एजेन्सी – शीर्षक्रमका ब्याटर रास्सी भान डर डुसेनको शतकमा दक्षिण अफ्रिकाले आइसिसी टि२० विश्वकपअघि वार्मअप खेलमा पाकिस्तानमाथि ६ विकेटको सानदार जित हात पारेको छ ।

जितको लागि १ सय ८७ रनको विजयी लक्ष्य पछ्याएको दक्षिण अफ्रिकाले निर्धारित २० ओभरमा ४ विकेटको क्षतिमा पूरा गर्यो । दक्षिण अफ्रिका जितमा रास्सी भान डर डुसेनले ५१ बलमा १० चौका र ४ छक्का सहित सर्वाधिक १ सय १ रनको अविजित शतकीय इनिङ खेले । उनले अन्तिम ओभरको अन्तिम बलमा चौका प्रहार गर्दै आफ्नो शतक र टोलीको जित पक्का गराएका थिए ।

दक्षिण अफ्रिकालाई जितको लागि अन्तिम ओभरमा १९ रन आवश्यक परेको थियो । तीव्र गतिका बलर हसन अलीलाई पहिलो बलमै डुसेनले छक्का प्रहार गरेका थिए । दोस्रो बलमा एक रन लिए । तेस्रो बलमा डेविड मिलरले छक्का प्रहार गरेपछि दक्षिण अफ्रिका जित नजिक पुगेको थियो । चौथो बलमा मिलरले एक रन लिए । डुसेनले पाँचौं र छैटौं बलमा लगातार चौका प्रहार गर्दै दक्षिण अफ्रिका जित पक्का गराए ।

दक्षिण अफ्रिका कप्तान टेम्भा बभुमाले ४२ बलमा २ चौका र २ छक्का सहित ४६ रनको योगदान दिए । ओपनर क्विन्टन डि कक ६, रिजा हेनड्रिक्स ७, हेनरिक क्लासेन १४ रनमा आउट हुँदा मिलर ८ रनमा अविजित रहे । पाकिस्तानका शाहिन शाह अफ्रिदी र इमाद वासिमले २–२ विकेट लिए ।

त्यसअघि आबूधाबीमा टस हारेर ब्याटिङको निम्तो पाएको पाकिस्तानले निर्धारित २० ओभरमा ६ विकेट गुमाउँदै १ सय ८६ रन बनाएको थियो । पाकिस्तानका फखार जमानले २८ बलमा २ चौका र ५ छक्का सहित सर्वाधिक ५२ रनमा रिटायर्ट हर्ट आउट भएका थिए । आसिफ अली १८ बलमा २ चौका र २ छक्का सहित ३२ रनमा बोल्ड आउट भए ।

तीव्र गतिका बलर कागिसो रबाडाले चौथो ओभरको पाँचौं बलमा ओपनर तथा कप्तान बाबर आजमलाई १५ रनमा बोल्ड आउट गरेका थिए । अर्का ओपनर मोहम्मद रिजवान एनरिच नोर्कियाको छैटौं ओभरको चौथो बलमा केशव महाराजबाट १९ रनमा क्याच आउट भए । रिजवानले १९ बलमा १ चौका र १ छक्का प्रहार गरे । मोहम्मद हफिज १४ बलमा १ छक्का सहित १३ रनमा क्याच आउट भए ।

अनुभवी ब्याटर शोएब मलिक २० बलमा १ चौका र १ छक्का सहित २८ रनमा क्याच आउट भए । हसन अली ११ र शादब खान ४ रनमा अविजित रहे । दक्षिण अफ्रिका तीव्र गतिका बलर कागिसो रबाडाले ४ ओभरमा २८ रन खर्चेर ३ विकेट लिए । एनरिच नोर्किया र केशव महाराजले १–१ विकेट लिए ।

पाकिस्तान सुपर १२ को समूह बी र दक्षिण अफ्रिका समूह ए मा छन् । दक्षिण अफ्रिकाले शनिबार अष्ट्रेलियासँग खेल्दै विश्वकपमा सुरुवात गर्नेछ । पाकिस्तानले आइतबार पहिलो खेल भारतसँग खेल्नेछ ।

पहिलो चरणको समूह ए मा आयरल्यान्ड, नामिबिया, नेदरल्यान्ड्स र श्रीलंका छन् । श्रीलंका २ खेलमा २ मानै जितका साथ सुपर १२ मा स्थान पक्का गरेको छ । आयरल्यान्डको २ खेलमा १ मा जित र १ मा हार सहित २ अंकका साथ दोस्रो स्थानमा छ । नामिबिया २ खेलमा १ मा जित र १ मा हार सहित तेस्रो स्थानमा छ । दुबै खेलमा हारका साथ नेदरल्यान्ड्स बाहिरिएको छ ।

समूह बी मा बंगलादेश, ओमान, पपुवा न्युगिनी र स्कटल्यान्ड छन् । पहिलो चरणको समूह बीमा रहेको स्कटल्यान्ड २ खेलमा ४ अंकका साथ शीर्ष स्थानमा छ । ओमान २ खेलमा १ मा जित र १ मा हार सहित २ अंक जोड्दै दोस्रो स्थानमा छ । बंगलादेश २ खेलमा १ मा जित र १ मा हार सहित २ अंकका साथ नेटरनरेटको आधारमा तेस्रो स्थानमा छ । पपुवा न्युगिनी सुरुवाती दुई दुबै खेलमा हारका साथ समूह चरणबाटै बाहिरि सकेको छ ।

पहिलो चरणको समूह ए र बी बाट शीर्ष दुई दुई टोली सुपर १२ मा स्थान बनाउनेछन् । सुपर १२ को समूह ए मा अष्ट्रेलिया, इंग्ल्यान्ड, वेस्टइन्डिज, दक्षिण अफ्रिका, पहिलो चरणको समूह ए को विजेता र समूह बी को उपविजेता रहनेछन् । समूह बी मा भारत, पाकिस्तान, न्युजिल्यान्ड, अफगानिस्तान, समूह बी को विजेता र समूह ए को उपविजेता रहनेछन् । शीर्ष दुई दुई टोली सेमिफाइनलमा पुग्नेछन् ।