एजेन्सी – तीव्र गतिका बलर मार्क वुड र स्पिनर आदिल राशिदको उत्कृष्ट बलिङमा इंग्ल्यान्डले आइसिसी टि२० विश्वकप अघि वार्मअप खेलमा न्युजिल्यान्डलाई १३ रनले पराजित भएको छ ।

जितको लागि १ सय ६४ रनको विजयी लक्ष्य पछ्याएको न्युजिल्यान्ड १९.२ ओभरमा १ सय ५० रनमा अल आउट भयो । न्युजिल्यान्डका ओपनर मार्टिन गुप्टिलले २० बलमा ४ चौका र ३ छक्का सहित सर्वाधिक ४१ रनको योगदान दिए । ईश सोधी १६ बलमा १ चौका र २ छक्का सहित २५ रनमा अविजित रहे । डेभन कन्वे २०, टिम साउथी १० र टोड एश्टलले १६ रन बनाए ।

एक समय १४.३ ओभरमा १०३–९ को अवस्थामा पुगेको न्युजिल्यान्डलाई अन्तिम विकेटका लागि सोधी र एश्टलले ४७ रनको साझेदारी गरेका थिए । एक समय न्युजिल्यान्ड ८.४ ओभरमा ८०–२ को बलियो अवस्थामा थियो । तर बाँकी २३ रन जोड्न ७ विकेट गुमाएपछि दयनिय अवस्थामा पुगेको थियो । न्युजिल्यान्डका टिम सिफर्ट ८, ग्लेन फिलिप्स ७, मार्क च्याम्पन १ र ड्याल मिलेच २ रनमा आउट भए ।

इंग्ल्यान्डका तीव्र गतिका बलर मार्क वुडले ४ ओभरमा २३ रन खर्चेर ४ विकेट लिए । स्पिनर आदिल राशिदले ४ ओभरमा १८ रन खर्चेर ३ विकेट लिए । लियाम लिभिङस्टोन र क्रिस वोक्सको नाममा १–१ विकेट रह्यो ।

त्यसअघि आबूधाबीमा टस हारेर ब्याटिङको निम्तो पाएको इंग्ल्यान्डले निर्धारित २० ओभरमा ६ विकेट गुमाउँदै १ सय ६३ रन बनाएको थियो । इंग्ल्यान्डका जस बटलरले ५१ बलमा ११ चौका र २ छक्का सहित सर्वाधिक ७३ रनको योगदान दिए । जोनी बेयरस्टो २१ बलमा २ चौका र २ छक्का सहित ३० रनमा आउट भए । साम बिलिंग्स १७ बलमा ३ चौका र १ छक्का सहित २७ रनमा अविजित रहे ।

पहिलो ओभरको पहिलो बलमै तीव्र गतिका बलर टिम साउथीले ओपनर जेसन रोयलाई शून्यमा बोल्ड आउट गरेका थिए । सातौं ओभरको चौथो बलमा स्पिनर ईश सोधीले डेविड मलानलाई ११ रनमा एलबीडब्लू आउट गरे । सोधीलेनै कप्तान ओईन मोर्गनलाई १० रनमा एलबीडब्लू आउट गरेका थिए ।

बटलर सोधीको १४ औं ओभरको पाँचौं बलमा काइल जेमिसनबाट समातिन पुगे । ग्लेन फिलिप्सले लियाम लिभिङस्टोनलाई १ रनमा बोल्ड आउट गरे । न्युजिल्यान्डका स्पिनर ईश सोधीले ४ ओभरमा २६ रन खर्चेर ३ विकेट लिए । टिम साउथी, लोकी फर्गुसन र ग्लेन फिलिप्सको नाममा १–१ विकेट रह्यो ।

इंग्ल्यान्ड सुपर १२ को समूह ए र न्युजिल्यान्ड समूह बी मा छन् । इंग्ल्यान्डले पहिले खेलमा शनिबार वेस्टइन्डिजसँग खेल्नेछ । न्युजिल्यान्डले मंगलबार पाकिस्तानसँग खेल्दै सुरुवात गर्नेछ ।

पहिलो चरणको समूह ए मा आयरल्यान्ड, नामिबिया, नेदरल्यान्ड्स र श्रीलंका छन् । श्रीलंका १ खेलमा २ अंकका साथ शीर्षस्थानमा छ । आयरल्यान्डको १ खेलमा २ अंक भएपनि नेटरनरेटका आधारमा दोस्रो स्थानमा छ । नामिबिया २ खेलमा १ मा जित र १ मा हार सहित तेस्रो स्थानमा छ । दुबै खेलमा हारका साथ नेदरल्यान्ड्स बाहिरिएको छ ।

समूह बी मा बंगलादेश, ओमान, पपुवा न्युगिनी र स्कटल्यान्ड छन् । पहिलो चरणको समूह बीमा रहेको स्कटल्यान्ड २ खेलमा ४ अंकका साथ शीर्ष स्थानमा छ । ओमान २ खेलमा १ मा जित र १ मा हार सहित २ अंक जोड्दै दोस्रो स्थानमा छ । बंगलादेश २ खेलमा १ मा जित र १ मा हार सहित २ अंकका साथ नेटरनरेटको आधारमा तेस्रो स्थानमा छ । पपुवा न्युगिनी सुरुवाती दुई दुबै खेलमा हारका साथ समूह चरणबाटै बाहिरि सकेको छ ।

पहिलो चरणको समूह ए र बी बाट शीर्ष दुई दुई टोली सुपर १२ मा स्थान बनाउनेछन् । सुपर १२ को समूह ए मा अष्ट्रेलिया, इंग्ल्यान्ड, वेस्टइन्डिज, दक्षिण अफ्रिका, पहिलो चरणको समूह ए को विजेता र समूह बी को उपविजेता रहनेछन् ।

समूह बी मा भारत, पाकिस्तान, न्युजिल्यान्ड, अफगानिस्तान, समूह बी को विजेता र समूह ए को उपविजेता रहनेछन् । शीर्ष दुई दुई टोली सेमिफाइनलमा पुग्नेछन् ।