एजेन्सी – शीर्षक्रमका ब्याटर चरिथ असलंका र मध्यक्रमका भानुका राजपक्षेको उत्कृष्ट ब्याटिङको सहयोगमा श्रीलंकाले आइसिसी टि२० विश्वकप २०२१ मा बंगलादेशमाथि सानदार जित हात पारेको छ । सुपर १२ को समूह ए मा रहेको श्रीलंकाले बंगलादेशलाई ५ विकेटले पराजित गर्दै अंक तालिकामा महत्वपूर्ण २ अंक जोडेको छ ।

जितको लागि १ सय ७२ रनको विजयी लक्ष्य पछ्याएको श्रीलंकाले १८.५ ओभरमा ५ विकेटको क्षतिमा पूरा गर्यो । श्रीलंका जितमा शीर्षक्रमका चारिथ असलंकाले ४९ बलमा ५ चौका र ५ छक्का सहित सर्वाधिक ८० रनको अविजित विजयी इनिङ खेले । भानुका राजपक्षेले ३१ बलमा ३ चौका र ३ छक्का सहित ५३ रनको महत्वपूर्ण इनिङ खेले । पाँचौं विकेटका लागि चरिथ असलंका र भानुका राजपक्षेले ८६ रनको उत्कृष्ट साझेदारी गरेपछि श्रीलंकाले सानदार जित हात पारेको हो । आफ्नो उत्कृष्ट प्रदर्शन र श्रीलंका जितका साथ भानुकाले आफ्नो ३० औं जन्मदिन बनाएका छन् ।

स्पिनर नासुम अहमदले पहिलो ओभरको चौथो बलमा ओपनर कुशल परेरालाई १ रनमा बोल्ड आउट गरेका थिए । तर दोस्रो विकेटका लागि निसंका र असलंकाले ६९ रनको साझेदारी गर्दै श्रीलंकालाई उत्कृष्ट सुरुवात दिलाएका थिए । स्पिनर सकिब अल हसनले नवौं ओभरको पहिलो बलमा निसंकालाई २४ रनमा बोल्ड आउट गर्दै उक्त साझेदारी गरेका थिए । उनले २१ बलमा १ चौका र १ छक्का प्रहार गरे । सकिब टि२० विश्वकपमा सर्वाधिक विकेट लिने बलर बनेका छन् ।

सकिबले त्यसै ओभरको चौथो बलमा अविष्का फर्नान्डोलाई शून्यमा बोल्ड गर्दै बंगलादेशलाई खेलमा फर्काउन खोजेका थिए । अर्को ओभरमा मोहम्मद सैफुद्दिनले वानिन्दु हसरंगालाई ६ रनमा क्याच आउट गराएपछि श्रीलंका केहि दबाबमा परेको थियो । तर भानुका राजपक्षेले असलंकालाई राम्रो साथ दिँदै उत्कृष्ट ब्याटिङ गरेपछि श्रीलंकाले सानदार जित हात पारेको हो । बंगलादेशका स्पिनर सकिब अल हसन र नासुम अहमदले २–२ विकेट लिए ।

त्यसअघि शारजाह क्रिकेट मैदानमा टस हारेर ब्याटिङको निम्तो पाएको बंगलादेशले निर्धारित २० ओभरमा ४ विकेट गुमाउँदै १ सय ७१ रन बनाएको थियो । बंगलादेशका ओपनर मोहम्मद नईमले ५२ बलमा ६ चौका सहित सर्वाधिक ६२ रनको योगदान दिए । विकेटकिपर मुश्फिकुर रहिमले ३७ बलमा ५ चौका र २ छक्का सहित ५७ रनमा अविजित रहे । लिटन दास १६ र सकिब अल हसन १० रन जोडे ।

कप्तान महमूदुल्लाह रियाद ५ बलमा २ चौका सहित १० रनमा अविजित रहे । श्रीलंका चामिका करुणारत्ने, लाहिरु कुमारा र बिनुरा फर्नान्डोले १–१ विकेट लिए ।

श्रीलंका समूह ए को विजेता रुपमा सुपर १२ को समूह ए मा रहेको हो । बंगलादेश समूह बी को उपविजेता रुपमा सुपर १२ को समूह ए मा रहेको हो । बंगलादेशले अव बुधबार इंग्ल्यान्डसँग खेल्नेछ । श्रीलंकाले बिहीबार अष्ट्रेलियासँग खेल्नेछ । समूह ए मा इंग्ल्यान्ड, अष्ट्रेलिया र श्रीलंका समान १ खेलमा २–२ अंक छ । नेटरनरेटको आधारमा इंग्ल्यान्ड शीर्ष, श्रीलंका दोस्रो र अष्ट्रेलिया तेस्रो स्थानमा छन् ।