एजेन्सी – इंग्ल्यान्डले साविक विजेता वेस्टइन्डिजलाई ६ विकेटले पराजित गर्दै टि२० विश्वकप २०२१ मा सानदार विजयी सुरुवात गरेको छ । इंग्ल्यान्डले वेस्टइन्डिजलाई टि२० विश्वकपमा पहिलो पटक पराजित गरेको हो ।

जितको लागि सामान्य ५६ रनको विजयी लक्ष्य पछ्याएको इंग्ल्यान्डले ८.२ ओभरमा ४ विकेट गुमाउँदै पूरा गर्यो । इंग्ल्यान्डको जितमा जस बटलर २२ बलमा ३ चौका सहित २४ रनमा अविजित रहे । ओपनर जेसन रोय ११, जोनी बेयरस्टो ९, मोईन अली ३ र लियाम लिभिङस्टोन १ रनमा आउट भए । कप्तान ओईन मोर्गन ७ बलमा १ चौका सहित ७ रनमा अविजित रहे । वेस्टइन्डिजका स्पिनर अकिल हुसैनले ४ ओभरमा २४ रन खर्चेर २ विकेट लिए । रवि रामपाउलको नाममा १ विकेट रह्यो ।

त्यसअघि दुबई इन्टरनेशनल क्रिकेट मैदानमा टस हारेर ब्याटिङको निम्तो पाएको वेस्टइन्डिज १४.२ ओभरमा ५५ रनमा अल आउट भएको थियो । साविक विजेता वेस्टइन्डिजका क्रिस गेलले १३ बलमा ३ चौका सहित सर्वाधिक १३ रन बनाए । टि२० क्रिकेटको पावर हाउस वेस्टइन्डिजका १० खेलाडीले दोहोरो अंकमा रन बनाउन सकेनन् ।

तीव्र गतिका बलर क्रिस वोक्सले ओपनर इविन लेविसलाई दोस्रो ओभरको तेस्रो बलमा ६ रनमा क्याच गराउँदै इंग्ल्यान्डलाई पहिलो सफलता दिलाएका थिए । स्पिनर मोईन अलीले तेस्रो ओभरको दोस्रो बलमा अर्का ओपनर लेन्डन सिमन्सलाई ३ रनमा लियाम लिभिङस्टोनबाट क्याच गराए । अलीलेनै पाँचौं ओभरको चौथो बलमा युवा ब्याटर शिम्रन हेटमायरले मोर्गनबाट ९ रनमा क्याच आउट गराएपछि वेस्टइन्डिजले खराब सुरुवात गरेको थियो ।

स्पिनर आदिल राशिद र मोईन अलीको घातक बलिङ सामू वेस्टइन्डिजका ब्याटर निरीह बनेका थिए । वेस्टइन्डिजको खराब सुरुवातलाई मध्यक्रम र तल्लोक्रमका ब्याटरले पनि सम्हाल्न सकेनन् । तीव्र गतिका बलर टायमल मिल्सले छैटौं ओभरको अन्तिम बलमा वेस्टइन्डिजका सर्वाधिक अनुवभी तथा सफल ब्याटर क्रिस गेललाई क्याच गराउँदा पहिलो पावरप्लेमै वेस्टइन्डिज ३१–४ को कमजोर अवस्थामा पुगेको थियो ।

ड्वेन ब्राभो ५ रनमा क्याच आउट भए । मिल्सले नवौं ओभरको पाँचौ बलमा निकोलस पूरनलाई १ रनमा जस बटलरबाट क्याच आउट गराए । वेस्टइन्डिजका अन्तिम आशा तथा प्रमुख हतियार आन्द्रे रसेलले खाता खोल्न सकेनन् । ११ औं ओभरको पहिलो बलमा आदिल राशिदले रसेललाई शून्यमा बोल्ड आउट गरेका थिए । राशिदलेनै काइरन पोलार्डलाई ६ रनमा क्याच गराएपछि सम्पूर्ण आशा सकिएको थियो ।

इंग्ल्यान्डका स्पिनर आदिल राशिदले २.२ ओभरमा २ रन खर्चेर ४ विकेट लिए । मोइन अली र टायमल्स मिल्सले २(२ विकेट लिए । क्रिस वोक्स र क्रिस जोर्डनको नाममा १-१ विकेट रह्यो ।

टि२० विश्वकप इतिहासमा यो तेस्रो कम योगफल हो । यसअघि २०१४ को टि२० विश्वकपमा नेदरल्यान्ड्स श्रीलंकाविरुद्ध १०.३ ओभरमा ३९ रनमा अल आउट भएको थियो । शुक्रबार नेदरल्यान्ड्सनै श्रीलंकाविरुद्ध ४४ रनमा अल आउट भएको थियो । वेस्टइन्डिजको यो टि२० आईमा दोस्रो कम योगफल हो । यसअघि २०१९ मा वेस्टइन्डिज इंग्ल्यान्डसँग ४५ रनमा अल आउट भएको थियो ।

इंग्ल्यान्ड सुपर १२ को समूह ए मा १ खेलमा २ अंकका साथ शीर्षस्थानमा छ । अष्ट्रेलिया १ खेलमा २ अंकका साथ नेटरनरेटको आधारमा दोस्रो स्थानमा छ । इंग्ल्यान्डले आफ्नो दोस्रो खेलमा बुधबार बंगलादेशसँग खेल्नेछ । वेस्टइन्डिजले मंगलबार दक्षिण अफ्रिकासँग खेल्नेछ। शनिबार पहिलो खेलमा अष्ट्रेलियाले दक्षिण अफ्रिकालाई ५ विकेटले पराजित गरेको थियो ।