक्ष्य पछ्याएको नामिबियाले १९ ओभरमा ४ विकेटको क्षतिमा पूरा गर्यो । नामिबिया जितमा डेविड विसे ४० बलमा ४ चौका र ५ छक्का सहित सर्वाधिक ६६ रनमा अविजित रहे । जेजे स्मित ८ बलमा २ चौका सहित १४ रनमा अविजित रहे । कप्तान गेरहार्ड इरास्मस २२ बलमा ४ चौका र १ छक्का सहित ३२ रनमा आउट भए ।

ओपनर स्टेफन ब्राड १९, जेनी ग्रिन १५ र क्रेग विलियम्स ११ रनमा आउट भए । नेदरल्यान्ड्सका फर्द क्लासेन, कोलिन एक्रमन, पिटर सिलार र टिम भान डर गुग्टेनले १–१ विकेट लिए ।

त्यसअघि आबूधाबीमा टस हारेर ब्याटिङको निम्तो पाएको नेदरल्यान्ड्सले निर्धारित २० ओभरमा ४ विकेट गुमाउँदै १ सय ६४ रन बनाएको थियो । नेदरल्यान्ड्सका ओपनर म्याक्स ओडाउडले ५६ बलमा ६ चौका र १ छक्का सहित सर्वाधिक ७० रनको इनिङ खेलेपनि टोलीलाई जिताउन सकेनन् । कोलिन एक्रमन ३५ र स्कर्ट एडवाड्र्सले २१ रनको योगदान दिए । नामिबिया जन फ्रिलिंकले सर्वाधिक २ विकेट लिए । डेविड विसेको नाममा १ विकेट रह्यो ।

नेदरल्यान्ड्स पहिलो खेलमा आयरल्यान्ड्सँग ७ विकेटले पराजित भएको थियो । नेदरल्यान्ड्सले आफ्नो अन्तिम खेल शुक्रबार श्रीलंकासँग खेल्नेछ । नामिबिया पहिलो खेलमा श्रीलंकासँग ७ विकेटले पराजित भएको थियो । नामिबयाले आफ्नो अन्तिम खेलमा शुक्रबार आयरल्यान्ड्सँग खेल्नेछ । आजको खेलमा आयरल्यान्ड श्रीलंकासँग पराजित भएमा र अन्तिम खेलमा नामिबियाले जित निकालेको खण्डमा सुपर १२ मा पुग्नेछ ।

पहिलो चरणको समूह ए मा आयरल्यान्ड, नामिबिया, नेदरल्यान्ड्स र श्रीलंका छन् । श्रीलंका १ खेलमा २ अंकका साथ शीर्षस्थानमा छ । आयरल्यान्डको १ खेलमा २ अंक भएपनि नेटरनरेटका आधारमा दोस्रो स्थानमा छ । नामिबिया २ खेलमा १ मा जित र १ मा हार सहित तेस्रो स्थानमा छ । दुबै खेलमा हारका साथ नेदरल्यान्ड्स बाहिरिएको छ ।

समूह बी मा बंगलादेश, ओमान, पपुवा न्युगिनी र स्कटल्यान्ड छन् । पहिलो चरणको समूह बीमा रहेको स्कटल्यान्ड २ खेलमा ४ अंकका साथ शीर्ष स्थानमा छ । ओमान २ खेलमा १ मा जित र १ मा हार सहित २ अंक जोड्दै दोस्रो स्थानमा छ । बंगलादेश २ खेलमा १ मा जित र १ मा हार सहित २ अंकका साथ नेटरनरेटको आधारमा तेस्रो स्थानमा छ । पपुवा न्युगिनी सुरुवाती दुई दुबै खेलमा हारका साथ समूह चरणबाटै बाहिरि सकेको छ ।

पहिलो चरणको समूह ए र बी बाट शीर्ष दुई दुई टोली सुपर १२ मा स्थान बनाउनेछन् । सुपर १२ को समूह ए मा अष्ट्रेलिया, इंग्ल्यान्ड, वेस्टइन्डिज, दक्षिण अफ्रिका, पहिलो चरणको समूह ए को विजेता र समूह बी को उपविजेता रहनेछन् ।

समूह बी मा भारत, पाकिस्तान, न्युजिल्यान्ड, अफगानिस्तान, समूह बी को विजेता र समूह ए को उपविजेता रहनेछन् । शीर्ष दुई दुई टोली सेमिफाइनलमा पुग्नेछन् । पहिलो चरणका खेलहरु सकिएपछि सुपर १२ का खेलहरु हुनेछन् । विश्वकपको फाइनल १४ नोभेम्बरमा हुनेछ ।