एजेन्सी – कप्तान रोहित शर्माको अर्धशतकको सहयोगमा भारतले आइसिसी टि२० विश्वकप २०२१ अघि वार्मअप खेलमा अष्ट्रेलियालाई ९ विकेटले पराजित गरेको छ । योसँगै टि२० विश्वकपको लागि दुबै टोलीको तयारी पूरा भएको छ ।

जितको लागि १ सय ५३ रनको सामान्य विजयी लक्ष्य पछ्याएको भारतले १७.५ ओभरमा १ विकेट गुमाउँदै पूरा गर्यो । भारतका रोहित शर्मा ४१ बलमा ५ चौका र ३ छक्का सहित ६० रनमा रिटायर्ट हर्ट भएका थिए । ओपनर लोकेश राहुल ३१ बलमा २ चौका र ३ छक्का सहित ३९ रनमा आउट भए ।

पहिलो विकेटका लागि राहुल र रोहितले ९.२ ओभरमा ६८ रनको साझेदारी गर्दै राम्रो सुरुवात दिलाएका थिए । सूर्यकुमार यादव २७ बलमा ५ चौका र १ छक्का सहित ३८ रनमा अविजित रहे । हार्दिक पान्ड्या १४ रनमा अविजित रहे । अष्ट्रेलिया एश्टन अगरले १ विकेट लिए ।

त्यसअघि आइसिसी एकेडेमी ग्राउन्ड दुबईमा टस जितेर पहिला ब्याटिङ रोजेको अष्ट्रेलियाले निर्धारित २० ओभरमा ५ विकेटको क्षतिमा १ सय ५२ रन बनाएको थियो । अष्ट्रेलिया स्टिभ स्मिथले ४८ बलमा ७ चौका सहित सर्वाधिक ५७ रनको योगदान दिए । मार्कस स्टोइनिस २५ बलमा ४ चौका र १ छक्का सहित ४१ रनमा अविजित रहे ।

ओपनर डेविड वार्नरको खराब लय रोकिन सकेन । स्पिनर रविचन्द्रन आश्विनको दोस्रो ओभरको पाँचौं बलमा वार्नर १ रनमा एलबीडब्लू आउट भए । लगत्तै अर्को बलमा मिचेल मार्श शून्यमा रोहित शर्माबाट क्याच आउट हुन पुगे ।

चौथो ओभरको पहिलो बलमा रविन्द्र जडेजाले कप्तान आरोन फिन्चलाई ८ रनमा एलबीडब्लू आउट गर्दा अष्ट्रेलिया ११–३ को कमजोर अवस्थामा पुगेको थियो । चौथो विकेटका लागि स्टिभ स्मिथ र ग्लेन म्याक्सवेलले ६१ रनको साझेदारी गर्दै इनिङ सम्हाल्लेका थिए । म्याक्सवेललाई राहुल चाहरले ३७ रनमा बोल्ड आउट गरे । म्याक्सवेलले २८ बलमा ५ चौका प्रहार गरे ।

पाँचौं विकेटका लागि स्मिथ र स्टोइनिसले ७६ रनको महत्वपूर्ण साझेदारी गरेका थिए । म्याथ्यु वेड ४ रनमा अविजित रहे । भारतका स्पिनर रविचन्द्रन आश्विनले २ ओभरमा ८ रन खर्चेर २ विकेट लिए । राहुल चाहर, भुवनेश्वर कुमार र रविन्द्र जडेजाले १–१ विकेट लिए ।

भारत सुपर १२ को समूह बी र अष्ट्रेलिया समूह ए मा छन् । विश्वकपमा अष्ट्रेलियाले शनिबार दक्षिण अफ्रिकासँग खेल्दै सुरुवात गर्नेछ । भारतले विश्वकपमा आइतबार पाकिस्तानसँग पहिलो खेल खेल्नेछ ।

पहिलो चरणको समूह ए मा आयरल्यान्ड, नामिबिया, नेदरल्यान्ड्स र श्रीलंका छन् । श्रीलंका १ खेलमा २ अंकका साथ शीर्षस्थानमा छ । आयरल्यान्डको १ खेलमा २ अंक भएपनि नेटरनरेटका आधारमा दोस्रो स्थानमा छ । नामिबिया २ खेलमा १ मा जित र १ मा हार सहित तेस्रो स्थानमा छ । दुबै खेलमा हारका साथ नेदरल्यान्ड्स बाहिरिएको छ ।

समूह बी मा बंगलादेश, ओमान, पपुवा न्युगिनी र स्कटल्यान्ड छन् । पहिलो चरणको समूह बीमा रहेको स्कटल्यान्ड २ खेलमा ४ अंकका साथ शीर्ष स्थानमा छ । ओमान २ खेलमा १ मा जित र १ मा हार सहित २ अंक जोड्दै दोस्रो स्थानमा छ । बंगलादेश २ खेलमा १ मा जित र १ मा हार सहित २ अंकका साथ नेटरनरेटको आधारमा तेस्रो स्थानमा छ । पपुवा न्युगिनी सुरुवाती दुई दुबै खेलमा हारका साथ समूह चरणबाटै बाहिरि सकेको छ ।

पहिलो चरणको समूह ए र बी बाट शीर्ष दुई दुई टोली सुपर १२ मा स्थान बनाउनेछन् । सुपर १२ को समूह ए मा अष्ट्रेलिया, इंग्ल्यान्ड, वेस्टइन्डिज, दक्षिण अफ्रिका, पहिलो चरणको समूह ए को विजेता र समूह बी को उपविजेता रहनेछन् ।

समूह बी मा भारत, पाकिस्तान, न्युजिल्यान्ड, अफगानिस्तान, समूह बी को विजेता र समूह ए को उपविजेता रहनेछन् । शीर्ष दुई दुई टोली सेमिफाइनलमा पुग्नेछन् ।