एजेन्सी – आइसिसी टि२० विश्वकप २०२१ अन्तर्गत सुपर १२ को समूह ए को पहिलो खेलमा आज अष्ट्रेलिया र दक्षिण अफ्रिकाबीच प्रतिस्पर्धा हुँदैछ । खेल नेपाली समय अनुसार दिउँसो ३ : ४५ मा आबूधाबीमा सुरु हुनेछ । अष्ट्रेलिया आरोन फिन्च र दक्षिण अफ्रिका टेम्बा बभुमाले कप्तानी गर्नेछन् । दुबै टोली विश्वकपमा विजयी सुरुवात गर्ने सोचमा छन् ।

हालसम्म टि२० विश्वकप जित्न नसकेका यी दुई टोलीलाई यस पटक सेमिफाइनल सम्म पुग्नै चुनौती देखिन्छ । अष्ट्रेलिया पछिल्लो समय प्रदर्शन पनि राम्रो छैन । विशेष गरि प्रमुख ब्याटरको खराब लय अष्ट्रेलियालाई चिन्ताको विषय बनेको छ । अष्ट्रेलियालाई यस विश्वकपमा ब्याटिङ मुख्य चिन्ताको विषय बनेको छ । वार्मअप खेलमा अष्ट्रेलियाले न्युजिल्यान्डलाई ३ विकेटले पराजित गरेको थियो । दोस्रो खेलमा भारतसँग ८ विकेटले पराजित भएको थियो ।

ओपनर डेविड वार्नर खराब लयबाट गुज्रिएका छन् । उनको खराब लय अष्ट्रेलियालाई चिन्ता थपेको छ । वार्नर वार्मअप खेलमा भारतसँग १ र न्युजिल्यान्डसँग शून्यमा आउट भएका थिए । इन्डियन प्रिमियर लिग (आइपिएल) मा यस सिजनमा सनराइजर्स हैदराबादबाट खराब प्रदर्शन गरेका थिए । अष्ट्रेलिया प्रमुख ब्याटर वार्नर लयमा फर्किदै उच्च प्रदर्शन चाहन्छ । अर्का ओपनर तथा कप्तान आरोन फिन्चको प्रदर्शन राम्रो छैन ।

यी दुई ओपनरबाट अष्ट्रेलिया उत्कृष्ट प्रदर्शन चाहन्छ । अष्ट्रेलिया तेस्रो नम्बरमा मिचेल मार्श, चौथो नम्बरमा स्टिभ स्मिथ र पाँचौं नम्बरमा ग्लेन म्याक्सवेल रहनेछन् । म्याक्सवेल र मार्श उच्च लयमा छन् । मार्शको उच्च लय रोक्न दक्षिण अफ्रिकी बलरलाई कठिन पर्नसक्छ । म्याक्सवेल अष्ट्रेलिया प्रमुख हतियार हुन् । आक्रामक ब्याटिङका साथ म्याक्सवेलले जित सहज बनाउन सक्छन् । उनको उत्कृष्ट प्रदर्शन विना अष्ट्रेलियालाई जित निकाल्न कठिन पर्ने देखिन्छ ।

तल्लोक्रममा मार्कस स्टोइनिस हुनेछन् । स्टोइनिस पनि राम्रो ब्याटिङ गर्नेगर्दछन् । अलराउन्डर स्टोइनिसले राम्रो प्रदर्शन गर्दै आएका छन् । विकेटकिपरमा जोश इंगलिश र म्याथ्यु हेड मध्य एकले मौका पाउनेछन् । इंगलिशको सम्भावना बढी छ । स्पिनरमा एडम जाम्पा र एश्टन अगर हुनेछन् ।

अगर ब्याटिङको क्षमता राख्छन् । तीन तीव्र गतिका बलरमा मिचेल स्टार्क, प्याट कमिन्स र जोश हेजलवुड रहनेछन् । स्टार्क तीव्र गति र योर्करका लागि माहिर खेलाडी हुन् । अर्कोतर्फ विश्वकपमा लगातार उच्च प्रदर्शन गर्दै आएका छन् । हेजलवुडको पछिल्लो प्रदर्शन उच्च छ । यी तीन तीव्र गतिका बलरको कारण अष्ट्रेलिया बलिङ आक्रामण बलियो छ ।

यता दक्षिण अफ्रिकाले वार्मअप खेलमा अफगानिस्तानलाई ४१ रन र पाकिस्तानलाई ६ विकेटले पराजित गरेको थियो । पाकिस्तानलाई हराउनेक्रममा दक्षिण अफ्रिकाले १ सय ८७ रनको विजयी लक्ष्य पूरा गरेको थियो । तेस्रो नम्बरका रास्सी भान डर डुसेनले १ सय १ रनको शतकीय इनिङ खेलेपछि दक्षिण अफ्रिकाले अन्तिम बलमा पूरा गरेको थियो । डुसेन दक्षिण अफ्रिका अनुभवी र प्रमुख ब्याटर हुन् । उनले दक्षिण अफ्रिकाबाट लगातार उच्च प्रदर्शन गर्दै आएका छन् ।

ओपनिङ क्विन्टन डी कक र एडेन माक्ररमले गर्नेछन् । डि ककलाई राम्रो सुरुवात दिएपछि ठूलो इनिङमा बदल्न आवश्यक देखिन्छ । माक्ररमको पछिल्लो लय उच्च छ । टेम्बा बभुमा, डेविड मिलर र हेनरिक क्लासेन मध्यक्रम सम्हाल्नेछन् । मिलर आक्रामक ब्याटिङका लागि परिचित छन् । उनी अष्ट्रेलियालाई घातक बन्न सक्छन् ।

स्पिनर तबरेज शाम्सी दक्षिण अफ्रिका प्रमुख हतियार हुन् । टि२० आई वरीयता बलिङका शीर्षस्थानका बलर शाम्सीले दक्षिण अफ्रिकाबाट उच्च प्रदर्शन गर्दै आएका छन् । कागिसो रबाडा र एनरिच नोर्किया प्रमुख तीव्र गतिका बलिङ हतियार हुन् । रबाडा योर्करका लागि माहिर छन् । नोर्किया आफ्नो गतिमा विपक्षी ब्याटरलाई दबाबमा राख्दै आएका छन् । रबाडा र नोर्कियाले १ सय ५० प्रतिघण्टा किलोमिर तीव्र गतिमा बलिङ गर्नसक्छन् ।

यी दुई टोलीबीच प्रतिस्पर्धा रोचक हुनेछ । अष्ट्रेलियामा मिचेल स्टार्क हुँदा दक्षिण अफ्रिकामा कागिसो रबाडा छन् । ग्लेन म्याक्सवेल अष्ट्रेलियामा हुँदा दक्षिण अफ्रिकामा डेविड मिलर जस्ता आक्रामक ब्याटर छन् ।

हेड टु हेड :

अष्ट्रेलिया र दक्षिण अफ्रिकाबीच कुल २१ टि२० आई खेल भएका छन् । अष्ट्रेलिया १३ खेलमा विजयी हुँदा ८ खेलमा पराजित भएको छ । पछिल्ला पाँच खेलमा अष्ट्रेलिया ३ खेलमा विजयी हुँदा २ खेलमा पराजित भएको छ । अष्ट्रेलिया पहिला ब्याटिङ गर्दा ४ र लक्ष्य पछ्याउँदा ७ पटक विजयी भएको छ । टि२० विश्वकपमा एक पटक मात्र यी दुई देशबीच भेट भएको छ । सन् २०१२ को टि२० विश्वकपमा अष्ट्रेलियाले दक्षिण अफ्रिकालाई ८ विकेटले पराजित गरेको थियो ।

विश्वकपमा यी दुई टोलीको इतिहास

दक्षिण अफ्रिका टि२० विश्वकपमा सन् २००९ र २०१४ मा सेमिफाइनल सम्म पुगेको थियो । टि२० विश्वकपमा दक्षिण अफ्रिकाले कुल ३० खेल खेलेको छ । जसमा १८ खेलमा विजयी हुँदा १२ खेलमा पराजित भएको छ । अष्ट्रेलिया २०१० को टि२० विश्वकपमा फाइनलमा इंग्ल्यान्डसँग पराजित भएको थियो ।

२००७ र २०१२ मा सेमिफाइनलमा पुगेको थियो । अष्ट्रेलियाले विश्वकपमा कुल २९ खेल खेल्दा १६ खेलमा जित र १३ खेलमा पराजित भएको छ । पछिल्ला १० खेल मध्य दक्षिण अफ्रिकाले ८ खेलमा जित निकालेको छ । अष्ट्रेलिया पछिल्ला १० खेल मध्य ४ मा विजयी भएको छ । आजको दोस्रो खेलमा वेस्टइन्डिज र इंग्ल्यान्डबीच ७ : ४५ मा प्रतिस्पर्धा हुनेछ ।

दक्षिण अफ्रिका टोली : टेम्बा बभुमा (कप्तान), क्विन्टन डि कक, ब्योर्जन फोच्र्युन, रिजा हेनड्रिक्स, हेनरिक क्लासेन, केशव महाराज, एडेन माक्ररम, डेविड मिलर, वुयान मुल्डर, लुन्गी एनगिडी, एनरिच नोर्किया, डवेन प्यट्रियटर्स, कागिसो रबाडा, तबरेज शाम्सी र रास्सी भान डर डुसेन ।

अष्ट्रेलिया टोली : आरोन फिन्च (कप्तान), एश्टन अगर, प्याट कमिन्स (उपकप्तान), जोश हेजलवुड, जोश इंग्लिस, मिचेल मार्श, ग्लेन म्याक्सवेल, केन रिचर्ड्सन, स्टिभ स्मिथ, मिचेल स्टार्क, मार्कस स्टोइनिस, मिचेल स्विपसन, म्याथ्यु वेड, डेविड वार्नर र एडम जाम्पा