एजेन्सी – श्रीलंकाले नेदरल्यान्ड्सलाई ८ विकेटले पराजित गर्दै आइसिसी टि२० विश्वकप २०२१ मा समूह ए को विजेता बन्दै सुपर १२ मा पुगेको छ । श्रीलंका सुपर १२ को ए मा रहनेछ ।

जितको लागि ४५ रनको सामान्य विजयी लक्ष्य पछ्याएको श्रीलंकाले ७.१ ओभरमा २ विकेटको क्षतिमा पूरा गर्यो । श्रीलंका कुशल परेरा २४ बलमा ६ चौका सहित ३३ रनमा अविजित रहे । चारिथ असलंका ६ रन र पाथुम निसंका शून्यमा आउट भए ।

त्यसअघि शारजाह क्रिकेट स्टेडियममा टस हारेर पहिला ब्याटिङको निम्तो पाएको नेदरल्यान्ड्स १० ओभरमा ४४ रनमा अल आउट भएको थियो । नेदरल्यान्ड्सका १० खेलाडीले दोहोरो अंकमा रन बनाउन सकेनन् । नेदरल्यान्ड्सका कोलिन एक्रमनले ९ बलमा १ चौका र १ छक्का सहित सर्वाधिक ११ रन बनाए । स्कट एडवाड्र्सले ८, म्याक्स ओडाउड २, बेन कुपर ९ र पिटार सिलार २ रनमा आउट भए ।

श्रीलंका स्पिनर वानिन्दु हसरंगाले ३ ओभरमा ९ रन खर्चेर ३ विकेट लिए । तीव्र गतिका बलर लाहिरु कुमाराले ३ ओभरमा १ मेडन सहित ७ रन खर्चेर ३ विकेट लिए । महेश थेक्सनाले १ ओभरमा ३ रन खर्चेर २ विकेट लिए । दुश्मन्था चामिराको नाममा १ विकेट रह्यो ।

समूह ए बाट श्रीलंका ३ खेलमा ३ मानै जित सहित ६ अंकका साथ शीर्ष स्थानमा रह्यो । नामिबिया ३ खेलमा २ मा जित र १ मा हार सहित ४ अंकका साथ सुपर १२ मा स्थान पक्का गर्यो । आयरल्यान्ड ३ खेलमा २ मा हार र १ मा जित सहित तेस्रो र नेदरल्यान्ड्स ३ खेलमा ३ मानै हारका साथ अंक बिहिन हुँदै बाहिरिए ।

सुपर १२ को समूह ए मा अष्ट्रेलिया, इंग्ल्यान्ड, दक्षिण अफ्रिका, वेस्टइन्डिज, समूह बी को उपविजेता बंगलादेश र समूह ए को विजेता श्रीलंका छन् । सुपर १२ को समूह बी मा भारत, पाकिस्तान, न्युजिल्यान्ड, अफगानिस्तान, पहिलो चरणको समूह बी को विजेता स्कटल्यान्ड र समूह ए को उपविजेता नामिबिया छन् ।

सुपर १२ बाट दुवै समूहका शीर्ष दुई दुई टोलीले सेमिफाइनलमा स्थान बनाउनेछन् । शनिबार सुपर १२ समूह ए का खेल हुनेछन् । शनिबार पहिलो खेलमा अष्ट्रेलिया र दक्षिण अफ्रिकाबीच प्रतिस्पर्धा हुनेछ । दोस्रो खेलमा इंग्ल्यान्ड र वेस्टइन्डिज खेल्नेछन् । आइतबार सुपर १२ को समूह बी का खेलहरु हुनेछन् । पहिलो खेलमा श्रीलंका र बंगलादेश तथा दोस्रो खेलमा पाकिस्तान र भारतबीच प्रतिस्पर्धा हुनेछ ।